COVID-19-a yoluxma sayının artmasının qarşısını almaq üçün lüzumsuz təmaslardan çəkinməliyik

Bakı:

14 °C

94 %

3 m/s

Əlaqə

AZ RU EN

Ana səhifə / Sosial / COVID-19-a yoluxma sayının artmasının qarşısını almaq üçün lüzumsuz təmaslardan çəkinməliyik

COVID-19-a yoluxma sayının artmasının qarşısını almaq üçün lüzumsuz təmaslardan çəkinməliyik

05.11.2020 [08:24]

Mütəxəssislərin fikrincə, ön cəbhəyə əlimizdən gələn köməyi etmək üçün ilk növbədə öz sağlamlığımızı qorumalıyıq
Məlum olduğu kimi, hazırda dünya ölkələri koronavirus pandemiyasının yeni dalğasını yaşayır. Bir çox ölkədə virusun yayılmasının qarşısını almaq üçün ciddi tədbirlər həyata keçirilir, tətbiq olunmuş karantin rejimi sərtləşdirilir. Azərbaycanda da COVID-19-a yoluxanların sayında kəskin artım müşahidə edilir, yoluxma və sağalma halları arasında fərq artır, sanitar-epidemioloji durum pisləşir. Pandemiyanın qarşısının alınması məqsədilə Nazirlər Kabinetinin qərarına əsasən, ölkə ərazisində xüsusi karantin rejiminin müddəti 1 dekabr 2020-ci il saat 06:00-dək uzadılıb. Ekspertlər vətəndaşları vəziyyətin ciddiliyini nəzərə almağa və mövcud qaydalara əməl etməyə çağırırlar. Qeyd olunur ki, COVID-19-a yoluxma sayının artmasının qarşısını almaq üçün lüzumsuz təmaslardan çəkinməliyik.
TƏBİB-in infeksion xəstəlikləri üzrə işçi qrupunun rəhbəri, həkim-infeksionist Vasif Əliyev bildirib ki, xəstəliyin inkubasiya dövrü nəzərə alınarsa, vəziyyət nəzarət altına alındıqdan sonra hələ bir müddət yüksəlmələrə doğru gedişatı gözləmək olar: “Təəssüf ki, Azərbaycanda bu vəziyyət nəzarət altına alınmayıb. Çünki rəqəmlər yüksəlişə doğru gedir. Düşünürəm ki, vəziyyət yaydakı dövrdən daha da ağır ola bilər. Çünki yoluxma hallarının sayı əvvəlki kritik dönəmdəkindən iki dəfə daha çoxdur”.
O bildirib ki, virusa yoluxan insanların vəziyyətində əvvəlki dövrə nisbətən yüngülləşmə var: “Yəni yüngül formada keçirənlər çoxdur. Lakin əvvəllər gənclər xəstəliyi daha çox asimptomatik keçirirdilərsə, indi daha ağır formada keçirənlərə də rast gəlinir. COVID-19-un hətta uşaqlarda belə yüksək hərarətlə keçdiyini klinik təcrübələrimizdə də görürük. Virusa aid olan əlamətlərin hamısı bir xəstədə görülməyə bilər. Əlamətlərin heç biri olmasa da, insan virus daşıyıcısı ola bilər. Bu, xəstəliyin klinik gedişatına əsasən müəyyən olunur. İybilmə, dadbilmənin itməsi bəzi insanlarda heç görülməyə də bilər. Bəzilərində isə olub daha uzun müddətə bərpa oluna bilər. Bu baxımdan hər bir insanda klinik əlamətlərin görülüb görülməməsi individualdır. Baxmayaraq ki, virus bir ilə yaxındır ki, dünyada tüğyan edir, xəstəlik əvvəlki dövrlərdə olduğu kimi öz təhlükəliliyini sürdürür. Hərarəti olub-olmamasından asılı olmayaraq, insan həmin virusu daşıya bilər. Hətta xəstəliyin ağır formasında da hərarətin müşahidə edilməməsi mümkündür. Bəzi vətəndaşlar koronavirusu adi qrip hesab edirlər. “Koronavirus bir şayiədir” deyən insanlar da var. Lakin biz bu cəmiyyətdə yaşayırıqsa, virus tüğyan edirsə, qaydalara əməl etməsək, hər birimizin ona yoluxma ehtimalı yüksəkdir”.
Həkim-infeksionist vətəndaşları qaydalara riayət etməyə və məsuliyyətli davranış sərgiləməyə səsləyib. Qeyd edib ki, əlamətləri hiss etdikdə ilkin olaraq həkim müayinəsindən keçmək lazımdır: “Xəstəlik hər insanda fərqli formada keçir. Klinik əlamətlərin başlandığı günə əsaslanaraq həkim tərəfindən anamnez toplanmalıdır. Erkən dönəmdə diaqnostika üçün yaxma götürülməsi vacibdir. Nəticəyə əsasən xəstəliyin olub-olmadığına qərar verə bilərik. Test nəticəsi neqativ olsa da, xəstəliyin klinik əlamətləri varsa və xəstədən şübhələniriksə, o zaman ağciyərin kompüter tomoqrafiyasına (KT) ehtiyac yaranır. Virusun ağciyəri zədələmədiyi hallar da olur”.
“Hazırda müharibə dövrünü yaşayırıq. Bizim şanlı ordumuz tarixi qələbələr qazanır. Müharibədə ön və arxa cəbhələr mövcuddur. Ön cəbhədəki qələbələr müəyyən qədər arxa cəbhədən də asılıdır. Arxa cəbhədə tam gücümüzlə fəaliyyət göstərmək və ön cəbhəyə əlimizdən gələn köməyi etmək üçün gərək ilk növbədə öz sağlamlığımızı qoruyaq”.
Bu fikirləri isə qəzetimizə açıqlamasında Kliniki Tibbi Mərkəzin baş direktor müavini, Yeni Azərbaycan Partiyası (YAP) Qadınlar Şurasının sədr müavini, partiyanın Nərimanov rayon təşkilatı Qadınlar Şurasının sədri Məhəbbət İbrahimova deyib. Onun sözlərinə görə, arxa cəbhədə problemlə üzləşsək, əlavə çətinliklər yarana bilər: “Digər tərəfdən müharibə zamanı yaralılar da olur. Onların müalicəsi xəstəxanalarda aparılır. Biz elə etməliyik ki, xəstəxanalar koronavirus xəstələri ilə yüklənməsin. Bu səbəbdən qorunma tədbirlərinə daha ciddi əməl etməliyik”.
Həkim deyib ki, tibbi maskadan istifadə etmək məsələsinə ciddi yanaşmalıyıq: “Çox təəssüf ki, bəzi vətəndaşlar maskanı özləri ilə sadəcə “gəzdirirlər”. Yəni maskanı ya çənənin altında saxlayırlar, ya da sadəcə ağız nahiyəsini örtürlər. Tibbi maskanın bu cür “gəzdirilməsi” isə hətta yoluxmaya da səbəb ola bilər. Tibbi maska həm burun, həm də ağızı, tənəffüs yollarını örtməlidir. İki nəfər həm məsafə saxlayıb, həm də maskadan istifadə edirsə, bu zaman yoluxma ehtimalı 1 faizdən də az olur. Əks halda isə şəxsin biri xəstədirsə, təmaslar əksər hallarda yoluxmaya səbəb ola bilər”.
MÜŞFİQƏ

Paylaş:

Baxılıb: 617 dəfə