Ərazi bütövlüyü və suverenliyi bərpa edilmiş Azərbaycanın ilk Qurultayı

Bakı:

21 °C

94 %

3 m/s

Əlaqə

AZ RU EN

Ana səhifə / YAP xəbərləri / Ərazi bütövlüyü və suverenliyi bərpa edilmiş Azərbaycanın ilk Qurultayı

Ərazi bütövlüyü və suverenliyi bərpa edilmiş Azərbaycanın ilk Qurultayı

13.10.2026 [14:21]

Azərbaycan Respublikasının Prezidenti, Yeni Azərbaycan Partiyasının Sədri İlham Əliyevin partiyanın VIII Qurultayında səsləndirdiyi “İlk dəfədir ki, qurultayımız Azərbaycan öz ərazi bütövlüyünü və suverenliyini tam bərpa edəndən sonra keçirilir” fikri ölkəmizin müasir tarixində əldə etdiyi mühüm nailiyyətlərin mahiyyətini ifadə edir. Bu fikir Azərbaycanın uzun illər qarşısında duran əsas milli məqsədinə nail olduğunu və yeni inkişaf mərhələsinə qədəm qoyduğunu göstərir.

Azərbaycanın ərazi bütövlüyünün bərpası xalqımızın milli iradəsinin, dövlətimizin qətiyyətli siyasətinin və Ordumuzun gücünün nəticəsidir. 2020-ci ildə 44 günlük Vətən müharibəsində qazanılan tarixi Zəfər işğala son qoyulması istiqamətində həlledici mərhələ oldu. 2023-cü ilin sentyabrında həyata keçirilən antiterror tədbirləri nəticəsində isə ölkəmizin suverenliyi bütün ərazisində tam bərpa edildi. Bu hadisələr Azərbaycanın tarixində yeni səhifə açmaqla yanaşı, regionda yaranmış yeni reallıqları da müəyyənləşdirdi.

Əldə olunan qələbənin arxasında illərlə həyata keçirilən məqsədyönlü dövlət siyasəti, güclü iqtisadiyyatın formalaşdırılması, müdafiə qabiliyyətinin artırılması və xalqımızın milli həmrəyliyi dayanır. Azərbaycan öz milli maraqlarını qətiyyətlə qoruyaraq ərazi bütövlüyünü və suverenliyini təmin etdi. Şəhidlərimizin fədakarlığı, qazilərimizin qəhrəmanlığı və hərbçilərimizin şücaəti bu tarixi nailiyyətin mənəvi əsasını təşkil edir. Onların Vətən qarşısında xidmətləri daim ehtiramla yad edilməli, gələcək nəsillərə nümunə göstərilməlidir.

Prezident İlham Əliyevin çıxışında vurğulanan tarixi məqam yalnız keçmiş uğurların qiymətləndirilməsi baxımından deyil, qarşıda duran vəzifələrin müəyyənləşdirilməsi baxımından da əhəmiyyətlidir. Bu gün əsas məqsəd əldə edilmiş nailiyyətləri qorumaq, ölkəmizin müdafiə gücünü və iqtisadi potensialını daha da artırmaq, işğaldan azad edilmiş ərazilərdə quruculuq işlərini davam etdirmək və Böyük Qayıdış prosesini uğurla həyata keçirməkdir. Doğma yurdlarına qayıdan insanların təhlükəsiz və firavan yaşayışının təmin olunması dövlət siyasətinin mühüm istiqamətlərindəndir.

Yeni tarixi mərhələdə gənc nəslin vətənpərvərlik ruhunda tərbiyəsi də xüsusi əhəmiyyət daşıyır. Gənclərimiz Azərbaycanın keçdiyi tarixi yolu, müstəqilliyimizin və suverenliyimizin hansı fədakarlıqlar hesabına qorunduğunu dərindən bilməlidirlər. Təhsilə, elmə, idmana və innovasiyalara marağın artırılması, gənclərin ictimai həyatda fəallığının dəstəklənməsi ölkəmizin gələcək inkişafına xidmət edir. Çünki güclü dövlətin təməlində yalnız iqtisadi və hərbi potensial deyil, eyni zamanda, savadlı, məsuliyyətli və milli dəyərlərə bağlı vətəndaşlar dayanır.

Azərbaycanın ərazi bütövlüyünü və suverenliyini tam bərpa etməsi xalqımızın tarixi qürur mənbəyi olmaqla yanaşı, gələcək nəsillər qarşısında mühüm məsuliyyət yaradır. Bu məsuliyyət müstəqilliyimizin möhkəmləndirilməsi, milli birliyin qorunması və ölkəmizin davamlı inkişafına töhfə verilməsi ilə bağlıdır. Prezident İlham Əliyevin səsləndirdiyi fikir məhz bu reallığı bir daha diqqətə çatdırır: Azərbaycan öz tarixi məqsədlərinə nail olaraq yeni inkişaf mərhələsinə qədəm qoyub. Qarşıda duran əsas vəzifə qazanılmış Zəfəri dayanıqlı tərəqqiyə çevirmək və daha güclü Azərbaycan naminə ardıcıl fəaliyyət göstərmək.

YAP Naftalan şəhər təşkilatının fəalı, Vətən müharibəsi veteranı İsa İsayev

Paylaş:

Baxılıb: 24 dəfə