Azərbaycan ilə Serbiya arasında münasibətlər yüksələn xətt üzrə inkişaf edir

Bakı:

13 °C

76 %

10 m/s

Əlaqə

AZ RU EN

Ana səhifə / YAP xəbərləri / Azərbaycan ilə Serbiya arasında münasibətlər yüksələn xətt üzrə inkişaf edir

Azərbaycan ilə Serbiya arasında münasibətlər yüksələn xətt üzrə inkişaf edir

20.02.2026 [21:26]

2026-cı il fevralın 15-də Azərbaycan Respublikasının Prezidenti İlham Əliyev rəsmi səfərlə Serbiya Respublikasında olub. Belqradda keçirilən rəsmi qarşılanma mərasimindən sonra dövlət başçısı Serbiya Prezidenti Aleksandar Vuçiç ilə təkbətək və geniş tərkibdə görüş keçirib. Görüşlərdə Azərbaycan ilə Serbiya arasında mövcud dostluq və tərəfdaşlıq münasibətlərinin hazırkı vəziyyəti və gələcək inkişaf perspektivləri geniş şəkildə müzakirə olunub.

Dövlət başçıları siyasi dialoqun yüksək səviyyədə olduğunu vurğulayaraq iki ölkə arasında qarşılıqlı hörmət və etimada əsaslanan münasibətlərin daha da möhkəmləndirilməsinin vacibliyini qeyd ediblər. Prezident İlham Əliyev bildirib ki, Azərbaycan ilə Serbiya beynəlxalq platformalarda bir-birinin mövqeyini dəstəkləyən, suverenlik və ərazi bütövlüyü prinsiplərinə hörmətlə yanaşan dost ölkələrdir. Bu prinsipial mövqe əlaqələrin strateji xarakter daşımasının əsas göstəricilərindən biri kimi qiymətləndirilib.

Mətbuata verilən birgə bəyanat zamanı iqtisadi əməkdaşlıq məsələləri xüsusi yer tutub. Qeyd olunub ki, son illər ticarət dövriyyəsində artım müşahidə olunsa da, mövcud potensial bundan daha genişdir. Azərbaycan tərəfi Serbiyada müxtəlif sahələrə, xüsusilə infrastruktur, sənaye və enerji sektorlarına investisiya yatırmağa hazır olduğunu ifadə edib. Enerji sahəsində əməkdaşlığın genişləndirilməsi, qaz təchizatı və alternativ enerji layihələri üzrə qarşılıqlı fəaliyyət imkanları diqqət mərkəzində olub.

Prezident İlham Əliyev vurğulayıb ki, Azərbaycan etibarlı enerji tərəfdaşı kimi Avropa məkanında rolunu gücləndirir və bu çərçivədə Serbiya ilə uzunmüddətli əməkdaşlıq üçün real imkanlar mövcuddur. Enerji təhlükəsizliyinin təmin olunması, şaxələndirilmiş təchizat marşrutlarının yaradılması və qarşılıqlı sərmayə təşəbbüsləri iki ölkənin strateji maraqlarına xidmət edir.

Bununla yanaşı, nəqliyyat-logistika sahəsində əməkdaşlıq, humanitar əlaqələrin genişləndirilməsi, mədəniyyət və təhsil sahələrində qarşılıqlı mübadilələrin artırılması da müzakirə mövzusu olub. Dövlət başçıları əlaqələrin yalnız siyasi və iqtisadi müstəvidə deyil, xalqlar arasında münasibətlər səviyyəsində də inkişaf etməsinin əhəmiyyətini qeyd ediblər.

Səfər çərçivəsində aparılan danışıqlar və verilən bəyanatlar göstərir ki, Azərbaycan ilə Serbiya arasında münasibətlər yüksələn xətt üzrə inkişaf edir və qarşılıqlı maraqlara əsaslanan əməkdaşlıq modeli formalaşıb. Fevralın 15-də Belqradda keçirilən görüşlər iki ölkə arasında strateji tərəfdaşlığın daha da dərinləşdirilməsi istiqamətində mühüm mərhələ kimi qiymətləndirilə bilər.

Çingiz İbrahimov

YAP Göyçay rayon təşkilatının əməkdaşı

Paylaş:

Baxılıb: 313 dəfə