Mökəm təməl üzərində qurulan strateji tərəfdaşlıq

Bakı:

21 °C

56 %

7 m/s

Əlaqə

AZ RU EN

Ana səhifə / YAP xəbərləri / Mökəm təməl üzərində qurulan strateji tərəfdaşlıq

Mökəm təməl üzərində qurulan strateji tərəfdaşlıq

19.02.2026 [14:33]

Cari ilin fevral ayının 15-də Azərbaycan Respublikasının Prezidenti cənab İlham Əliyevin Serbiya Respublikasına həyata keçirdiyi səfər iki ölkə arasında strateji tərəfdaşlığın növbəti mühüm mərhələsi kimi qiymətləndirilir. Səfər çərçivəsində aparılan görüşlər, keçirilən müzakirələr və imzalanan sənədlər Azərbaycan–Serbiya münasibətlərinin siyasi, iqtisadi və enerji sahələrində daha da dərinləşdiyini nümayiş etdirmiş, bu əməkdaşlığın perspektivlərini aydın şəkildə ortaya qoymuşdur.

Cənab Prezident bəyanatında vurğulamışdır ki, Azərbaycan ilə Serbiya arasında münasibətlər qarşılıqlı hörmət, etimad və beynəlxalq hüququn prinsiplərinə əsaslanır. Hər iki ölkə bir-birinin suverenliyini və ərazi bütövlüyünü daim dəstəkləmişdir ki, bu da siyasi dialoqun möhkəm təməl üzərində qurulduğunu göstərir. Ölkə başcısı qeyd etmişdir ki, ölkələrimiz beynəlxalq təşkilatlar çərçivəsində də sıx əməkdaşlıq edir və bir-birinin haqlı mövqeyini müdafiə edir.

Bəyanatda iqtisadi əməkdaşlıq məsələlərinə xüsusi yer ayrılmışdır. Son illər ticarət dövriyyəsinin artması, birgə layihələrin həyata keçirilməsi və qarşılıqlı sərmayə imkanlarının genişlənməsi münasibətlərin praktiki müstəvidə inkişaf etdiyini göstərir. Möhtərəm Prezident bildirmişdir ki, iqtisadiyyatın müxtəlif sahələrində – sənaye, kənd təsərrüfatı, nəqliyyat və infrastruktur istiqamətlərində əməkdaşlıq üçün geniş potensial mövcuddur. Bu baxımdan hökumətlərarası komissiyanın fəaliyyəti və biznes forumlarının təşkili xüsusi əhəmiyyət kəsb edir.

Azərbaycan Prezidenti enerji sahəsində əməkdaşlığa da bəyanatda xüsusi yer ayırmışdır. Azərbaycan Avropanın enerji təhlükəsizliyinin təmin olunmasında mühüm rol oynayır və Serbiya ilə bu sahədə tərəfdaşlığın genişləndirilməsi perspektivləri müzakirə edilmişdir. Xüsusilə, qaz təchizatı və enerji layihələri çərçivəsində əməkdaşlığın artırılması məsələsi diqqət mərkəzində olmuşdur. Bu, həm regionda enerji şaxələndirilməsinə töhfə verir, həm də iki ölkə arasında strateji əlaqələri gücləndirir.

Bəyanatda həmçinin humanitar və mədəni əlaqələrin inkişafının vacibliyidə qeyd edilmişdir. Təhsil, mədəniyyət və turizm sahələrində əməkdaşlıq xalqlar arasında dostluq münasibətlərinin möhkəmlənməsinə xidmət edir. Tarixi dostluq ənənələrinə əsaslanan Azərbaycan–Serbiya münasibətləri qarşılıqlı səfərlər və birgə tədbirlər vasitəsilə daha da genişlənir.

Səfər zamanı aparılan danışıqlar nəticəsində bir sıra sənədlərin imzalanması tərəflərin gələcək əməkdaşlıq niyyətini bir daha təsdiqləmişdir. Cənab İlham Əliyevin bəyanatı göstərdi ki, Azərbaycan Serbiya ilə əlaqələrin inkişafına böyük önəm verir və bu münasibətləri uzunmüddətli strateji tərəfdaşlıq səviyyəsində görür.

Nəticə etibarilə, fevralın 15-də Serbiya Respublikasına həyata keçirilən səfər və səsləndirilən bəyanat iki ölkə arasında mövcud əlaqələrin möhkəm təməl üzərində qurulduğunu və gələcəkdə daha da genişlənəcəyini nümayiş etdirmişdir.

Bu səfər Azərbaycan–Serbiya münasibətlərinin inkişafında yeni mərhələnin başlanğıcı kimi dəyərləndirilə bilər.

Nazim Bünyatov

YAP Ağcabədi rayon təşkilatının sədr müavini

Paylaş:

Baxılıb: 657 dəfə