26 İyun – Gücümüzün, Qürurumuzun və Qələbəmizin Rəmzi

Bakı:

26 °C

42 %

4 m/s

Əlaqə

AZ RU EN

Ana səhifə / YAP xəbərləri / 26 İyun – Gücümüzün, Qürurumuzun və Qələbəmizin Rəmzi

26 İyun – Gücümüzün, Qürurumuzun və Qələbəmizin Rəmzi

22.06.2026 [13:57]

Azərbaycan xalqının tarixində elə günlər vardır ki, onlar təkcə təqvimdə qeyd olunan əlamətdar tarix deyil, həm də milli qürurun, dövlətçilik ənənələrinin və xalqın sarsılmaz iradəsinin ifadəsinə çevrilir. 26 İyun – Azərbaycan Respublikasının Silahlı Qüvvələri Günü məhz belə əlamətdar günlərdən biridir. Bu tarix müstəqil Azərbaycan dövlətinin qüdrətinin, xalqımızın təhlükəsizliyinin və ərazi bütövlüyünün keşiyində dayanan qəhrəman ordumuzun bayramıdır.

Ümummilli Lider Heydər Əliyev tərəfindən müəyyən edilmiş və Prezident, Müzəffər Ali Baş Komandan İlham Əliyev tərəfindən uğurla davam etdirilən ordu quruculuğu siyasəti nəticəsində Azərbaycan Silahlı Qüvvələri regionun ən güclü ordularından birinə çevrilmişdir. Bu gün Azərbaycan Ordusu yüksək peşəkarlığı, müasir texniki təminatı, döyüş qabiliyyəti və vətənə sonsuz sədaqəti ilə seçilir.

Azərbaycan Ordusunun keçdiyi yol şərəfli və qürurverici bir tarixdir. Müstəqilliyimizin ilk illərində üzləşdiyimiz çətinliklərə baxmayaraq, xalqımız güclü dövlət və güclü ordu yaratmaq əzmini nümayiş etdirdi. Ordu quruculuğuna göstərilən diqqət və qayğı nəticəsində Silahlı Qüvvələrimiz inkişaf edərək ölkəmizin təhlükəsizliyinin əsas təminatçısına çevrildi. Bu inkişaf təkcə hərbi sahədə deyil, həm də milli ruhun, vətənpərvərlik hissinin güclənməsində mühüm rol oynadı.

Azərbaycan əsgəri hər zaman torpağa, bayrağa və xalqa sədaqətin simvolu olub. Onun gücü yalnız əlindəki silahda deyil, ürəyində daşıdığı Vətən sevgisindədir. Bu sevgi illər boyu xalqımızın ən çətin sınaqlardan alnıaçıq çıxmasına imkan verib. Azərbaycan əsgəri öz şücaəti ilə sübut edib ki, Vətənin müdafiəsi müqəddəs borcdur və bu borcun yerinə yetirilməsi üçün hər bir fədakarlığa hazırdır.

2020-ci ildə baş vermiş və tariximizə qızıl hərflərlə yazılmış 44 günlük Vətən müharibəsi Azərbaycan Ordusunun gücünü bütün dünyaya nümayiş etdirdi. Müzəffər Ali Baş Komandan İlham Əliyevin rəhbərliyi altında rəşadətli Azərbaycan Ordusu işğal altında olan torpaqlarımızı azad etdi, xalqımızın otuz ilə yaxın davam edən həsrətinə son qoydu. Bu möhtəşəm Qələbə yalnız hərbi uğur deyil, həm də milli birliyin, xalq–ordu həmrəyliyinin və dövlətimizin siyasi iradəsinin təntənəsi idi.

Vətən müharibəsində şəhidlik zirvəsinə ucalan igid oğullarımızın xatirəsi xalqımızın qəlbində əbədi yaşayır. Onlar canlarını Azərbaycanın azadlığı, suverenliyi və gələcəyi uğrunda fəda etdilər. Şəhidlərimizin qəhrəmanlığı gələcək nəsillər üçün vətənpərvərlik məktəbi, milli qürur mənbəyidir. Qazilərimizin göstərdiyi şücaət isə Azərbaycan əsgərinin yenilməz ruhunun ən parlaq nümunələrindən biridir.

Bu gün işğaldan azad edilmiş torpaqlarımızda geniş quruculuq və bərpa işləri aparılır. Vaxtilə dağıdılmış şəhər və kəndlər yenidən dirçəlir, həyat öz axarına qayıdır. Bütün bunlar Azərbaycan Ordusunun qazandığı tarixi Qələbənin nəticəsidir. Hər bir bərpa olunan yaşayış məntəqəsi, hər bir ucaldılan bina və hər bir qayıdan sakin qəhrəman əsgərlərimizin fədakarlığının canlı təcəssümüdür.

Silahlı Qüvvələr Günü həm də gənc nəslin vətənpərvərlik ruhunda tərbiyə olunması baxımından mühüm əhəmiyyət daşıyır. Bu gün biz qəhrəman əsgərlərimizin xidmətini yüksək qiymətləndirir, onların şərəfli missiyasına dərin ehtiramımızı bildiririk. Azərbaycan gəncləri ordumuzun qazandığı zəfərlərdən ilham alaraq dövlətə, xalqa və Vətənə sədaqət ruhunda formalaşırlar.

Bu əlamətdar gündə bir daha əminliklə deyə bilərik ki, Azərbaycan Ordusu xalqımızın qürur mənbəyi, dövlətimizin etibarlı dayağıdır. Üçrəngli bayrağımızın əzəmətlə dalğalandığı hər bir guşədə Azərbaycan əsgərinin qəhrəmanlığı, fədakarlığı və vətən sevgisi yaşayır. Ordumuzun gücü xalqımızın birliyindən, dövlətimizin qüdrətindən və Vətənə olan sonsuz məhəbbətdən qaynaqlanır.

26 İyun – Azərbaycan Respublikasının Silahlı Qüvvələri Günü münasibətilə bütün hərbi qulluqçularımızı təbrik edir, şanlı ordumuza yeni uğurlar, qüdrətli Azərbaycanımıza isə daim sülh, əmin-amanlıq və inkişaf arzulayırıq.

Sevinc Xəlilova

YAP Samux rayon təşkilatının sədr müavini