Ümumdünya İnsan Hüquqları Bəyannaməsinin 70 illiyi münasibətilə Bakıda sərgi açılıb

Bakı:

20 °C

77 %

6 m/s

Əlaqə

AZ RU EN

Ana səhifə / Sosial / Ümumdünya İnsan Hüquqları Bəyannaməsinin 70 illiyi münasibətilə Bakıda sərgi açılıb

Ümumdünya İnsan Hüquqları Bəyannaməsinin 70 illiyi münasibətilə Bakıda sərgi açılıb

11.12.2018 [09:50]

Birləşmiş Millətlər Təşkilatının Azərbaycandakı nümayəndəliyi İnsan Hüquqları Günü və Ümumdünya İnsan Hüquqları Bəyannaməsinin 70 illiyi münasibətilə Bakıdakı Muzey Mərkəzində sərgi təşkil edib.
AZƏRTAC xəbər verir ki, sərginin açılışında çıxış edən BMT-nin Azərbaycandakı rezident əlaqələndiricisi Qulam İshaqzai 70 il əvvəl qəbul edilmiş Ümumdünya İnsan Hüquqları Bəyannaməsi haqqında danışıb. Bildirilib ki, bəyannamədə öz əksini tapan prinsiplər 1948-ci ildəki aktuallığını bu gün də qoruyub saxlayır. Prinsiplər bizi öz hüquqlarımızı, eləcə də digər insanların hüquqlarını müdafiə etməyə, həmçinin bizi qoruyan hüquqları bilməyə çağırır. Eyni zamanda, bu sənədin qəbulu ilə dilindən, dinindən, cinsiyyətindən asılı olmayaraq hər kəsin azad hüquqlara malik olduğu bəyan edilib.
Qulam İshaqzai söyləyib ki, bu bəyannamə 500-dən çox dilə tərcümə edilib. O, bəyannamənin inqilabi təsirə malik olduğunu vurğulayaraq qeyd edib ki, sənəd siyasi, mülki, sosial, iqtisadi sahələrdə insan hüquqlarının formalaşmasında bir baza rolunu oynayır. Bəyannamə bununla bağlı siyasətin, konstitusiyaların formalaşmasında əsas olub, beynəlxalq insan hüquqları üçün təməl yaradıb.
İnsan hüquqları üzrə müvəkkil Elmira Süleymanova bildirib ki, bəyannamənin prinsipləri sonralar digər sənədlərdə, konstitusiyalarda, konvensiyalarda öz əksini tapıb. Sənəddən sonra iki pakt da qəbul olunub ki, burada da insan hüquqları sahəsində bütün istiqamətlər öz əksini tapıb.
Milli Məclis sədrinin müavini, İnsan hüquqları komitəsinin sədri Bahar Muradova çıxış edərək bildirib ki, insan hüquqlarının təmini üçün səylərimizi birləşdirməliyik, yorulmadan hədəfə doğru getməliyik. Çünki yolun sonunda insan və onun hüquqları dayanır. Nə qədər bəşəriyyət var, insan hüquqları olacaq və biz də bu hüquqlara öz töhfəmizi verməliyik.
Azərbaycan Milli QHT Forumunun prezidenti Rauf Zeyni deyib ki, insan hüquqları sahəsində bərabərliyin təmin edilməsi çox önəmlidir. O, Azərbaycanda insan hüquq və azadlıqlarının yüksək səviyyədə qorunduğunu vurğulayıb.
Üç gün davam edəcək sərgidə dünyanın hər yerindən olan karikaturaçı rəssamların bəyannamənin 30 maddəsinə həsr etdikləri əsərlər və 40 tanınmış qrafik dizaynerin insan hüquqlarına dair təxəyyüllərinin təsvir olunduğu və hər kəsi insan hüquqlarının müdafiəsinə çağıran posterlər nümayiş olunacaq. Bununla yanaşı, ziyarətçilər BMT agentliklərinin dərc etdiyi müxtəlif nəşr və tədris materialları ilə tanış ola və onları əldə edə biləcəklər.

Paylaş:

Baxılıb: 587 dəfə