Avropa Parlamenti, həddini aşma – Türkə sataşma! Hülusi Kılıçın yazısı

Bakı:

28 °C

57 %

4 m/s

Əlaqə

AZ RU EN

Ana səhifə / Analitik / Avropa Parlamenti, həddini aşma – Türkə sataşma! Hülusi Kılıçın yazısı

Avropa Parlamenti, həddini aşma – Türkə sataşma! Hülusi Kılıçın yazısı

04.05.2026 [21:21]

Avropa Parlamentinin Can Azərbaycan əleyhinə qəbul etdiyi qərarları qətiyyətlə qınayıram. Bu qərarlar yalnız bir ünvanı haqq edir – zibil qutusunu. Çünki söhbət açıq-aşkar Azərbaycanın daxili işlərinə müdaxilədən gedir. Avropa Parlamentinə belə bir səlahiyyəti heç kim verməyib və verə də bilməz. Qəbul edilən sənədlər əsassızdır, qərəzlidir və arxa planında erməni lobbisinin sifarişləri, əvvəlcədən ödənilmiş siyasi hesablar dayanır.

Azərbaycan Milli Məclisinin Avropa Parlamenti ilə əlaqələri dayandırmaq qərarı tam yerində, vaxtında və prinsipial addımdır. Bu qərar Azərbaycanın dünya qarşısındakı müstəqil və qürurlu mövqeyini açıq şəkildə nümayiş etdirir. Azərbaycan heç bir xarici qurumun idarə etdiyi, yönləndirdiyi ölkə deyil. Bu, güclü lideri olan, yüksək döyüş qabiliyyətli ordusu ilə seçilən və dövlətinin arxasında səfərbər olmuş vətəndaşları ilə bütöv bir millətin ölkəsidir.

Can Azərbaycan bu gün regionun aparıcı güclərindən biridir – bu reallığı hər kəs qəbul etməlidir. Azərbaycanı sevməyənlər və ona qarşı qərəzli mövqe tutanlar 44 günlük Vətən müharibəsində yazılmış qəhrəmanlıq salnaməsini diqqətlə oxusunlar. O zaman daha yaxşı anlayarlar ki, bu dövlət nəyə qadirdir.

Bu məqamda haqlı sual yaranır: Birləşmiş Millətlər Təşkilatının dörd qətnaməsi ilə Azərbaycanın ərazi bütövlüyü təsdiqləndiyi halda, torpaqlarımız 30 il işğal altında qalarkən Avropa Parlamenti harada idi? Hansı qərarı qəbul etdi? Heç birini! Bu susqunluq Avropanın məşhur “ikili standart” siyasətinin açıq və danılmaz sübutudur.

Bu gün qəbul edilən qərarlar isə yalan üzərində qurulub, açıq-aşkar islamofob və türkofob yanaşmanın məhsuludur. Avropa Parlamenti eyni ritorikanı Türkiyəyə qarşı da davam etdirir, tez-tez “qondarma erməni soyqırımı” ilə bağlı qərarlar qəbul edir. Lakin bu sənədlərin nə hüquqi, nə də siyasi baxımdan heç bir çəkisi yoxdur. Onlar yalnız siyasi sifarişlərin kağız üzərində əksidir.

Azərbaycan-Ermənistan arasında sülh sazişinin imzalanması ərəfəsində, eyni zamanda Türkiyə ilə Ermənistan arasında münasibətlərin normallaşması prosesi fonunda bu cür qərarların qəbul edilməsi təsadüfi deyil. Bu, regionda sülh istəməyən qüvvələrin məqsədli və qərəzli addımlarıdır. Xalq arasında deyildiyi kimi, bu, “bişməkdə olan aşa su qatmaq” cəhdidir. Açıq görünür ki, sülh perspektivi erməni lobbisini ciddi narahat edir. Çünki bu proses onların illərlə qurduqları sistemin, gəlir mənbələrinin sıradan çıxması deməkdir.

Qərb ölkələrində dəbdəbəli həyat yaşayan, lakin Ermənistanda yaşamağa belə maraq göstərməyən erməni diasporunun bu fəaliyyəti ilk növbədə elə erməni xalqının özünə zərbə vurur. Nə qədər müqavimət göstərsələr də, proses dayanmayacaq – Azərbaycan-Ermənistan sülh sazişi imzalanacaq, Türkiyə-Ermənistan münasibətləri normallaşacaq. Bizim atalar sözümüz var: “Qorxunun əcələ faydası yoxdur.” Erməni lobbisi bunu gec-tez anlayacaq.

Nəticə aydındır: Avropa Parlamenti, həddini aşma! Sənin siyasi “sicilin” təmiz deyil və biz bunu yaxşı bilirik. Erməni lobbisi, erməni xalqına zərər verməkdən əl çək! Bu gün qazandığın gəlir sabah yox olacaq – başqa sahələrlə məşğul ol və saxta gündəmlərlə regionu zəhərləməyə çalışma.

Azərbaycanı və Türkiyəni hədəfə alan bu cür addımlar əslində əks effekt verir – iki qardaş ölkə arasındakı münasibətləri daha da möhkəmləndirir, Türk dünyasının birliyini daha da gücləndirir.

Nə mutlu türkəm deyənə!

Hulusi Kılıç,
Türkiyə Respublikasının Azərbaycan Respublikasındakı sabiq səfiri
İMZA İB Türkiyə nümayəndəsi
Türkiyə-Azərbaycan Dostluq, Əməkdaşlıq və Həmrəylik Fondunun İdarə Heyətinin üzvü

Paylaş:

Baxılıb: 562 dəfə