Qarabağdan Avropaya uzanan əməkdaşlıq körpüsü

Bakı:

29 °C

54 %

8 m/s

Əlaqə

AZ RU EN

Ana səhifə / YAP xəbərləri / Qarabağdan Avropaya uzanan əməkdaşlıq körpüsü

Qarabağdan Avropaya uzanan əməkdaşlıq körpüsü

16.07.2026 [14:06]

Bayram Aslanov,

YAP İdarə Heyətinin üzvü, YAP Gəncə şəhər təşkilatının sədri

İyulun 14-də Azərbaycanın mədəniyyət paytaxtı Şuşada Prezident İlham Əliyev və Slovakiya Respublikasının Prezidenti Peter Pelleqrinin mətbuata verdikləri bəyanatlar təkcə iki ölkə arasında münasibətlərin inkişafını deyil, həm də Cənubi Qafqazın lider dövləti, Avropa və Asiyanın kəsişmə nöqtəsində yerləşən Azərbaycanın beynəlxalq nüfuzunun və regional liderlik mövqeyinin daha bir təsdiqini nümayiş etdirdi.

Şuşanın belə mühüm siyasi dialoq üçün seçilməsi xüsusi rəmzi məna daşıyır. Qururverici haldır ki, Şuşa artıq yalnız tarixi zəfərin simvolu deyil, həm də beynəlxalq əməkdaşlıq və diplomatik təşəbbüslərin mərkəzlərindən birinə çevrilib.

Prezident İlham Əliyev Slovakiyanın dövlət başçısı Peter Pelleqrini ilə görüşdən sonra keçirilən birgə mətbuat konfransında Azərbaycan ilə Slovakiya arasında formalaşmış strateji tərəfdaşlığın konkret nəticələr verdiyini vurğuladı. Dövlət başçısı xatırladıb ki, 2024-cü ildə imzalanmış Strateji Tərəfdaşlığa dair Birgə Bəyannamə münasibətlərin yeni mərhələyə yüksəlməsini təmin edib və bu gün həmin sənəd real layihələrlə təsdiq olunur. Bu, Azərbaycan xarici siyasətinin praqmatik və etibarlı tərəfdaşlıq modelinin uğurlu nəticəsidir.

Bəyanatda xüsusi diqqət çəkən məqamlardan biri Slovakiyanın Qarabağın bərpasında fəal iştirak etməsi oldu. Ağdam rayonunun Baş Qərvənd kəndində Slovakiya şirkətinin həyata keçirdiyi “Ağıllı kənd” layihəsi dost ölkənin Azərbaycanın işğaldan azad olunmuş ərazilərinin dirçəldilməsinə verdiyi töhfənin real ifadəsidir. Bu fakt göstərir ki, Qarabağ artıq beynəlxalq iqtisadi əməkdaşlığın və investisiya layihələrinin cəlb olunduğu yeni inkişaf məkanına çevrilir.

Prezident İlham Əliyev enerji, iqtisadiyyat, hərbi-texniki əməkdaşlıq və ticarət əlaqələrinin genişləndirilməsinin iki ölkə arasında münasibətlərin əsas istiqamətləri olduğunu xüsusi ilə qeyd edib. Azərbaycanın Avropanın enerji təhlükəsizliyində oynadığı rol artıq uzun illərdir ki, beynəlxalq səviyyədə qəbul olunur. Slovakiya ilə əməkdaşlığın genişlənməsi isə ölkəmizin etibarlı enerji tərəfdaşı statusunu daha da möhkəmləndirir.

Mətbuat konfransında Prezident Peter Pelleqrinin çıxışında səsləndirilən fikirlər də diqqətəlayiq idi. Qarabağda qısa müddətdə həyata keçirilən bərpa və quruculuq işlərini yüksək qiymətləndirən Prezident Peter Pelleqrin Azərbaycanı regionun sabitliyi, inkişafı, logistika və enerji təhlükəsizliyi baxımından mühüm tərəfdaş adlandırıb. Slovakiya Prezidentinin bu qiymətləndirməsi Azərbaycanın beynəlxalq aləmdə artan nüfuzunun daha bir göstəricisi kimi dəyərləndirilə bilər.

Azərbaycanın tarixi şəhəri Şuşada səsləndirilən bəyanatlar bir daha göstərdi ki, ölkəmiz artıq postmünaqişə dövrünün gündəliyini özü müəyyənləşdirən dövlətdir. İşğaldan azad edilmiş torpaqlarda aparılan genişmiqyaslı bərpa işləri, xarici investorların cəlb edilməsi və beynəlxalq tərəfdaşların layihələrə qoşulması Prezident İlham Əliyevin həyata keçirdiyi inkişaf strategiyasının uğurla reallaşdığını təsdiqləyir.

Bəyanatlarda nəqliyyat, iqtisadiyyat, müdafiə sənayesi, texnologiya və biznes sahələrində əməkdaşlığın genişləndirilməsi istiqamətində əldə olunan razılaşmalar gələcək üçün böyük perspektivlər vəd edir. Xüsusilə birbaşa hava əlaqələrinin yaradılması, biznes forumlarının təşkili və birgə istehsal layihələrinin təşviqi iqtisadi münasibətlərin keyfiyyətcə yeni mərhələyə keçəcəyindən xəbər verir.

Prezident İlham Əliyevin Şuşada verdiyi bəyanat Azərbaycanın müstəqil, balanslaşdırılmış və milli maraqlara söykənən xarici siyasət kursunun növbəti uğurlu təqdimatı oldu. Slovakiya Prezidenti Peter Pelleqrinin səfəri isə sübut etdi ki, Azərbaycan Avropa dövlətləri üçün etibarlı siyasi, iqtisadi və enerji tərəfdaşı olmaqla yanaşı, sülhün, inkişafın və qarşılıqlı faydalı əməkdaşlığın təşəbbüskarı kimi beynəlxalq nüfuzunu davamlı şəkildə möhkəmləndirir.

Paylaş:

Baxılıb: 71 dəfə