Şuşa görüşü və strateji tərəfdaşlığın gələcəyi

Bakı:

26 °C

61 %

5 m/s

Əlaqə

AZ RU EN

Ana səhifə / YAP xəbərləri / Şuşa görüşü və strateji tərəfdaşlığın gələcəyi

Şuşa görüşü və strateji tərəfdaşlığın gələcəyi

21.07.2026 [15:34]

Azərbaycan Respublikasının xarici siyasətində Mərkəzi və Şərqi Avropa ölkələri ilə ikitərəfli əlaqələrin inkişafı xüsusi mühüm yer tutur. Bu kontekstdə Slovakiya Respublikası ilə qurulan dialoq və çoxşaxəli əməkdaşlıq dinamik şəkildə yüksələn xətlə inkişaf edir. İyulun 14-də Slovakiya Respublikasının Prezidenti Peter Pelleqrinin Azərbaycana rəsmi səfəri və səfər çərçivəsində Azərbaycanın mədəniyyət paytaxtı Şuşa şəhərində keçirilən görüşlər, verilən bəyanatlar iki ölkə arasında dostluq və tərəfdaşlıq münasibətlərinin keyfiyyətcə yeni mərhələyə qədəm qoyduğunu əyani şəkildə sübut etdi. Prezident İlham Əliyevin Şuşada mətbuat üçün verdiyi bəyanat ikitərəfli əlaqələrin mövcud vəziyyətinə və gələcək perspektivlərinə tam, hərtərəfli baxış təqdim edir. Slovakiya-Azərbaycan siyasi əlaqələri bu gün çox yüksək səviyyədədir və yüksək səviyyəli qarşılıqlı səfərlər bu intensivliyin ən aydın təzahürüdür. Liderlər arasında qurulmuş səmimi dialoq və siyasi iradə iki dövlətin bir-birinə olan qarşılıqlı etimadını möhkəmləndirir. Şuşada keçirilən görüş xüsusilə rəmzi və strateji əhəmiyyət daşıyır. Qarabağın tacı sayılan bu qədim şəhərdə belə mötəbər qonağın ağırlanması və rəsmi danışıqların aparılması Azərbaycanın regionda yaratdığı yeni reallıqların beynəlxalq aləmdə, o cümlədən Avropa İttifaqına üzv dövlətlər tərəfindən tam qəbul olunduğunun göstəricisidir. Yüksək səviyyəli diplomatik təmaslar göstərir ki, hər iki tərəf yalnız ikitərəfli müstəvidə deyil, həm də beynəlxalq təşkilatlar çərçivəsində bir-birinin maraqlarına hörmətlə yanaşır və konstruktiv mövqedən çıxış edir. İkitərəfli münasibətlərin ən mühüm və praktiki tərəflərindən biri Slovakiyanın işğaldan azad edilmiş Qarabağ və Şərqi Zəngəzurun bərpasında və yeniden qurulmasında fəal iştirak etməsidir. Şuşa bəyanatında xüsusi vurğulandığı kimi, Slovakiya şirkətlərinin azad olunmuş ərazilərdə həyata keçirilən infrastruktur və bərpa layihələrinə cəlb edilməsi böyük əhəmiyyət kəsb edir. Xüsusilə Ağdam rayonunun Baş Qərvənd kəndinin "Ağıllı kənd" konsepsiyası əsasında Slovakiyanın qabaqcıl texnologiyaları və təcrübəsi tətbiq edilməklə yenidən qurulması layihəsi müstəsna nümunədir. Bu fəaliyyət yalnız iqtisadi tərəfdaşlıq deyil, həm də Slovakiyanın Azərbaycanın ərazi bütövlüyünə, sülh və quruculuq təşəbbüslərinə verdiyi real dostluq dəstəyinin göstəricisidir. Azərbaycan Respublikası və Slovakiya Respublikası arasında ikitərəfli münasibətlər yalnız siyasi və bərpa sahəsi ilə məhdudlaşmır; enerji, müdafiə sənayesi, ticarət, nəqliyyat-logistika və humanitar sahələrdə də böyük potensiala malikdir. Azərbaycanın Avropanın enerji təhlükəsizliyində oynadığı strateji rol çərçivəsində Slovakiya ilə enerji dialoqu xüsusi əhəmiyyət kəsb edir. Qaz təchizatının diversifikasiyası, bərpa olunan enerji sahəsində təcrübə mübadiləsi və qarşılıqlı sərmayə qoyuluşu imkanları iki ölkə iqtisadiyyatının bir-birini tamamlamasına şərait yaradır. Müdafiə sənayesi sahəsində qurulan əməkdaşlıq da ikitərəfli əlaqələrin strateji xarakterini daha da dərinləşdirir. Prezident İlham Əliyevin Şuşada bəyan etdiyi kimi, Slovakiya-Azərbaycan əlaqələrinin inkişafı uğurla və böyük dinamika ilə davam edir. Qurulmuş möhkəm təməl, qarşılıqlı hörmət və konkret nəticələrə söykənən əməkdaşlıq modeli gələcək üçün böyük perspektivlər açır. Əminliklə demək olar ki, bu münasibətlər bundan sonra da yüksələn xətlə inkişaf edəcək, həm Azərbaycan, həm də Slovakiya xalqlarının rifahına, eləcə də regional sabitliyə və təhlükəsizliyə mühüm töhfələr verməkdə davam edəcəkdir.

Nicat Quliyev

YAP Laçın rayon təşkilatının məsləhətçisi

Paylaş:

Baxılıb: 211 dəfə