Qripə qarşı vaksinasiya...

Bakı:

24 °C

66 %

3 m/s

Əlaqə

AZ RU EN

Ana səhifə / Sosial / Qripə qarşı vaksinasiya...

Qripə qarşı vaksinasiya...

03.11.2023 [11:05]

Kimlər peyvənd vurdurmalıdır?

Çoxları qrip xəstəliyini adi soyuqdəymə ilə əlaqələndirir. Lakin qripin həyat üçün təhlükəli fəsadlarını ağıllarına gətirmirlər. Əksər insanlar qripi sıradan bir xəstəlik kimi dəyərləndirsə də, bu infeksiya bəzi hallarda ölümlə belə nəticələnə bilər.

Hər zaman olduğu kimi, bu il də payız-qış mövsümünün gəlməsi ilə əlaqədar insanların infeksion xəstəliklərə yoluxması çoxalıb. Ancaq maraqlısı odur ki, bu il qripə yoluxan şəxslər xəstəliyin fərqli əlamətləri olduğunu bildirirlər. Belə ki, qrip olanlar xəstəliyi kifayət qədər ağır keçirdiklərini, çox gec sağaldıqlarını söyləyirlər. Bundan başqa, xəstəliyə yoluxmuş şəxslər kəskin bel ağrıları, baş gicəllənmə və ürək bulanma kimi əlamətlərdən şikayətlənirlər. Bəziləri isə ev şəraitində sağalmağın çox çətin, hətta mümkünsüz olduğunu bildirir.

Qrip vaksinləri gətiriləcək...

Qeyd edək ki, inkişaf etmiş ölkələrdə qripə qarşı vaksin geniş yayılıb. Peyvənd nəticəsində əmələ gələn qrip insandan insana ötürülmür, həmçinin çox zəif gücə malik olur. Ötən gün Səhiyyə naziri Teymur Musayev jurnalistlərə açıqlamasında bildirib ki, növbəti bir-iki gün ərzində ölkəmizə mövsümi qrip vaksinləri gətiriləcək. Nazir bildirib ki, gələn həftədən ambulator tipli ilkin tibbi xidmətlər göstərən bütün müəssisələrdə həmin vaksinləri əldə etmək mümkün olacaq: “Vaksinlər 2 yaşdan yuxarı uşaqlar və böyüklər üçün nəzərdə tutulub”.

Kim istəyirsə peyvənd vurdura bilər...

İnfeksionist-hepatoloq Mərdan Əliyev “Yeni Azərbaycan”a açıqlamasında qrip peyvəndinin vurulmasının məsləhətli olduğunu deyib: “Xüsusən tibb işçiləri və əhalinin aktiv təbəqəsinin peyvənd olunması vacibdir. Qrip xəstəliyinə kimsə dırnaqarası baxmasın. Qrip ən ağır keçirilən xəstəliklərdəndir. Koronavirus infeksiyası ilə qripin üst-üstə düşməsi heç arzuolunan deyil. Bu, xəstənin daha da ağırlaşmasına və çətin sağalmasına səbəb ola bilər.

Düzdür, qrip peyvəndi rutin peyvəndlər sırasına daxil deyil. Məsələn, körpələrə hansı peyvəndlərin vurulmalı olduğu milli immunizasiya proqramı ilə müəyyənləşir. Hansı ayda hansı peyvənd vurulur, dəqiqliklə göstərilir. Məsələn, hepatit A, su çiçəyi, qızılca, göy öskürək, məxmərək, meningit, difteriya, tetanus, pnevmokok pnevmaniyası-bunlar vacib peyvəndlərdir. Amma təhlükələri minimuma endirmək baxımından körpələrə 6 ayından sonra qrip peyvəndi də vurula bilər. Ümumiyyətlə, kim istəyirsə qrip peyvəndi vurdura bilər. Bu, könüllüdür və bir həkim olaraq insanlara virusdan qorunmaq üçün peyvənd olunmağı məsləhət görürəm”.

İnfeksionist bildirib ki, yaşlılar, xroniki və digər yanaşı xəstəliyi olan insanların da qrip peyvəndini vurdurması tövsiyyə olunur: “Qrip peyvəndlərinin vurulması məsləhətdir, ən azından virusa qarşı bədənimizdə müqavimət olmalıdır ki, xəstəliyi daha yüngül keçirək”.

Peyvənd üç cür mutasiya edən virusa qarşıdır...

M.Əliyev qeyd edib ki, hər bir qrip peyvəndi adətən üç cür mutasiya edən virusa qarşı istifadə edilir: “Bunlar adətən A seriyasından olan 2 virus və B seriyasından olan 1 virusdur. A seriyasından olan viruslar H3N2 və H1N1 hansı ki, daha ağır keçir və B seriyasından olan 1 virusun kompanentinə qarşı olur. Hər il bu peyvəndlər qrip virusuna qarşı vurulmalıdır. Peyvəndin hər il vurulmasının səbəblərindən biri odur ki, qrip virusu mutasiya edir.

Uşaqlara və hamilələrə inaktivləşdirilmiş, yəni tam aktivliyi ölmüş peyvənd vurulur. 2 yaşdan yuxarı isə zəiflədilmiş peyvəndlər məsləhət görülür. Xüsusilə də 6 yaşdan yuxarı hər kəsə vurulması tövsiyə edilir”.

Y.SAHİB

Paylaş:

Baxılıb: 903 dəfə