Yeni Azərbaycan Partiyası Naxçıvan şəhər təşkilatının şura iclası keçirilib

Bakı:

16 °C

63 %

3 m/s

Əlaqə

AZ RU EN

Ana səhifə / YAP xəbərləri / Yeni Azərbaycan Partiyası Naxçıvan şəhər təşkilatının şura iclası keçirilib

Yeni Azərbaycan Partiyası Naxçıvan şəhər təşkilatının şura iclası keçirilib

05.02.2016 [09:40]

Yeni Azərbaycan Partiyası (YAP) Naxçıvan şəhər təşkilatı şurasının fevralın 4-də keçirilmiş iclasında təşkilatın 2015-ci ildəki fəaliyyətindən və qarşıda duran vəzifələrdən geniş söhbət açılıb.
AZƏRTAC xəbər verir ki, tədbiri Yeni Azərbaycan Partiyası Naxçıvan şəhər təşkilatının sədri, Naxçıvan Muxtar Respublikası Ali Məclisinin deputatı Elman Cəfərli açaraq, hesabat məruzəsi ilə çıxış edib.
Qeyd olunub ki, ötən il YAP Naxçıvan şəhər təşkilatında 4 şura yığıncağı, İdarə Heyətinin 12 iclası olub. 2015-ci ildə təşkilatın fəaliyyətində YAP-ın V Qurultayının və YAP Naxçıvan Muxtar Respublika təşkilatının V konfransının qərarları müzakirə edilib. Bundan başqa il ərzində 13 siyasi-ideoloji tədbir keçirilib ki, bunların 10-u elmi-praktik konfrans olub.
Vurğulanıb ki, partiya təşkilatı ötən il noyabrın 1-də Azərbaycan Respublikasının Milli Məclisinə və Naxçıvan Muxtar Respublikasının Ali Məclisinə keçirilmiş seçkilərdə fəal iştirak edib, üzvlərdən 2-si Milli Məclisə, 21 nəfəri isə Ali Məclisə deputat seçilib.
Bildirilib ki, təşkilatda partiya sıralarının genişləndirilməsi üçün məqsədyönlü tədbirlər həyata keçirilib. Partiya sıralarına qəbul olunacaq yeni üzvlərin siyasi hazırlıq səviyyəsi xüsusilə yoxlanılıb. 2015-ci ildə müxtəlif ilk təşkilatlardan partiyaya qəbul olunmaq üçün müraciət edən 469 nəfərdən 336 nəfər partiyaya üzv qəbul olunub, 133 nəfərin siyasi hazırlıq səviyyəsi qaneedici olmadığından onların partiyaya üzvlüyünə qəbulundan imtina edilib. Yeni qəbul olunan üzvlərin 328 nəfəri gənclər, 196 nəfəri qadınlardır. Ümumiyyətlə, hazırda partiyanın şəhər təşkilatı 187 ərazi ilk təşkilatında öz sıralarında 15 min 767 nəfəri birləşdirir ki, bundan da 8 min 790 nəfərini gənclər, 8 min 164 nəfərini qadınlar təşkil edir. YAP Naxçıvan Şəhər Təşkilatının Heydər Əliyev adına Gənclər Birliyi və Qadınlar Şurası ötən il fəaliyyətlərini uğurla quraraq təşkilatın ümumi fəaliyyətində fəallıq göstəriblər.
“Yeni Azərbaycan Partiyası Naxçıvan Muxtar Respublika təşkilatı İdarə Heyətinin bu il yanvarın 28-də keçirilən iclasında Naxçıvan Muxtar Respublikası Ali Məclisinin Sədri, Yeni Azərbaycan Partiyası Naxçıvan Muxtar Respublika təşkilatının Sədri Vasif Talıbov partiyanın rayon və şəhər təşkilatları qarşısında mühüm vəzifələr qoyub və 2016-cı ili muxtar respublikamızda “Nizam-intizamın daha da möhkəmləndirilməsi ili” elan edib”, - deyən Elman Cəfərli vurğulayıb ki, YAP Naxçıvan Şəhər Təşkilatının cari ildəki fəaliyyətində həmin vəzifələrin həyata keçirilməsi prioritet olacaq, təşkilatın bütün rəhbər strukturları və üzvləri öz işlərini günün tələbləri səviyyəsində quracaq, ölkəmizin inkişafı, xalqımızın rifahı naminə həyata keçirilən dövlət siyasətini daim dəstəkləyəcəklər.
Şura iclasında YAP Naxçıvan şəhər təşkilatı qadınlar şurasının sədri, Naxçıvan Muxtar Respublikası Ali Məclisinin deputatı Yazgül Rzayeva, YAP Naxçıvan şəhər təşkilatının şura üzvü, Naxçıvan Muxtar Respublikası Ali Məclisinin deputatı, AMEA-nın müxbir üzvü Fəxrəddin Səfərli, YAP Naxçıvan şəhər təşkilatının sədr müavini Ramil Orucəliyev çıxış ediblər.
Sonra təşkilatın 2016-cı il üçün iş planına yenidən baxılması, partiyaya üzvlərin qəbulu prosesinin daha səmərəli aparılması, siyasi hazırlığın yoxlanılması üçün işçi qrupun yaradılması və yeni üzvlərin qəbulu ilə bağlı məsələlərə baxılıb. Qeyd olunan məsələlərlə əlaqədar qərarlar qəbul edilib.

Paylaş:

Baxılıb: 1020 dəfə