Azərbaycan ilə Ruanda yaxşı tərəfdaş və dostlardır

Bakı:

24 °C

88 %

3 m/s

Əlaqə

AZ RU EN

Ana səhifə / YAP xəbərləri / Azərbaycan ilə Ruanda yaxşı tərəfdaş və dostlardır

Azərbaycan ilə Ruanda yaxşı tərəfdaş və dostlardır

22.09.2025 [15:39]

Sentyabrın 20-də Azərbaycan və Ruanda prezidentləri mətbuata bəyanatlarla çıxış ediblər.

Dövlətimizin başçısı cənab İlham Əliyev çıxışında bildirib: “Bu səfər ikitərəfli münasibətlərə əlavə təkan verəcək. Biz əməkdaşlığımızın müxtəlif aspektlərini müzakirə etdik, tərəfdaşlığımızı dərinləşdirmək və genişləndirmək istiqamətində birgə iradəmizi ifadə etdik. Azərbaycan ilə Ruanda yaxşı tərəfdaş və dost ölkələrdir. Biz beynəlxalq təsisatlarda birgə iştirak edir, hər zaman bir-birimizi dəstəkləyirik. Qoşulmama Hərəkatında sədrliyimiz dövründə Ruandanın göstərdiyi dəstək yüksək qiymətləndirilir. Ruanda həmrəyliyin gücləndirilməsinə yönəlmiş təşəbbüslərimizin əksəriyyətini dəstəkləyib və onlara qoşulub. BMT çərçivəsində də fəal əməkdaşlıq edir, qarşılıqlı dəstəyi daim artırırıq.”

Prezident İlham Əliyev son illərdə əlaqələrin daha nəticəyönümlü olduğunu vurğulayıb. Azərbaycandan Ruandaya müxtəlif nümayəndə heyətlərinin səfərləri həyata keçirilib. Ötən il Heydər Əliyev Fondunun nümayəndə heyəti Ruandada olub və Fondun vitse-prezidenti Leyla Əliyevanın səfəri yüksək dəyərləndirilib. Dövlətimizin başçısı qeyd edib ki, Ruandanın genişmiqyaslı inkişafı, dövlətçiliyə və müstəqilliyə bağlılığı böyük təəssürat yaradıb. Heydər Əliyev Fondunun Ruandada təhsil proqramlarını dəstəkləməsi xüsusi əhəmiyyət kəsb edir və bu istiqamət ikitərəfli münasibətlərdə prioritet olmalıdır.

Hazırda Azərbaycanda Ruandadan yalnız bir tələbənin təhsil aldığını bildirən Prezident, tələbə mübadiləsinin genişləndirilməsinin vacibliyini qeyd edib. Bu, Azərbaycanın dövlət təqaüdü çərçivəsində mümkün ola bilər.

Əlavə olaraq, Ruandada “ASAN xidmət” modelinə əsaslanan dövlət xidmətləri mərkəzinin yaradılması imkanları müzakirə olunub. Azərbaycan bu istiqamətdə texniki və maliyyə dəstəyi göstərməyə hazır olduğunu bəyan edib.

Enerji, mədən sənayesi, biznes və investisiya sahələrində əməkdaşlıq imkanları da diqqət mərkəzində olub. Azərbaycan tərəfi Ruandada sərmayə layihələrində iştirak etməyə hazır olduğunu vurğulayıb. Dövlət başçısı bildirib: “Bizim siyasi münasibətlərimiz ən yüksək səviyyədədir. Qarşımızda duran əsas vəzifə bu müsbət təcrübəni iqtisadi, ticari və digər sahələrdə də inkişaf etdirməkdir.”

Azərbaycan Respublikası ilə Ruanda Respublikası arasında diplomatik münasibətlər 28 may 2004-cü ildə yaradılıb. Əlaqələr əsasən BMT, Qoşulmama Hərəkatı və İƏT çərçivəsində inkişaf etdirilir. Ruanda Azərbaycanın QH-yə sədrliyinin uzadılmasına, eləcə də ölkəmizin irəli sürdüyü təşəbbüslərə, xüsusilə COVID-19 ilə bağlı fəaliyyətinə dəstək göstərib.

Bu gün ölkələrimiz arasında əməkdaşlıq üçün yeni sahələrin müəyyənləşdirilməsi və əlaqələrin daha da gücləndirilməsi qarşılıqlı maraq doğurur.

Şamo Qasımov,

Yeni Azərbaycan Partiyası Laçın rayon təşkilatının sədr müavini

Paylaş:

Baxılıb: 514 dəfə