Azərbaycan turizmini dünyada tanıdan jurnalın təqdimatı keçirilib

Bakı:

26 °C

61 %

9 m/s

Əlaqə

AZ RU EN

Ana səhifə / Turizm / Azərbaycan turizmini dünyada tanıdan jurnalın təqdimatı keçirilib

Azərbaycan turizmini dünyada tanıdan jurnalın təqdimatı keçirilib

14.01.2020 [16:39]

Yanvarın 14-də Azərbaycan Turizm Bürosu tərəfindən nəşr edilən "Experience Azerbaijan" jurnalının təqdimat mərasimi keçirilib.
Təqdimat mərasimində çıxış edən Azərbaycan Turizm Bürosunun Baş icraçı direktoru Florian Zenqstşmid jurnalın xarici vətəndaşlara Azərbaycan, həmçinin ölkəmizin turizm potensialı haqda ətraflı məlumat təqdim etdiyini bildirib: "Bu il biz Turizm Bürosunun Ukrayna, Qazaxıstan, Cənubi Koreya Respublikası və Yaponiyada yeni nümayəndəliklərini açmağı düşünürük. Həmçinin Azərbaycanı ziyarət edən potensial turistlərlə əməkdaşlığımızı möhkəmləndirməyi planımıza daxil etmişik. Bunun üçün belə müştərilərlə ünsiyyətimizi xarici dillərdə aparacağıq. Çalışacağıq ki, ölkəni ziyarət edən turistlər kommersiya məqsədi güdməyən layihələrə etibar etsinlər. Jurnal tam olaraq yerli məhsuldur və əcnəbi redaktorların köməyi ilə ərsəyə gəlib".
Sonra çıxış edən jurnalın baş redaktoru Tomas Marsden bildirib ki, Azərbaycana gəldiyi gündən ölkəmizi yenidən özü üçün kəşf edib və insanların zəngin bir mədəniyyətə malik olduğunu anlayıb. Baş redaktor deyib ki, jurnalın məzmunu üç hissədən ibarətdir: "İlk olaraq məqsəd regionu turistlərə tanıtmaq üçün azərbaycanlı vətəndaşların dili ilə çıxış etmək, görməli yerləri, bu ölkənin mədəniyyətini, inanılmaz rəngarəngliyini çatdırmaqdan ibarətdir. Jurnal, eyni zamanda, bir növ bələdçi kimi çıxış edir".
Jurnalda dərc olunan "The Ultimate Guide to Baku’s Nightlife" məqaləsinin müəllifi Alla Qaraqaşlı isə bildirib ki, jurnal ildə iki dəfə olmaqla mart və sentyabr aylarında işıq üzü görəcək. Qeyd olunub ki, jurnalın budəfəki nömrəsi 15 min tirajla çap olunub və Azərbaycanın xaricdə yerləşən bütün səfirliklərinə, beynəlxalq sərgi və yarmarkalara, o cümlədən ölkəmizdə fəaliyyət göstərən əksər hotellərə paylanılıb: "Potensial ziyarətçilər hər zaman yeni məkanlara səyahət edərkən hara gedəcəkləri barədə soruşurlar. İndi bu jurnal onlar üçün vahid mənbəyə çevrilib. Burada məqsəd jurnalın dəyərini qoruyub saxlamaqdır".
Təqdimat mərasimində o da bildirilib ki, jurnalda Azərbaycanın turizm potensialı, görməli yerləri, turizmin müxtəlif növləri üzrə ixtisaslaşmış məkanları, hər il keçirilən festivallar, turistlərin diqqətini cəlb edən milli bayramlar, adət-ənənələr, milli mətbəx nümunələri və s. barədə ətraflı məlumat təqdim olunub. Jurnalda Çinarə Məcidova, Fuad Axundov, Mark Elliott, Fəridə Buyuran və digər müəlliflərin məqalələri yer alıb.
Qeyd edək ki, jurnalı onlayn formada http://bit.ly/35Qn8qu keçidindən istifadə edərək pulsuz əldə etmək mümkündür.

Paylaş:

Baxılıb: 1542 dəfə