Azərbaycan və Mərkəzi Asiya: strateji tərəfdaşlığın yeni mərhələsi

Bakı:

21 °C

94 %

3 m/s

Əlaqə

AZ RU EN

Ana səhifə / YAP xəbərləri / Azərbaycan və Mərkəzi Asiya: strateji tərəfdaşlığın yeni mərhələsi

Azərbaycan və Mərkəzi Asiya: strateji tərəfdaşlığın yeni mərhələsi

13.10.2026 [14:13]

Azərbaycanın Mərkəzi Asiya ölkələri ilə münasibətləri tarixi dostluq, qarşılıqlı etimad və ortaq maraqlar əsasında dinamik şəkildə inkişaf edir. Oktyabrın 8-də Türkmənbaşı şəhərində keçirilən Azərbaycan və Mərkəzi Asiya Dövlət Başçılarının 8-ci Məşvərət görüşü bu əməkdaşlığın genişləndiyini və yeni mərhələyə qədəm qoyduğunu bir daha nümayiş etdirdi.
Prezident İlham Əliyevin görüşdə iştirakı və çıxışı Azərbaycanın region ölkələri ilə siyasi, iqtisadi və strateji əlaqələrə verdiyi önəmi təsdiqləyir. Dövlət başçısı Azərbaycan-Türkmənistan münasibətlərinin son illərdə yüksələn xətlə inkişaf etdiyini, yüksək səviyyəli qarşılıqlı səfərlərin intensivləşdiyini vurğulayıb. Bu münasibətlər xalqlarımız arasında qardaşlıq və mənəvi yaxınlığın möhkəmlənməsinə xidmət edir.
Azərbaycanın azad edilmiş ərazilərinin bərpasında Mərkəzi Asiya dövlətlərinin dəstəyi xüsusi əhəmiyyət daşıyır. Türkmənistanın Füzulidə məscid inşa etməsi, Özbəkistanın Füzulidə Mirzə Uluqbəy adına məktəb, Qazaxıstanın Kurmanqazı adına Uşaq Yaradıcılıq Mərkəzi, Qırğızıstanın isə Ağdamda Manas adına məktəb tikməsi dostluq münasibətlərinin əməli təzahürüdür. Bu layihələr xalqlarımız arasında həmrəyliyi və qarşılıqlı dəstəyi daha da gücləndirir.
Azərbaycanın Mərkəzi Asiya Dövlət Başçılarının Məşvərət görüşü formatında tamhüquqlu iştirakçıya çevrilməsi regional əməkdaşlığın genişlənməsində mühüm mərhələdir. Əvvəllər “C5” kimi tanınan platformanın “C6” formatına yüksəlməsi Azərbaycanın artan beynəlxalq nüfuzunu, eləcə də Cənubi Qafqazla Mərkəzi Asiya arasında əlaqələrin dərinləşməsini göstərir.
Əməkdaşlığın əsas istiqamətlərindən biri nəqliyyat-logistika imkanlarının genişləndirilməsi və Orta dəhlizin səmərəliliyinin artırılmasıdır. Azərbaycanın Bakı Beynəlxalq Dəniz Ticarət Limanı, Bakı-Tbilisi-Qars dəmir yolu və müasir nəqliyyat infrastrukturu Şərqlə Qərb arasında yükdaşımaların inkişafına mühüm töhfə verir. Bu imkanların Mərkəzi Asiya ölkələrinin nəqliyyat şəbəkələri ilə əlaqələndirilməsi regionun beynəlxalq ticarətdə mövqeyini daha da gücləndirir.
İqtisadi əlaqələr də əməkdaşlığın mühüm tərkib hissəsidir. Prezident İlham Əliyevin qeyd etdiyi kimi, ötən il Azərbaycanın Mərkəzi Asiya ölkələri ilə ticarət dövriyyəsi 50 faizdən çox artıb. Hazırda ölkəmizdə Mərkəzi Asiya dövlətlərinin kapitalı ilə 400-dən çox şirkət fəaliyyət göstərir. Birgə investisiya fondları və yeni iqtisadi layihələr tərəfdaşlığın uzunmüddətli inkişafı üçün geniş imkanlar yaradır.
Azərbaycan və Mərkəzi Asiya Dövlət Başçılarının 9-cu Məşvərət görüşünün 2027-ci ildə ölkəmizdə keçirilməsi barədə qərar Azərbaycanın regional əməkdaşlıqdakı mövqeyinin və tərəfdaş dövlətlərlə qarşılıqlı etimadın göstəricisidir. Bu görüşün gələcəkdə nəqliyyat, enerji, ticarət və təhlükəsizlik sahələrində əməkdaşlığın daha da genişlənməsinə təkan verəcəyi gözlənilir.
Nəticə etibarilə, Azərbaycanla Mərkəzi Asiya dövlətləri arasında münasibətlər yalnız tarixi və mədəni yaxınlıqla məhdudlaşmır, həm də ortaq iqtisadi maraqlar və strateji məqsədlər üzərində möhkəmlənir. Qarşılıqlı səfərlər, birgə layihələr və çoxtərəfli əməkdaşlıq regionun sülh, sabitlik və inkişaf məkanına çevrilməsinə xidmət edir. Azərbaycanın bu prosesdə fəal iştirakı isə ölkəmizin beynəlxalq mövqeyini möhkəmləndirməklə yanaşı, Avrasiya məkanında yeni əməkdaşlıq imkanları yaradır.

Neva Abdurahmanova

YAP Qusar rayon təşkilatının sədr müavini

Paylaş:

Baxılıb: 17 dəfə