27 Sentyabr - Tarixi qələbənin əsası

Bakı:

24 °C

53 %

7 m/s

Əlaqə

AZ RU EN

Ana səhifə / YAP xəbərləri / 27 Sentyabr - Tarixi qələbənin əsası

27 Sentyabr - Tarixi qələbənin əsası

24.09.2026 [11:27]

27 sentyabr Azərbaycan xalqının müasir tarixində dönüş nöqtəsidir. Bu tarix təkcə kədər və hüzn günü deyil, həm də xalqımızın qürur, birlik və şərəf təcəssümüdür. 2020-ci ilin sentyabrın 27-də Ermənistan silahlı qüvvələrinin növbəti hərbi təxribatına cavab olaraq başlayan 44 günlük İkinci Qarabağ müharibəsi Azərbaycanın otuz ilə yaxın davam edən torpaq həsrətinə son qoydu. Azərbaycan Respublikasının Prezidenti İlham Əliyevin müvafiq Sərəncamı ilə bu günün "Anım Günü" kimi təsis edilməsi Vətən uğrunda canından keçən şəhidlərimizin əziz xatirəsinə göstərilən ali ehtiramın bariz nümunəsidir.

44 günlük Vətən müharibəsinin möhtəşəm Zəfərlə başa çatması bilavasitə Prezident, Müzəffər Ali Baş Komandan İlham Əliyevin qətiyyətli rəhbərliyi və strateji uzaqgörənliyinin nəticəsidir. İlham Əliyev hakimiyyətə gəldiyi ilk gündən bəri Azərbaycanın ərazi bütövlüyünün bərpa olunmasını dövlət siyasətinin ən birinci tapşırığı elan etmişdi. İllər boyu həyata keçirilən güclü iqtisadi siyasət, ordunun modernləşdirilməsi və beynəlxalq müstəvidə hüquqi baza yaradılması məhz 27 sentyabrda başlanan mübarizənin uğurla nəticələnməsinə zəmin yaratdı.

Müharibə dövründə Prezident İlham Əliyev yalnız hərbi cəbhədə deyil, həm də diplomatik və informasiya cəbhəsində böyük mübarizə apardı. Dünyanın aparıcı media qurumlarına verdiyi 30-dan çox müsahibədə Azərbaycanın haqlı mövqeyini faktlarla, beynəlxalq hüquq normalarına əsaslanaraq dünya ictimaiyyətinə çatdırdı. Onun qətiyyətli bəyanatları və xalqa müraciətləri bütün cəmiyyəti bir yumruq kimi birləşdirdi.

"Biz haqq yolundayıq. Bizim işimiz haqq işidir. Biz zəfər çalacağıq! Qarabağ bizimdir, Qarabağ Azərbaycandır!"

— İlham Əliyev

İlham Əliyev hər bir müraciətində xalqın iradəsini, ordunun gücünü və ədalətin bərpasını tərənnüm edirdi. Onun "Biz birlikdə güclüyük!" çağırışı müharibə günlərində hər bir Azərbaycan vətəndaşının əsas şüarına çevrildi.

27 sentyabr səhəri başlanan əks-hücum əməliyyatı qısa müddətdə düşmənin illərlə qurduğu mühəndis-istehkam xətlərini yararaq irəlilədi. Azərbaycan Əsgəri və Zabitinin göstərdiyi misilsiz şücaət dünya hərb tarixinə düşdü. Füzuli, Cəbrayıl, Zəngilan, Qubadlı, Hadrut, Sugovuşan və nəhayət, aşırılmaz qala hesab edilən Şuşanın azad olunması Azərbaycan Ordusunun nə dərəcədə yüksək peşəkarlığa və döyüş ruhuna malik olduğunu göstərdi.

Bu döyüşlərdə minlərlə gəncimiz Vətən torpaqlarının azadlığı uğrunda canından keçdi. Onlar şərəfli ölüm ilə əbədilik qazandılar. Anım Günü məhz həmin qəhrəmanların — Vətən üçün sinəsini sipər edən şəhidlərimizin ruhunu yad etmək günüdür. Bütün ölkə ərazisində saat 12:00-da bir dəqiqəlik sükutla şəhidlərin xatirəsi ehtiramla anılır, dövlət bayraqları endirilir.

44 günlük müharibə yalnız torpaqlarımızın azad edilməsi ilə bitmədi, həm də regionda yeni reallıqlar yaratdı. BMT Təhlükəsizlik Şurasının 30 ilə yaxın kağız üzərində qalan qətnamələrini Azərbaycan dövləti öz gücü ilə icra etdi. Prezident İlham Əliyevin rəhbərliyi ilə əldə olunan bu Zəfər Azərbaycanın regionda və dünyadakı nüfuzunu keyfiyyətcə yeni səviyyəyə qaldırdı.

Müharibə başa çatdıqdan dərhal sonra azad edilmiş torpaqlarda nəhəng bərpa və quruculuq işlərinə başlanıldı. İndi həmin torpaqlarda yeni yollar, aeroportlar tikilir, "Ağıllı kənd" və "Ağıllı şəhər" layihələri həyata keçirilir. Keçmiş məcburi köçkünlərin öz doğma yurdlarına qayıdışı olan "Böyük Qayıdış" proqramı uğurla davam edir.

"Biz tarixi ədaləti bərpa etdik. Biz şəhidlərimizin qisasını döyüş meydanında aldıq. Onların qanı yerdə qalmadı və heç vaxt qalmayacaq."

— İlham Əliyev

27 sentyabr Anım Günü hər bir azərbaycanlı üçün həm hüzn, həm də sonsuz qürur hissidir. Şəhidlərimizin qanı və canı bahasına qazanılan bu Qələbə əbədi olaraq tariximizə qızıl hərflərlə yazılmışdır. Azərbaycan xalqı Müzəffər Ali Baş Komandanın ətrafında sıx birləşərək öz gələcəyini, müstəqilliyini və ərazi bütövlüyünü hər zaman qorumağa hazırdır. Şəhidlərimizin əziz xatirəsi qəlbimizdə əbədi yaşayacaqdır!

Səltənət Möhsünlü

YAP Tərtər rayon təşkilatının məsləhətçisi

Paylaş:

Baxılıb: 224 dəfə