“Qanlı Yanvar” Nizami rayonunda nümayiş olunub

Bakı:

23 °C

68 %

1 m/s

Əlaqə

AZ RU EN

Ana səhifə / Sosial / “Qanlı Yanvar” Nizami rayonunda nümayiş olunub

“Qanlı Yanvar” Nizami rayonunda nümayiş olunub

13.01.2016 [09:31]

20 Yanvar faciəsinin 26-cı ildönümü ilə əlaqədar Nizami Rayon İcra Hakimiyyəti, Yeni Azərbaycan Partiyası (YAP) Nizami rayon təşkilatı və ANS Şirkətlər Qrupunun birgə təşkilatçılığı ilə 12 saylı orta məktəbdə “ANS Müstəqil Yayım və Media Şirkəti”nin sifarişi ilə istehsal olunan “Qanlı Yanvar” bədii filmi nümayiş olunub.
Beynəlxalq aktyor heyətinin iştirak etdiyi və təxminən 2 saat 10 dəqiqə davam edən “Qanlı Yanvar” bədii filmi Azərbaycanın ən yeni tarixinin şanlı məqamlarını əks etdirib. Filmdə Azərbaycan xalqının öz milli azadlığı və suverenliyi uğrunda apardığı mübarizənin 20 Yanvar səhifəsi bədii təcəssümünü tapıb. “Qanlı Yanvar” bədii filmi 1990-cı ilin 20 Yanvar günü baş verən faciəli hadisələri bir azərbaycanlı ailəsinin - Nərimanovlar ailəsinin gözü ilə göstərib.
Filmin nümayişindən sonra çıxış edən “Qanlı Yanvar” filminin baş rol ifaçıları Tamilla Həmidova və Azər Aydəmir çəkiliş prosesindən bəhs edib, tamaşaçıların suallarını cavablandırıblar.
Sonra Nizami Rayon İcra Hakimiyyəti başçısının müavini Gülnaz İsrafilova bildirib ki, bu film gənclərimizin maarifləndirilməsində mühüm rol oynayacaq: “Bu film bizə həmin hadisələrin dəhşətlərini bir daha xatırlatdı. Lakin düşünürəm ki, gənc nəsil burada bir şücaət və qəhrəmanlıq gördü. Azərbaycanlıların qeyrəti, döyüş əzmi, savaşa hazırlığı və ən əsası, hər bir azərbaycanlının ürəyində çırpınan azadlıq eşqini gördü”.
Çıxış edən YAP Nizami rayon təşkilatının sədri, Milli Məclisin deputatı Sədaqət Vəliyeva isə qeyd edib ki, 20 Yanvar hadisəsi xalqımızın yaddaşına qanlı faciə kimi daxil olsa da, bütövlükdə milli tariximizin ən şanlı və qəhrəmanlıq səhifələrindən birini təşkil edir: “Məhz 20 Yanvardan başlayaraq Azərbaycan xalqı SSRİ-nin tərkibində ədaləti bərpa etməyin qeyri-mümkünlüyünü dərk etdi və milli haqlarımıza obyektiv yanaşma nümayiş olunacağına öz inamını birdəfəlik itirdi”.
Deputat qeyd edib ki, bu gün Azərbaycan xalqı azadlıq uğrunda canlarını qurban edən şəhidlərimizin və cəsur Vətən övladlarının qəhrəmanlıq mübarizəsini çox böyük hörmət və ehtiramla əziz tutur, onların igidliyini yüksək qiymətləndirir: “Şəhidlərimizin qanı bahasına qazanılan müstəqilliyimizi qanımızla və canımızla qorumalı, Ümummilli liderimiz Heydər Əliyevin dediyi kimi, onu daimi, əbədi və dönməz etməliyik”.
Sonda “Yaddaş”, “Xoca”, “Seçilən” və “Bulağıstan” filmlərilə müasir Azərbaycan kinosu sənayesinə töhfələrini vermiş, xalqımızın qəhrəmanlıq salnaməsini dünyaya nümayiş etdirən, Rusiya, Estoniya, Braziliya, Hindistan kimi ölkələrdə, Monreal, “Qoa” və “Black nights” beynəlxalq film festivallarında nümayiş olunan və mükafatlandırılan “Qanlı Yanvar” filminin rejissoru, ANS Şirkətlər Qrupunun prezidenti Vahid Mustafayev və ANS Şirkətlər Qrupunun vitse-prezidenti, telejurnalist, Azərbaycan Respublikasının Əməkdar jurnalisti Mirşahin Ağayev YAP Nizami rayon təşkilatının Fəxri fərmanları ilə təltif ediliblər.
Sonda xatirə şəkli çəkdirilib.
Xatırladaq ki, filmin nümayişi iki gün davam edəcək.

Paylaş:

Baxılıb: 1016 dəfə