Pirallahıda ağacəkmə aksiyası və iməcilik təşkil olunub

Bakı:

11 °C

66 %

4 m/s

Əlaqə

AZ RU EN

Ana səhifə / Xəbər lenti / Pirallahıda ağacəkmə aksiyası və iməcilik təşkil olunub

Pirallahıda ağacəkmə aksiyası və iməcilik təşkil olunub

28.10.2024 [14:59]

Ölkəmizdə ətraf mühitin qorunması davamlı inkişaf üçün mühüm əhəmiyyət kəsb edir. Ekosistemlərin qorunması, su və torpaq resurslarının mühafizəsi, hava çirklənməsinin azaldılması bu istiqamətdə atılan addımlardan biridir. Bildiyiniz kimi, Prezident İlham Əliyevin 25 dekabr 2023-cü il tarixli Sərəncamına əsasən 2024-cü il “Yaşıl Dünya Naminə Həmrəylik İli” elan olunmuşdur. Sözügedən Sərəncam əsasında təsdiq olunmuş tədbirlər planına uyğun olaraq bütün respublikada olduğu kimi, rayonumuzda da silsilə tədbirlər həyata keçirilir. Oktyabrın 18-dən etibarən Respublikamızın bütün bölgələrində olduğu kimi, Pirallahı rayonunda da agacəkmə aksiyalarına start verildi. Ölkəmizin bütün bölgələrini əhatə edən və 10 gün ərzində keçirilməsi nəzərdə tutulan aksiya zamanı rayomunuzda 18 mindən çox ağac və kollar əkiləcək.

26 oktyabr 2024-cü il tarixində Pirallahı rayonunda "Yaşıl dünya naminə həmrəylik İli" çərçivəsində Bakı Şəhər İcra Hakimiyyətinin təşkilatçılığı ilə genişmiqyaslı ağacəkmə aksiyası və iməcilik təşkil olunmuşdur. Aksiyada Pirallahı Rayon İcra Hakimiyyətinin başçısı Vasif İmanov, Bakı Şəhər İcra Hakimiyyətinin və RİH-nin məsul əməkdaşları, rayonun idarə, müəssisə və xidmət sahələrinin kollektivləri iştirak etdilər. Aksiya zamanı Pirallahı rayonunda əsas magistral yolunun kənarındakı boş ərazidə ümumilikdə 5000-ə yaxın ağac əkilmişdir. Rayonumuzda keçirilən genişmiqyaslı iməcilikdə idarə, müəssisə və təşkilatların, təhsil, səhiyyə müəssisələrinin və sahibkarlıq subyektlərinin nümayəndələri iştirak etmişdir. İməcilik zamanı parklar və istirahət guşələrində, səki kənarlarının, bordür və işıq dirəklərinin, məhəccərlərin, köşk və dayanacaqların, məişət tullantılarının atıldığı konteyner və meydançalarının ətrafının, həmçinin küçələrin xüsusi texnika ilə yuyulması, eləcədə digər təmizlik və dezinfeksiya işləri görülmüşdür. Eyni zamanda ərazidə mövcud olan qazon örtüyünün və ağacların suvarılması, quru ağacların götürülməsi, ətraf mühit və insan sağlamlığı üçün zərərli olan müxtəlif məişət və polietilen tullantılarından təmizlənməsi işləri həyata keçirilmişdir. Toplanan məişət tullantıları müvafiq olaraq daşınmışdır.

Qeyd edək ki, ölkə başçısının qərarın Pirallahı rayonu ərazisində yüksək səviyyədə icrasını təmin etmək məqsədilə 1 mart 2024-cü il tarixində Rayon İcra Hakimiyyəti başçısı tərəfindən müvafiq Sərəncam və Tədbirlər Planı təsdiq olunmuşdur. Tədbirlər Planına əsasən, ilin əvvəlindən bir çox maarifləndirici tədbirlər, dəyirmi masalar və konfranslar, yaşıllaşdırma, ağacəkmə və iməcilik aksiyaları həyata keçirilmişdir. Həmçinin bərk məişət tullantılarının idarə olunması, utilizasiyası və zərərləşdirilməsi üzrə mühüm addımlar atılmışdır. 26 oktyabr tarixli ağacəkmə və iməcilik aksiyaları da görülən işlərin davamı istiqamətindədir. Belə təşəbbüslər ekoloji tarazlığın qorunmasına, ətraf mühitin yaxşılaşdırılmasına və cəmiyyətin ekoloji maarifləndirilməsinə önəmli töhfələr verir. Yaxın gələcəkdə bu ərazidə əkilən ağac Pirallahı qəsəbəsinə uzanan magistral yolu daha da gözəlləşdirəcək, sakinlərimizin zövqünü oxşayacaqdır.

Paylaş:

Baxılıb: 530 dəfə