Türkiyə - Azərbaycan münasibətlərində yeni mərhələ

Bakı:

31 °C

46 %

3 m/s

Əlaqə

AZ RU EN

Ana səhifə / YAP xəbərləri / Türkiyə - Azərbaycan münasibətlərində yeni mərhələ

Türkiyə - Azərbaycan münasibətlərində yeni mərhələ

19.06.2023 [10:35]

Türkiyə Respublikasında keçirilən Prezident seçildikdən sonra Prezident Rəcəb Tayyib Ərdoğan xaricə ilk səfərini Şimali Kipr Türk Respublikasına və Azərbaycana etdi. Azərbaycan və Türkiyə iki qardaş, dost, müttəfiq ölkədir. Bu qardaşlıq-dostluq bütün dünya dövlətlərinə nümunədir. Türkiyə Prezidentinin Azərbaycana səfəri, səfər çərçivəsində keçirilən görüşlər, təmaslar iki qardaş ölkə arasında münasibətlərin daha da inkişaf və yüksəlişinə əhəmiyyətli dərəcədə töhfə verəcəkdir.

Məlum olduğu kimi, iyunun 13-də Azərbaycan Respublikasının Prezidenti İlham Əliyev və Türkiyə Respublikasının Prezidenti Rəcəb Tayyib Ərdoğan mətbuata bəyanatla çıxış ediblər.

Prezident İlham Əliyev mətbuata bəyanatla çıxışı zamanı seçkilərdə Rəcəb Tayyib Ərdoğanın qələbəsini 20 ildən çox müddət ərzində apardığı siyasətin Türkiyə xalqı tərəfindən yüksək qiymətləndirilməsinin təzahürü olduğunu, onun liderliyilə qardaş Türkiyə böyük və şərəfli yol keçdiyini, dünya çapında böyük güc mərkəzinə çevrildiyini vurğuladı. İstər xarici siyasət sahəsində, istər daxili siyasət sahəsində Rəcəb Tayyib Ərdoğanın fəaliyyəti Türkiyə xalqı tərəfindən yüksək qiymətləndirildiyini söyləyən Dövlətimizin başçısı Rəcəb Tayyib Ərdoğanın qələbəsi Azərbaycan xalqını da çox mutlu etdiyini bildirdi.

Prezident cənab İlham Əliyev Türkiyə Prezidentinin bu səfərinin də uğurlu olacağına əminliyini ifadə edərək Azərbaycan-Türkiyə dostluq və qardaşlığını bundan sonra da yüksək səviyyədə davam edəcəyini qəti şəkildə bəyan etdi.

Prezident İlham Əliyev bütün çıxışında xüsusi olaraq qardaş Türkiyənin Vətən müharibəsi başlandığı andan sonadək ölkəmizə mənəvi və siyasi dəstəyini əsirgəmədiyini, bu dəstəyin Azərbaycana əlavə güc verdiyini vurğuladı.

Prezident İlham Əliyev müttəfiqliyin ən yüksək zirvəsini fəth edən Şuşa Bəyannaməsinə də toxundu. İki gündən sonra biz Şuşa Bəyannaməsinin ikinci ildönümünü qeyd edəcəyik deyən Dövlətimizin başçısı Şuşa Bəyannaməsinin tarixi anlaşma olduğunu, bu anlaşma nəticəsində Türkiyə və Azərbaycan rəsmən müttəfiq olduğunu bildirdi.

Faktiki olaraq, Azərbaycan və Türkiyə uzun illər müttəfiqlər kimi fəaliyyət göstərirdi, ancaq Şuşa Bəyannaməsi bunu rəsmiləşdirdi, deyən Prezident cənab İlham Əliyev bildirdi ki, bu sənədin Şuşada imzalanması rəmzi xarakter daşıyır.

Qarabağın tacı, bütün Türk dünyasının mədəniyyət mərkəzi olan Şuşanın işğaldan azad olunması 27 sentyabr 2020-ci ildə başlamış və cəmi 44 gün davam edən İkinci Qarabağ müharibəsinə son nöqtəni qoymuşdur.

Dövlətimizin başçısı çıxışında Azərbaycan xalqı adından Rəcəb Tayyib Ərdoğana və qardaş Türkiyə xalqına İkinci Qarabağ savaşı dönəmində Azərbaycana göstərilən qardaşlıq dəstəyinə, mənəvi və siyasi dəstəyə görə bir daha təşəkkürünü bildirdi.

Prezident İlham Əliyev verdiyi bəyanatda Türkiyədə keçirilmiş seçkilərdən sonra Türkiyə - Azərbaycan arasında mövcud olan dostluq, qardaşlıq əlaqələrinin qarşısında yeni imkanlar, yeni üfüqlər açıldığını vurğuladı.

Çıxışında Zəngəzur dəhlizinin açılması məsələsinə də toxunan Dövlətimizin başçısı dəhlizin açılmasının qaçılmaz olduğunu, dəhlizin açılması bütün ölkələr üçün yeni imkanlar açacağını və bölgədə işbirliyi məsələlərinə də müsbət təsir göstərəcəyini bildirdi.

Ulu öndər Heydər Əliyevin də dediyi kimi, Türkiyə və Azərbaycan “Bir millət, iki dövlət”dir və Prezident İlham Əliyevin əlavə etdiyi kimi artıq bir yumruq, bir ürək, bir candır.

Türkiyə Prezidenti Rəcəb Tayyib Ərdoğan çıxışında qardaş ölkənin Şuşada baş konsulluğunun açılması məsələsinə də toxunaraq bunun başda Ermənistan olmaqla, bütün dünyaya bir mesaj kimi diqqətə çatdırdı.

Beləliklə, Türkiyə Prezidenti Rəcəb Tayyib Ərdoğanın Azərbaycana səfəri iki qardaş ölkə arasındakı müttəfiqlik, dostluq münasibətlərində yeni mərhələnin başlanğıcı oldu. İki ölkənin dövlət başçılarının keçirdiyi görüşlər, verdikləri bəyanatlar və gələcəyə dair planlaşdırılan iqtisadi layihələr onu göstərir ki, Türkiyə - Azərbaycan əlaqələri uğurla inkişaf etdirilir.

Sahib Şükürov

Yeni Azərbaycan Partiyası Göyçay rayon təşkilatının sədri

Paylaş:

Baxılıb: 617 dəfə