Əməkdaşlıq münasibətlərinə yeni müsbət dinamika əlavə edilir

Bakı:

22 °C

56 %

6 m/s

Əlaqə

AZ RU EN

Ana səhifə / YAP xəbərləri / Əməkdaşlıq münasibətlərinə yeni müsbət dinamika əlavə edilir

Əməkdaşlıq münasibətlərinə yeni müsbət dinamika əlavə edilir

30.05.2023 [16:51]

Etibar Hacıyev

YAP Ağstafa rayon təşkilatının sədri

Dövlətimizin xarici siyasətinin əsas istiqamətlərindən biri ikitərəfli əlaqələrin yeni prioritetlər üzrə inkişaf etdirilməsidir. Azərbaycanın bu sahədə qazandığı uğurlar göz önündədir. Təkcə son zamanlar Prezident İlham Əliyevin xarici ölkələrə davamlı səfərlərinə diqqət yetirmək kifayətdir. Qarşılıqlı səfərlər münasibətlərin inkişafında əhəmiyyətli rol oynayır. Dövlət başçısı İlham Əliyevin mayın 21-22 tarixlərində Litvaya rəsmi səfəri bu gün də geniş müzakirə edilməkdədir. Səfər çərçivəsində hər iki ölkənin Prezidentlərinin iştirakı ilə biznes forumun keçirilməsi, müxtəlif sahələr üzrə sənədlərin imzalanması əlaqələrin inkişafında yeni mərhələnin başlandığını təsdiqləyir.

Azərbaycanla Litva arasında siyasi, iqtisadi-ticari, turizm, mədəniyyət, təhsil sahəsində əməkdaşlıq əlaqələri dinamik olaraq inkişaf etməkdədir. İkitərəfli münasibətlərin inkişafı üçün möhkəm hüquqi baza yaradılıb.

Qeyd edək ki, Litva Azərbaycanın müstəqilliyini tanıyan ilk ölkələrdən biridir. İki ölkə arasında diplomatik münasibətlər 1995-ci ildə qurulub. 2007-ci ilin aprelində Litvanın Azərbaycanda, həmin ilin sentyabrında isə ölkəmizin Litvada səfirliyi açılıb.

Azərbaycan və Litva strateji tərəfdaşlardır. İki ölkə arasında indiyədək 41 sənəd imzalanıb. Həmin sənədlər arasında 2007-ci ildə Vilnüsdə imzalanmış “Azərbaycan Respublikası Prezidentinin və Litva Respublikası Prezidentinin Tərəfdaşlıq münasibətlərinin inkişafı haqqında Birgə Bəyannamə” xüsusi yer tutur. Azərbaycan, eyni zamanda, Litva üçün Avropa İttifaqının “Şərq tərəfdaşlığı” proqramı çərçivəsində çox önəmli ölkə, həmçinin bütün İttifaq üçün strateji enerji tərəfdaşıdır.

Litva Azərbaycan-Avropa İttifaqı əməkdaşlığının təşviqinə fəal töhfə verən ölkələrdən biridir. Azərbaycanın Avropa İttifaqı üçün önəminin daha bir nümunəsi qurumun 9 üzv ölkəsi ilə artıq strateji tərəfdaşlıq haqqında bəyannamə imzalamasıdır. Bu, üzv dövlətlərin üçdəbiri deməkdir.

Azərbaycan Avropa İttifaqının Tvinninq proqramı üzrə Litvanın ən yaxın tərəfdaşlarından biridir. 2007-2022-ci illərdə Litva Azərbaycanda keçirilən 26 layihə seçimində iştirak edib və onlardan 17-sində qalib gəlib. Azərbaycan və Litva Prezidentləri mətbuata birgə bəyanatlarında bu kimi məqamlara xüsusi diqqət yönəldərək belə bir əminliyi ifadə etdilər ki, əlaqələrin gələcəkdə daha da möhkəmlənməsi üçün geniş imkanlar vardır. Litva Prezidenti Gitanas Nauseda bildirdi ki, ölkəsi Azərbaycan ilə Ermənistan arasında münasibətlərin normallaşdırılmasının tərəfdarıdır, Avropa İttifaqı və Transatlantik müttəfiqlərimizin bu istiqamətdə səylərini dəstəkləyir. Belə bir əminliyi də ifadə etdi ki, ölkələrimiz və xalqlarımız arasında dostluq bağları bizi gələcək illər üçün daha da də birləşdirəcək. Prezidentlərin mətbuata birgə bəyanatlarında dövlət başçısı İlham Əliyev regionumuzda mövcud vəziyyət, Azərbaycanın sülh və əməkdaşlıq təşəbbüsləri haqqında da fikirlərini bildirdi. Qeyd etdi ki, Azərbaycan Cənubi Qafqazı sülh və əməkdaşlıq məkanı kimi görmək istəyir. İkinci Qarabağ müharibəsindən sonra yeni əməkdaşlıq formatlarının formalaşması üçün yeni imkanlar yaranıb. Təəssüf ki, Ermənistan indiyə qədər Cənubi Qafqazda sülhün və əməkdaşlığın qurulmasında maraqlı görünmür. Cənubi Qafqaz üçün sülhə, təhlükəsizliyə və sabitliyə sadiqlik nümayiş etdirməyin vaxtıdır. Ölkə Prezidentinin vurğuladığı kimi, sülh anlaşmasının imzalanması qaçılmazdır və çalışırıq ki, öz tərəfimizdən bu məqsədə çatmaq üçün konstruktiv səylər göstərək. Təbii ki, bu sülh anlaşması beynəlxalq norma və prinsipləri əhatə etməlidir.

Paylaş:

Baxılıb: 504 dəfə