YAP Qusar rayon təşkilatının X hesabat konfransı keçirilib

Bakı:

10 °C

93 %

0 m/s

Əlaqə

AZ RU EN

Ana səhifə / YAP xəbərləri / YAP Qusar rayon təşkilatının X hesabat konfransı keçirilib

YAP Qusar rayon təşkilatının X hesabat konfransı keçirilib

09.09.2021 [09:02]

Sentyabrın 8-də Yeni Azərbaycan Partiyası (YAP) Qusar rayon təşkilatının videoformatda X hesabat konfransı keçirilib.
Əvvəlcə müstəqil Azərbaycan dövlətinin memarı, Yeni Azərbaycan Partiyasının yaradıcısı, Ulu Öndər Heydər Əliyevin və torpaqlarımızın azadlığı uğrunda şəhidlik zirvəsinə ucalan Vətən oğullarının əziz xatirəsi bir dəqiqəlik sükutla yad edilib.
Konfransın gündəliyi təsdiqləndikdən sonra YAP Qusar rayon təşkilatının sədri David İbramxəlilovun hesabat məruzəsi dinlənilib. Bildirib ki, Yeni Azərbaycan Partiyası etimadın və siyası həmrəyliyin ünvanıdır. YAP Azərbaycanın alternativsiz siyasi gücünə, Cənubi Qafqazın ən böyük siyasi təşkilatına çevrilib. Partiyamız yarandığı gündən müstəqilliyimizin qorunması, dövlətçiliyimizin möhkəmləndirilməsi, iqtisadiyyatının inkişaf etdirilməsi, demokratik təsisatların bərqərar olunması istiqamətində səylər göstərib və buna nail olub.
D.İbramxəlilov qeyd edib ki, hazırda YAP Qusar rayon təşkilatı 100 ərazi ilk partiya təşkilatında 6409 üzvü birləşdirir. Hesabat dövründə partiya sıralarına 584 nəfər yeni üzv qəbul olunub. Partiya üzvlərinin 3102 nəfəri gənc, 2879 nəfəri isə qadındır.
Sonra YAP Qusar rayon təşkilatının Nəzarət Təftiş Qrupunun sədri İkram Tumarxanov hesabat məruzəsi ilə çıxış edib.
Müzakirələr zamanı çıxış edən YAP Qusar rayon təşkilatı İdarə Heyətinin üzvü, Qusar Rayon İcra Hakimiyyətinin başçısı Şair Alxasov, Yeni Azərbaycan Partiyasının İdarə Heyətinin üzvü, Milli Məclisin deputatı Azər Badamov, rayon təşkilatı İdarə Heyətinin üzvü, Qusar rayon Heydər Əliyev Mərkəzinin direktoru Neva Abduraxmanova, rayon təşkilatının sədr müavini, rayon Gigiyena və Epidemiologiya mərkəzinin direktoru Nadirşah Şirinov, təşkilatın Gənclər Birliyinin sədr müavini Ayaz Abdullayev hesabat dövründə görülən işlərdən bəhs ediblər.
Konfransda çıxış edən YAP Mərkəzi Aparatının Təşkilat şöbəsinin müdiri Əhliman Tağıyev bildirib ki, ölkəmiz yeni hədəflərə doğru inamla irəliləyir: “Prezident İlham Əliyevin 2018-ci ildə keçirilən andiçmə mərasimindəki nitqində qarşıya qoyduğu vəzifələr, müəyyənləşdirdiyi inkişaf prioritetləri uğurla həyata keçirilir. Bu baxımdan son 3 il islahatlar konsepsiyasının reallaşması, cəmiyyət həyatına gətirdiyi yeniliklər baxımından olduqca əlamətdardır. Bu illərin ən mühüm hadisəsi, uğuru torpaqlarımızın işğaldan azad edilməsi, Azərbaycanın ərazi bütövlüyünün bərpası oldu. 2018-ci il andiçmə mərasimində Aprel döyüşlərinə diqqət yönəldən dövlət başçısı bildirmişdir ki, hərbi qələbəmiz Azərbaycan xalqının gücünün, yenilməz ruhunun, işğalla heç vaxt barışmayacağının, torpaqlarımızı azad edəcəyimizin təsdiqidir. Məhz ölkə Prezidentinin həyata keçirdiyi siyasət, bütün istiqamətlərdə görülən kompleks tədbirlər 44 günlük Vətən müharibəsində tarixi Qələbəmizlə nəticələndi. Qarşıdakı illərdə xalqımızı cənab İlham Əliyevin rəhbərliyi ilə yeni zəfərlər və uğurlar gözləyir”.
Zəfərimizin yaratdığı reallıqların Yeni Azərbaycan Partiyasının qarşısına qoyduğu vəzifələrdən bəhs edən Ə.Tağıyev YAP Qusar rayon təşkilatına gələcək fəaliyyətində uğurlar arzulayıb.
Konfransda YAP Qusar rayon təşkilatının hesabat dövrü ərzindəki fəaliyyəti qənaətbəxş qiymətləndirilib.

Paylaş:

Baxılıb: 531 dəfə