Cənub Qaz Dəhlizi: regional layihədən qlobal əhəmiyyətə

Bakı:

10 °C

93 %

4 m/s

Əlaqə

AZ RU EN

Ana səhifə / Arxiv / Cənub Qaz Dəhlizi: regional layihədən qlobal əhəmiyyətə

Cənub Qaz Dəhlizi: regional layihədən qlobal əhəmiyyətə

05.03.2026 [15:37]

Bakıda keçirilən Cənub Qaz Dəhlizi Məşvərət Şurası çərçivəsində nazirlərin 12-ci və Yaşıl Enerji Məşvərət Şurası çərçivəsində nazirlərin 4-cü iclası Azərbaycanın enerji strategiyasında mühüm mərhələ kimi yadda qaldı. Tədbirdə çıxış edən Azərbaycan Respublikasının Prezidenti İlham Əliyev ölkənin həm ənənəvi enerji resursları, həm də bərpa olunan enerji sahəsində əldə etdiyi nailiyyətlərdən və qarşıda duran strateji hədəflərdən bəhs etdi.

Cənab Prezident çıxışında vurğuladı ki, Cənub Qaz Dəhlizi artıq təkcə regional deyil, qlobal miqyasda enerji təhlükəsizliyinə töhfə verən mühüm layihəyə çevrilib. Azərbaycan qazı bu gün Avropanın bir çox ölkələrinin enerji balansında mühüm yer tutur. Dövlət başçısı qeyd etdi ki, layihənin genişləndirilməsi və yeni bazarlara çıxış imkanlarının araşdırılması prioritet istiqamətlərdəndir. Prezident İlham Əliyev tərəfdaş ölkələrlə formalaşmış etibarlı əməkdaşlıq modelini yüksək qiymətləndirərək bildirdi ki, Azərbaycan hər zaman öhdəliklərinə sadiq qalıb və enerji sahəsində etibarlı tərəfdaş statusunu qoruyur. O, enerji təhlükəsizliyinin milli təhlükəsizliyin ayrılmaz hissəsi olduğunu xüsusi vurğuladı.

Prezident İlham Əliyev çıxışının mühüm hissəsini yaşıl enerji gündəliyinə həsr etdi. O qeyd etdi ki, Azərbaycan zəngin bərpa olunan enerji potensialına malikdir və artıq bu istiqamətdə konkret layihələr icra mərhələsindədir. Xüsusilə günəş və külək enerjisi sahəsində beynəlxalq şirkətlərlə əməkdaşlıq genişlənir.

Dövlət başçısı vurğuladı ki, Qarabağ və Şərqi Zəngəzur iqtisadi rayonları “yaşıl enerji zonası” elan edilib və bu ərazilərdə alternativ enerji mənbələrinin tətbiqi prioritet təşkil edir. Bu yanaşma Azərbaycanın dayanıqlı inkişaf strategiyasının əsas elementlərindən biridir. Prezident İlham Əliyev enerji keçidinin mərhələli və balanslaşdırılmış şəkildə həyata keçirilməsinin vacibliyini qeyd etdi. O bildirdi ki, ənənəvi enerji resursları hələ uzun müddət qlobal bazarda mühüm rol oynayacaq, lakin paralel olaraq yaşıl enerji layihələrinin genişləndirilməsi davam etdiriləcək. Çıxışda həmçinin Azərbaycanın beynəlxalq enerji dialoqunun təşəbbüskarlarından biri kimi rolu xüsusi vurğulandı. Bakıda keçirilən bu iclaslar müxtəlif ölkələri və beynəlxalq təşkilatları bir araya gətirərək enerji sahəsində əməkdaşlığın dərinləşdirilməsinə xidmət edir.

Nazirlərin 12-ci və 4-cü iclasları göstərdi ki, Azərbaycan enerji siyasətində həm sabitlik, həm də yenilik prinsiplərini əsas götürür. Prezident İlham Əliyevin çıxışı bir daha təsdiqlədi ki, ölkə həm Cənub Qaz Dəhlizi vasitəsilə enerji təhlükəsizliyinə töhfə verir, həm də yaşıl enerji sahəsində iddialı və məqsədyönlü addımlar atır. Bu strateji yanaşma Azərbaycanın regionda və beynəlxalq müstəvidə mövqeyini daha da möhkəmləndirir.

Gündüz Alıkişiyev

YAP Tərtər rayon təşkilatının məsləhətçisi

Paylaş:

Baxılıb: 413 dəfə