26 İyun – Azərbaycan Respublikasının Silahlı Qüvvələri Günü: Qürur, Qüdrət və Zəfər Tarixi

Bakı:

26 °C

83 %

3 m/s

Əlaqə

AZ RU EN

Ana səhifə / YAP xəbərləri / 26 İyun – Azərbaycan Respublikasının Silahlı Qüvvələri Günü: Qürur, Qüdrət və Zəfər Tarixi

26 İyun – Azərbaycan Respublikasının Silahlı Qüvvələri Günü: Qürur, Qüdrət və Zəfər Tarixi

23.06.2026 [16:03]

26 İyun – Azərbaycan Respublikasının Silahlı Qüvvələri Günü xalqımızın dövlətçilik tarixində mühüm yer tutan, milli qürur və iftixar hisslərini özündə birləşdirən əlamətdar bir bayramdır. Bu gün təkcə bir təqvim tarixi deyil, həm də Azərbaycan Ordusunun keçdiyi şərəfli yolun, xalq–ordu birliyinin və müstəqil dövlətimizin təhlükəsizlik təminatının simvoludur. Hər il ölkəmizdə böyük təntənə ilə qeyd olunan bu gün, vətənpərvərlik ruhunun daha da güclənməsinə, gənc nəsildə milli şüurun formalaşmasına xidmət edir.

Azərbaycan xalqının tarixi qəhrəmanlıq səhifələri ilə zəngindir. Əsrlər boyu mübarizə əzmini, milli həmrəyliyi və dövlətçilik ənənələrini qoruyub saxlayan xalqımız bu gün müasir, güclü və peşəkar orduya sahib olmaqla öz müstəqilliyini daha etibarlı şəkildə təmin edir. Azərbaycan Ordusu artıq regionda deyil, beynəlxalq miqyasda da öz sözünü deyən, yüksək döyüş qabiliyyəti ilə seçilən silahlı qüvvələr sırasındadır.

Milli Ordumuzun formalaşması və inkişafı Ümummilli Lider Heydər Əliyevin adı ilə bilavasitə bağlıdır. Məhz onun uzaqgörən siyasəti və qətiyyətli rəhbərliyi nəticəsində Azərbaycanda nizami ordu quruculuğu sistemli şəkildə həyata keçirildi. Bakıda Cəmşid Naxçıvanski adına Hərbi Məktəbin yaradılması, milli hərbi kadrların hazırlanması və peşəkar zabit korpusunun formalaşdırılması bu siyasətin mühüm tərkib hissəsi idi. Ulu Öndərin orduya verdiyi dəyər və diqqət Azərbaycan Silahlı Qüvvələrinin gələcək inkişafının möhkəm təməlini qoydu. Onun “ordunun qüdrəti vətənpərvərlik hissindən qaynaqlanır” fikri bu gün də Azərbaycan hərbçilərinin fəaliyyətində əsas ideya kimi yaşayır.

Azərbaycan Ordusunun gücü və qüdrəti xüsusilə 2020-ci ildə baş vermiş 44 günlük Vətən müharibəsində özünün ən ali ifadəsini tapdı. Ali Baş Komandan İlham Əliyevin rəhbərliyi ilə Müzəffər Ordumuz işğal altında olan torpaqlarımızı azad edərək tarixi ədaləti bərpa etdi. Bu qələbə yalnız hərbi uğur deyil, həm də xalqın birliyinin, dövlətin gücünün və ordunun peşəkarlığının parlaq təzahürü oldu. Şəhidlərimizin qəhrəmanlığı və qazilərimizin fədakarlığı Azərbaycan tarixində əbədi iz qoydu, milli yaddaşımıza yeni bir şanlı səhifə əlavə etdi.

Bu gün Azərbaycan Ordusu müasir texnologiyalarla təchiz olunmuş, yüksək hazırlıqlı şəxsi heyətə malik güclü bir orduya çevrilmişdir. Orduda xidmət edən hər bir zabit və əsgər Vətənə sədaqəti, dövlətə bağlılığı və yüksək vətənpərvərlik ruhu ilə seçilir. Onlar Azərbaycanın müstəqilliyinin, ərazi bütövlüyünün və suverenliyinin keşiyində ayıq-sayıq dayanaraq dövlətçiliyimizin etibarlı təminatçısına çevrilmişlər.

Prezident İlham Əliyevin rəhbərliyi ilə həyata keçirilən ordu quruculuğu siyasəti bu gün də uğurla davam etdirilir. Müdafiə qabiliyyətinin gücləndirilməsi, müasir döyüş sistemlərinin tətbiqi və beynəlxalq hərbi əməkdaşlığın genişləndirilməsi Azərbaycanın təhlükəsizlik strategiyasının əsas istiqamətlərini təşkil edir. Eyni zamanda, ölkəmizin beynəlxalq arenada artan nüfuzu və həyata keçirdiyi sülh təşəbbüsləri Azərbaycanın həm regionda, həm də dünyada etibarlı tərəfdaş kimi qəbul edilməsinə şərait yaradır.

Azərbaycan xalqı öz ordusu ilə haqlı olaraq fəxr edir. Çünki bu ordu xalqın iradəsindən doğmuş, dövlətin gücü ilə formalaşmış və tarixi zəfərlərlə özünü təsdiqləmişdir. Bu gün Silahlı Qüvvələrimiz yalnız ölkəmizin deyil, həm də regionun sabitliyinin və təhlükəsizliyinin mühüm təminatçısıdır.

Nəticə etibarilə, 26 İyun – Silahlı Qüvvələr Günü Azərbaycan dövlətçiliyinin qüdrətini, xalq–ordu birliyinin sarsılmazlığını və müstəqilliyimizin əbədi olduğunu bir daha nümayiş etdirir. Azərbaycan Ordusu bundan sonra da şərəfli yolunu davam etdirərək Vətənimizin təhlükəsizliyini və suverenliyini etibarlı şəkildə qoruyacaqdır.

İlahə Qurbanova

YAP Samux rayon təşkilatının əməkdaşı

Paylaş:

Baxılıb: 368 dəfə