YAP Xaçmaz rayon təşkilatında Anım Günü ərəfəsində gənc könüllülərlə işgüzar görüş keçirilib

Bakı:

25 °C

65 %

3 m/s

AZ RU EN

Ana səhifə / YAP xəbərləri / YAP Xaçmaz rayon təşkilatında Anım Günü ərəfəsində gənc könüllülərlə işgüzar görüş keçirilib

YAP Xaçmaz rayon təşkilatında Anım Günü ərəfəsində gənc könüllülərlə işgüzar görüş keçirilib

24.09.2026 [22:23]

Yeni Azərbaycan Partiyası (YAP) Xaçmaz rayon təşkilatında 27 Sentyabr – Anım Günü ərəfəsində sosial media fəalları və gənc könüllülərlə işgüzar görüş keçirilib.

Tədbir əvvəlcə xalqımızın Ümummilli Lideri Heydər Əliyevin və Vətən uğrunda canından keçən qəhrəman şəhidlərimizin əziz xatirəsinin bir dəqiqəlik sükutla yad edilməsi ilə başlanıb.
Tədbiri giriş sözü ilə açan YAP Xaçmaz rayon təşkilatının sədri Emil Tağıyev yaxınlaşan Anım Gününün hər bir azərbaycanlı üçün müqəddəs və qürurverici tarix olduğunu vurğulayıb. Sədr qeyd edib ki, Müzəffər Ali Baş Komandan, Cənab Prezident İlham Əliyevin qətiyyətli siyasi iradəsi və dəmir yumruq kimi birləşən xalqımızın və ordumuzun gücü sayəsində əldə edilən tarixi Zəfər nəticəsində uzun illərin həsrətinə son qoyuldu. Vətən uğrunda canından keçən şəhidlərimizin əziz xatirəsi hər zaman hər bir azərbaycanlının qəlbində əbədi yaşayacaq, onların qəhrəmanlığı heç vaxt unudulmayacaq.
Emil Tağıyev çıxışında eyni zamanda dövlət başçısının rəhbərliyi ilə ölkəmizdə, o cümlədən azad edilmiş torpaqlarda və Xaçmaz rayonunda həyata keçirilən misilsiz quruculuq, abadlıq və sosial-iqtisadi layihələrə toxunub. O bildirib ki, Prezident İlham Əliyevin həyata keçirdiyi uzaqgörən siyasət nəticəsində Azərbaycan həm hərbi-siyasi sahədə, həm də iqtisadi müstəvidə böyük uğurlara imza atıb. Sosial media fəalları və gənclər bu reallıqları, görülən nəhəng işləri və dövlət başçımızın strateji xəttini geniş şəkildə təbliğ etməlidirlər. Anım Günü ərəfəsində rəqəmsal platformalarda həmrəylik nümayiş etdirmək, şəhidlərimizin ruhuna ehtiram göstərmək və ölkəmizə qarşı yönələn təxribat xarakterli dezinformasiyalara qarşı prinsipial mövqe sərgiləmək hər bir fəalın vətəndaşlıq borcudur.
Görüşdə çıxış edən YAP Xaçmaz rayon təşkilatının ideoloji işlər üzrə məsləhətçisi Teymurşah İşıqov sosial medianın bu gün real informasiya mübarizəsi meydanına çevrildiyini diqqətə çatdırıb. O qeyd edib ki, xüsusilə Anım Günü kimi həssas dövrlərdə informasiya təhlükəsizliyinin qorunması, milli maraqların müdafiə olunması və dövlət mövqeyinin qətiyyətlə dəstəklənməsi hər bir partiya fəalının əsas vəzifələrindəndir. Gənclərin milli ideologiya əsasında yetişdirilməsində və tariximizə sahib çıxılmasında sosial medianın rolu əvəzsizdir.
Tədbir zamanı digər fəal üzvlər və gənclər də çıxış edərək rəqəmsal məkanda aparılan təbliğat işləri barədə fikirlərini bölüşüblər. Müzakirələr zamanı sosial şəbəkələrdə operativliyin artırılması, yerlərdə görülən işlərin və qəhrəmanlarımızın xatirəsinin daha geniş işıqlandırılması istiqamətində təkliflər səsləndirilib, gəncləri maraqlandıran suallar cavablandırılıb.

Paylaş:

Baxılıb: 164 dəfə