22 iyul – Milli Mətbuat günüdür

Bakı:

23 °C

68 %

6 m/s

Əlaqə

AZ RU EN

Ana səhifə / YAP xəbərləri / 22 iyul – Milli Mətbuat günüdür

22 iyul – Milli Mətbuat günüdür

22.07.2025 [12:45]

Tarixdə elə günlər var ki, o günlər yalnız təqvimdə deyil, millətin yaddaşında yaşayır. Elə günlər var ki, yalnız bir hadisənin deyil, bütöv bir ideyanın, bir ruhun, bir başlanğıcın adıdır. Azərbaycan mətbuatının doğulduğu 22 iyul – həmin tarixi günlərdən biridir. Bu tarix yalnız bir qəzetin nəşr tarixi deyil, milli oyanışın, maarifçiliyin, xalqı sözlə, qələmlə oyatmaq missiyasının başlanğıcıdır. 1875-ci ilin o yay səhəri... Tiflisin küçələrində bir səs dolaşırdı. Bu səs kimin üçünsə adi bir xəbər kağızı idi, amma millət üçün yeni bir nəfəs, yeni bir ümid idi. “Əkinçi” qəzetinin ilk sayı – Həsən bəy Zərdabinin ruhunun, ürəyinin, idealının çap olunmuş halı idi. O gün bir qəzet yox, bir mədəniyyət doğulurdu. Çünki qəzet yalnız xəbərlərin toplusu deyil, zamanın aynası, xalqın güzgüsüdür.
Millətə yol göstərənlər, cəmiyyətin ruhuna təsir edənlər yalnız silah tutan əllər deyil. Bəzən bir qələm, bir söz min güllədən daha təsirli olur. Tariximiz şahiddir – Azərbaycanın istiqlal savaşında da, maarifçilik mübarizəsində də, sovet əsarətinə qarşı dirənişdə də, Azərbaycanı məhv olmaqdan xilas edən Ulu Öndər Heydər Əliyevin hakimiyyətə qayıdışına təkidlə dəvət edilməsində də qələm adamlarının rolu danılmazdır. “Əkinçi”dən başlanan bu yol “Molla Nəsrəddin”in satirası ilə güldürərək düşündürən tikanlı yollarla davam etdi. “Kaspi”, “Həyat”, “Füyuzat”, “İrşad”, “İqbal” kimi qəzet və jurnallar milli ruhun, milli dirçəlişin tribunasına çevrildi. Qələm sahibləri cəhalətlə, geriliklə, ədalətsizliklə mübarizə apardılar. Bəziləri sürgün edildi, bəziləri susduruldu, amma söz heç vaxt ölmədi. Söz yaşadı, çünki o, xalqın səsi idi.

XX əsrin sonunda millət yenidən ayağa qalxdı. Müstəqilliyini elan etməklə yox olmaq yoluna düçar olan Azərbaycanı xalqın təkidli tələbi ilə hakimiyyətə gələn Heydər Əliyev xilas etdi. Bu xilas yalnız siyasi deyil, həm də fikrin, sözün, qələmin xilası idi. Və bu yeni dövr, yeni çağırışlar demək idi. 1998-ci ildə ümummilli lider Heydər Əliyev tərəfindən senzuranın ləğv edilməsi Azərbaycan mətbuat tarixində dönüş nöqtəsi oldu. Bu, sözə verilən ən ali dəyər idi. “Mətbuat azad olmayan yerdə cəmiyyət də azad deyil,” – deyirdi Heydər Əliyev. Onun bu uzaqgörən siyasəti nəticəsində jurnalistika cəmiyyətin ayrılmaz bir hissəsinə çevrildi.

Bu gün Prezident İlham Əliyevin rəhbərliyi ilə mətbuatın inkişafına göstərilən diqqət və qayğı, jurnalistlərin sosial rifahının yüksəldilməsi istiqamətində atılan addımlar bu sahəyə verilən önəmin bariz nümunəsidir. Medianın dövlət və cəmiyyət arasında körpü funksiyasını daha da möhkəmləndirmək üçün Medianın İnkişafı Agentliyi və digər islahatlar bu missiyanın davamıdır.

Jurnalist – yalnız məlumat verən deyil. O, həm də haqqı deməkdən çəkinməyən, həqiqəti üzə çıxaran, susduqda belə ruhla danışan şəxsdir. Onun əlinə aldığı qələm adi bir alət deyil, vicdanın, ədalətin, məsuliyyətin simvoludur. Bugünkü jurnalist – informasiya dənizində yön göstərən mayakdır. Doğru ilə yalanın sərhəddi itəndə, fitnə ilə fakt bir-birinə qarışanda söz adamının işığına ehtiyac yaranır. Sosial şəbəkələrin, süni intellektin, informasiya manipulyasiyasının bol olduğu bu çağda mətbuat daha da mühüm və həssas bir mövqedə dayanır. Ona görə də jurnalist olmaq sadəcə bir peşə deyil – bu bir missiyadır. Bu missiya isə dürüstlük, obyektivlik, vicdan və məsuliyyət tələb edir.
Azərbaycan mətbuatı Vətən müharibəsində, 44 günlük şanlı Zəfər yürüşündə də öz qələmi ilə, sədaqəti ilə cəbhədə idi. Hərbi jurnalistlər, döyüş meydanından reportajlar hazırlayan qəhrəman qələm sahibləri və video operatorlar Azərbaycanın haqq səsini dünyaya çatdırdılar. Bu gün də Qarabağda yenidənqurma, quruculuq işlərini işıqlandırmaqda, tarixi ədalətin bərpasını dünyaya çatdırmaqda davam edirlər.
İndi "Əkinçi" qəzeti yoxdursa da, onun ruhu yaşayır. Zərdabinin nəfəsi, Sabirin gülüşü, Üzeyirin səsi, Cəlil Məmmədquluzadənin narahat ruhu bu torpağın mətbuatında hələ də var. Onlar bizə təkcə mətbuat tarixi deyil, həm də sözün əzəmətini miras qoyublar. Bu gün Azərbaycan mətbuatının 150 yaşı tamam olur. Bir xalqın mədəni tarixi, milli oyanışı, ictimai şüuru ilə bərabər yaşlanan bu tarix hər bir jurnalistin, yazı adamının, fikir daşıyıcısının mənəvi pasportudur. Qələmin müqəddəsliyi, sözün gücü, vicdanın rəhbərliyi – əsl jurnalist bu üçlüyə sadiq qalaraq yaşayır və yaşadır.

22 iyul – Milli Mətbuat Günü münasibətilə bütün jurnalistlərimizi, qələm sahiblərini, haqqın və həqiqətin keşiyində dayananları təbrik edir, onlara möhkəm cansağlığı, işlərində uğurlar arzulayıram!

Səfa Ağayev,
YAP İmişli rayon təşkilatının sədri

Paylaş:

Baxılıb: 367 dəfə