Azərbaycan–Serbiya münasibətlərinin möhkəm təməli

Bakı:

7 °C

87 %

9 m/s

Əlaqə

AZ RU EN

Ana səhifə / Arxiv / Azərbaycan–Serbiya münasibətlərinin möhkəm təməli

Azərbaycan–Serbiya münasibətlərinin möhkəm təməli

19.02.2026 [16:44]

Azərbaycan ilə Serbiya arasında münasibətlər uzun illərdir qarşılıqlı hörmət, dostluq və etibarlı tərəfdaşlıq prinsipləri üzərində qurulub. Hər iki ölkə beynəlxalq hüququn norma və prinsiplərinə sadiqliyini dəfələrlə nümayiş etdirərək bir-birinin suverenliyini və ərazi bütövlüyünü ardıcıl şəkildə dəstəkləyib. Bu qarşılıqlı dəstək münasibətlərin siyasi əsasını təşkil edir və dövlətlərarası dialoqun yüksək səviyyədə saxlanmasına imkan yaradır. Məhz bu möhkəm təməl üzərində cənab Prezident İlham Əliyevin 15 fevral tarixində Serbiya Respublikasına səfəri və verdiyi bəyanat iki ölkə arasında strateji tərəfdaşlığın növbəti mərhələsini müəyyən edən mühüm hadisə kimi qiymətləndirilir.

Səfər çərçivəsində Prezident İlham Əliyev Serbiyanın Prezidenti Aleksandar Vučić ilə keçirdiyi görüşlərdə siyasi, iqtisadi və humanitar sahələrdə əməkdaşlığın hazırkı vəziyyətini və perspektivlərini ətraflı müzakirə edib. Dövlət başçısı bəyanatında vurğulayıb ki, Azərbaycan ilə Serbiya arasında münasibətlər təkcə diplomatik əlaqələrlə məhdudlaşmır, eyni zamanda ortaq maraqlara, qarşılıqlı etimada və beynəlxalq platformalarda fəal əməkdaşlığa əsaslanır.

Dövlətimizin Başçısı çıxışında qeyd edib ki, iki ölkə beynəlxalq təşkilatlar çərçivəsində daim bir-birinin haqlı mövqeyini müdafiə edir. Bu həm regional sabitliyə töhfə verir, həm də tərəflər arasında strateji tərəfdaşlıq münasibətlərinin möhkəmlənməsinə xidmət edir. Onun sözlərinə görə, siyasi dialoqun intensiv xarakter alması və qarşılıqlı səfərlərin müntəzəmliyi əlaqələrin yüksələn xətt üzrə inkişaf etdiyini göstərir.

Bəyanatda iqtisadi əməkdaşlığın genişləndirilməsi xüsusi yer tutub. Cənab Prezident bildirib ki, ticarət dövriyyəsinin artımı müsbət dinamikanın göstəricisidir, lakin mövcud potensial bundan daha genişdir. Energetika sahəsində əməkdaşlıq xüsusilə diqqət mərkəzində olub. Azərbaycan qazının Avropa bazarına çıxışı fonunda Serbiya ilə enerji sahəsində tərəfdaşlığın gücləndirilməsi strateji əhəmiyyət daşıyır. Bu, həm Serbiyanın enerji təhlükəsizliyinə töhfə verir, həm də Azərbaycanın Avropadakı mövqelərini möhkəmləndirir.

Dövlət başçısı nəqliyyat və logistika sahəsində əməkdaşlıq imkanlarına da toxunaraq bildirib ki, Azərbaycan regionlararası bağlantıların inkişafında mühüm rol oynayır. Balkan regionu ilə əməkdaşlığın genişləndirilməsi Avrasiya məkanında iqtisadi inteqrasiyanın güclənməsinə şərait yaradır. Bu baxımdan Serbiya ilə əlaqələr xüsusi əhəmiyyət kəsb edir.

Humanitar və mədəni əlaqələrin inkişafı da bəyanatda vurğulanıb. Təhsil, mədəniyyət və turizm sahələrində əməkdaşlıq xalqlar arasında dostluq münasibətlərini daha da möhkəmləndirir. Prezident İlham Əliyev qeyd edib ki, dövlətlərarası münasibətlərin uğurlu inkişafı üçün xalqlar arasında qarşılıqlı anlaşma və etimad mühüm rol oynayır.

Səfər çərçivəsində müxtəlif sahələr üzrə sənədlərin imzalanması əməkdaşlığın hüquqi bazasını daha da gücləndirib. Bu sənədlər iqtisadi, enerji və digər istiqamətlərdə birgə fəaliyyətin sistemli şəkildə inkişafına imkan yaradır. Cənab Prezident İlham Əliyev əminliklə bildirib ki, Azərbaycan ilə Serbiya arasında strateji tərəfdaşlıq gələcəkdə də möhkəmlənəcək və hər iki ölkənin maraqlarına xidmət edəcək.

Rövşən Bayramov

YAP Ağcabədi rayon təşkilatı,

Pedoqoji Kollec ərazi partiya təşkilatının sədri

Paylaş:

Baxılıb: 75 dəfə