YAP Yasamal rayon təşkilatı Gənclər Birliyinin IV konfransı keçirilib

Bakı:

23 °C

83 %

4 m/s

Əlaqə

AZ RU EN

Ana səhifə / YAP xəbərləri / YAP Yasamal rayon təşkilatı Gənclər Birliyinin IV konfransı keçirilib

YAP Yasamal rayon təşkilatı Gənclər Birliyinin IV konfransı keçirilib

19.02.2015 [12:39]

Dünən Yeni Azərbaycan Partiyası (YAP) Yasamal rayon təşkilatı Gənclər Birliyinin IV konfransı keçirilib. Konfransı giriş sözü ilə açan YAP Yasamal rayon təşkilatının sədri, partiyanın Siyasi Şurasının üzvü Fikrət İsmayılov partiyanın keçdiyi inkişaf yolundan danışaraq bildirib ki, YAP-ın yaranması Azərbaycanın ən çətin siyasi dönəminə təsadüf edib. O, partiyanın yaradılmasının Azərbaycanın dövlətçilik tarixində mühüm əhəmiyyətə malik hadisə olduğunu qeyd edib. F.İsmayılov deyib ki, Ulu öndər Heydər Əliyevin qurucusu olduğu Yeni Azərbaycan Partiyası bu gün ölkənin ən güclü siyasi qüvvəsidir.
F.İsmayılov dövlət gənclər siyasəti sahəsində fikirlərini bildirərək deyib ki, gəncliyin inkişafı üçün bütün imkanlar yaradılıb. O qeyd edib ki, ölkəmizdə gənclərə göstərilən hərtərəfli qayğı onların siyasi mövqelərinin düzgün formalaşmasında mühüm rol oynayır. Gənclərin hər zaman diqqət mərkəzində saxlanıldığını deyən rayon təşkilatının sədri qeyd edib ki, ölkənin, xalqın inkişafı və gələcəyi gənclər ilə əlaqədardır.
Daha sonra YAP Yasamal rayon təşkilatı Gənclər Birliyinin sədri Bəxtiyar Nəbiyev hesabat məruzəsi ilə çıxış edib. O bildirib ki, 1992-ci ildə bir qrup vətənpərvər şəxs həyatı üçün yarana biləcək təhlükədən qorxmayaraq Naxçıvanda Ulu öndər Heydər Əliyevin rəhbərliyi ilə Yeni Azərbaycan Partiyasını yaratdılar: “YAP o vaxtkı mövcud vəziyyətdə Azərbaycan xalqının mənafelərinə xidmət etmək və ölkəmizin qarşısında duran məsələləri həll etmək üçün zamanın tələblərinə uyğun olaraq zərurətdən yaranan partiyadır. Partiyamız qısa zaman ərzində xalqın etimadını qazanaraq böyük siyasi qüvvəyə çevrilib. Bu gün YAP Azərbaycanın siyasi təşkilatları içərisində öz kəmiyyət və keyfiyyətinə görə bərabəri olmayan partiyadır”.
B.Nəbiyev bildirib ki, hesabat dövründə təşkilatda gənclərin sayı 10002-dən 12074 nəfərə qədər artıb. Yəni, III konfransdan keçən müddət ərzində təşkilatın sıralarına qoşulan gənclərin sayı 2072 nəfərdir. O, hesabat dövründə YAP Yasamal rayon təşkilatı Gənclər Birliyinin gördüyü işlər haqqında geniş məlumat verib.
Konfransda çıxış edən YAP Gənclər Birliyinin sədri, partiyanın Siyasi Şurasının üzvü Seymur Orucov ölkəmizdə uğurlu gənclər siyasətinin həyata keçirildiyini bildirib. YAP-ın gəncliyin inkişafına hər zaman dəstək verdiyini deyən S.Orucov Azərbaycan gənclərinin Prezident İlham Əliyevin ətrafında sıx birləşdiyini vurğulayıb.
Tədbirdə YAP Yasamal rayon təşkilatı Gənclər Birliyinin sədr müavini Elməddin Əmirov, fəal gənclərdən Yavər Məmmədova, Mədinə Əliyeva və Nərgiz Bəşirova çıxış ediblər.
Konfransda YAP İdarə Heyətinin üzvü, Milli Məclisin deputatı, BDU-nun rektoru, akademik Abel Məhərrəmov çıxış edərək vurğulayıb ki, əsası Ümummilli lider Heydər Əliyev tərəfindən qoyulan gənclər siyasəti Prezident İlham Əliyev tərəfindən uğurla davam etdirilir. Onun sözlərinə görə, respublikamızda intellektual potensialın yaradılması Ulu öndərin uzaqgörən siyasətinin nəticəsidir. A.Məhərrəmov YAP sıralarında birləşən gənclərin yüksək intellektə sahib olduğunu vurğulayıb. O, çıxışında gənclərə yüksək təhsil, bilik əldə etməklə daim dövlətin inkişafına töhfələr verməyi tövsiyə edib.
Sonda təşkilati məsələlərə baxılıb və Bəxtiyar Nəbiyev yenidən YAP Yasamal rayon təşkilatı Gənclər Birliyinin sədri seçilib. Eyni zamanda, rayon təşkilatının Gənclər Birliyinin 55 nəfərlik şurası, 25 nəfərlik idarə heyəti müəyyənləşib. Həmçinin, YAP Gənclər Birliyinin qarşıdan gələn konfransına nümayəndələr seçilib.
Nardar BAYRAMLI

Paylaş:

Baxılıb: 1205 dəfə