Naxçıvanın inkişafında yeni strateji mərhələ

Bakı:

26 °C

38 %

6 m/s

Əlaqə

AZ RU EN

Ana səhifə / YAP xəbərləri / Naxçıvanın inkişafında yeni strateji mərhələ

Naxçıvanın inkişafında yeni strateji mərhələ

12.08.2026 [15:34]

Naxçıvana hər səfər Azərbaycanın dövlətçilik tarixində xüsusi əhəmiyyət daşıyan bu qədim diyarın gələcəyinə dair yeni baxışların ifadəsi ilə yadda qalır. Prezident İlham Əliyevin 11 avqust 2026-cı ildə Naxçıvana səfəri də regionun sosial-iqtisadi inkişafı, nəqliyyat imkanlarının genişləndirilməsi və qarşıda duran strateji hədəflər baxımından mühüm mesajlarla zəngin oldu. Dövlət başçısının Azərbaycan Televiziyasına müsahibəsində səsləndirdiyi fikirlər Naxçıvanın ölkənin ümumi inkişaf strategiyasında artan rolunu və qarşıdakı mərhələdə bu diyar üçün yeni imkanların formalaşdığını bir daha göstərdi.

Prezidentin diqqət çəkdiyi əsas məsələlərdən biri Naxçıvanın Azərbaycan iqtisadiyyatına daha sıx inteqrasiyası və onun malik olduğu böyük potensialdan səmərəli istifadə edilməsidir. Naxçıvanın coğrafi mövqeyi, enerji imkanları, nəqliyyat-logistika potensialı və tarixi əhəmiyyəti bu bölgəni Azərbaycanın gələcək inkişaf strategiyasında xüsusi mövqeyə çıxarır. Müsahibədə Naxçıvan, Qarabağ və Şərqi Zəngəzurun vahid inkişaf konsepsiyası əsasında inkişaf etdirilməsinin vacibliyi də diqqətə çatdırılıb. Bu yanaşma ölkənin müxtəlif bölgələri arasında iqtisadi və nəqliyyat əlaqələrinin daha da möhkəmləndirilməsi, yeni iqtisadi imkanların yaradılması və regionların inkişafının bir-birini tamamlaması baxımından mühüm əhəmiyyət daşıyır.

Naxçıvanın enerji potensialının artırılması da gələcək inkişafın əsas istiqamətlərindən biridir. Prezidentin sözlərindən aydın olur ki, qarşıdakı dövrdə Naxçıvan yalnız enerji tələbatını ödəyən region deyil, həm də enerji ixrac edən əraziyə çevrilə bilər. Azərbaycandan Naxçıvana Ermənistan ərazisindən elektrik xətlərinin çəkilməsi ilə bağlı layihənin hazırlanması isə regionda yeni əməkdaşlıq və inteqrasiya imkanlarının formalaşdığını göstərir.

Nəqliyyat məsələsi də xüsusi əhəmiyyət daşıyır. Zəngəzur dəhlizinin yaradılması ilə Naxçıvanın Azərbaycanın əsas hissəsi ilə daha əlverişli bağlantısının təmin olunması bölgənin iqtisadi və strateji əhəmiyyətini əhəmiyyətli dərəcədə artıracaq. Bu layihə yalnız nəqliyyat imkanlarının genişlənməsi deyil, həm də Naxçıvanın beynəlxalq tranzit marşrutlarında daha fəal iştirak etməsi deməkdir. Prezidentin müsahibəsində Horadiz–Ağbənd avtomobil yolunun tikintisinin demək olar ki, başa çatdığı da qeyd olunub.

Səfər çərçivəsində Naxçıvan şəhərinin 2044-cü ilədək inkişafına dair Baş Planla tanışlıq da gələcəyə hesablanmış böyük məqsədlərin göstəricisidir. Şəhərin müasir şəhərsalma prinsipləri əsasında inkişaf etdirilməsi, yeni yaşayış massivlərinin salınması, sosial infrastrukturun genişləndirilməsi və insanların rahatlığının təmin edilməsi qarşıdakı illərdə əsas prioritetlərdən olacaq. Eyni zamanda sosial evlər kompleksinin təməlinin qoyulması dövlət siyasətinin mərkəzində insan amilinin dayandığını bir daha nümayiş etdirir.

Naxçıvanın inkişafı yalnız yeni yolların, binaların və infrastruktur layihələrinin yaradılması ilə məhdudlaşmır. Bu qədim diyarın zəngin tarixi-mədəni irsinin qorunması da mühüm istiqamətdir. Möminə xatun türbəsində aparılan bərpa işləri və memar Əcəmi Naxçıvaninin abidəsinin açılması dövlətin tarixi irsə münasibətinin parlaq nümunəsidir. Müasirliklə tarixin vəhdəti Naxçıvanın gələcək simasının formalaşmasında mühüm rol oynayacaq.

Prezident İlham Əliyevin Naxçıvan səfəri və müsahibəsində səsləndirdiyi fikirlər bir daha göstərir ki, qarşıdakı illərdə bu qədim Azərbaycan torpağında böyük dəyişikliklər gözlənilir. Məqsəd Naxçıvanı müasir, güclü iqtisadiyyata malik, enerji və nəqliyyat imkanlarından səmərəli istifadə edən, yüksək sosial standartlara cavab verən və beynəlxalq əlaqələrdə daha fəal rol oynayan bir regiona çevirməkdir.

Bu gün Naxçıvan öz tarixinin yeni səhifəsini yazır. Bu səhifənin əsas sözləri isə inkişaf, tərəqqi, inteqrasiya, təhlükəsizlik və rifahdır. Əminliklə demək olar ki, qarşıdakı illərdə Naxçıvan Azərbaycanın ümumi inkişafında daha mühüm və fəal mövqeyə sahib olacaq.

YAP Samux rayon təşkilatının sədr müavini Sevinc Xəlilova

Paylaş:

Baxılıb: 302 dəfə