Strateji tərəfdaşlığın yeni mərhələsi

Bakı:

12 °C

87 %

4 m/s

Əlaqə

AZ RU EN

Ana səhifə / Arxiv / Strateji tərəfdaşlığın yeni mərhələsi

Strateji tərəfdaşlığın yeni mərhələsi

13.03.2026 [14:04]

11 mart 2026-cı il tarixində Bakıda Azərbaycan Respublikasının Prezidenti İlham Əliyev ilə Avropa İttifaqı Şurasının Prezidenti Antonio Koşta arasında keçirilən görüş və verilən birgə bəyanatlar Azərbaycan-Avropa münasibətlərinin inkişafında mühüm siyasi hadisə kimi yadda qaldı. Bu səfər tərəflər arasında əməkdaşlığın yeni mərhələyə qədəm qoyduğunu bir daha nümayiş etdirdi.

Prezident İlham Əliyev çıxışında vurğuladı ki, Azərbaycan ilə Avropa İttifaqı arasında münasibətlər son illərdə dinamik inkişaf edir və tərəflər arasında fəal siyasi dialoq mövcuddur. Dövlət başçısı qeyd etdi ki, bu səfər ikitərəfli münasibətlərin daha da genişlənməsi və strateji əməkdaşlığın möhkəmləndirilməsi baxımından xüsusi əhəmiyyət daşıyır.

Azərbaycan bu gün Avropanın enerji təhlükəsizliyinin təmin edilməsində mühüm tərəfdaşlardan biri kimi çıxış edir. Prezident İlham Əliyev bildirdi ki, ölkəmiz Avropanın bir çox dövlətlərinə təbii qaz ixrac edir və bu istiqamətdə əməkdaşlıq daha da genişlənməkdədir. Azərbaycanın Avropa bazarına enerji resurslarının çatdırılmasında oynadığı rol Avropa İttifaqı tərəfindən də yüksək qiymətləndirilir.

Bu reallıq Azərbaycanın geosiyasi və iqtisadi əhəmiyyətini daha da artırır. Enerji layihələri, xüsusilə də regional enerji və nəqliyyat dəhlizləri, Avropa ilə Asiya arasında əlaqələrin möhkəmlənməsinə xidmət edir.

Görüş zamanı regionda sülh və sabitlik məsələləri də diqqət mərkəzində oldu. Prezident İlham Əliyev vurğuladı ki, regionda uzunmüddətli sülhün bərqərar olması əməkdaşlıq və iqtisadi inkişaf üçün geniş imkanlar yaradır. Bu, həm də Cənubi Qafqazın beynəlxalq nəqliyyat və logistika mərkəzi kimi rolunun artmasına şərait yaradır.

Avropa İttifaqı Şurasının Prezidenti Antonio Koşta da öz növbəsində Azərbaycanın Avropa üçün vacib tərəfdaş olduğunu bildirdi. Onun sözlərinə görə, enerji, təhlükəsizlik, nəqliyyat və rəqəmsal inkişaf sahələrində əməkdaşlığın genişləndirilməsi üçün yeni mexanizmlər üzərində iş aparılır.

Bu görüş bir daha göstərdi ki, Azərbaycan ilə Avropa İttifaqı arasında münasibətlər qarşılıqlı hörmət və bərabər tərəfdaşlıq prinsipləri üzərində qurulub. Tərəflər siyasi dialoqun daha da genişləndirilməsi və ortaq maraqlara xidmət edən layihələrin həyata keçirilməsi istiqamətində qətiyyət nümayiş etdirirlər.

Beləliklə, Bakıda keçirilən bu görüş və verilən bəyanatlar Azərbaycan-Avropa İttifaqı münasibətlərinin yeni mərhələyə qədəm qoyduğunu göstərir. Prezident İlham Əliyevin həyata keçirdiyi çoxşaxəli xarici siyasət nəticəsində Azərbaycan beynəlxalq münasibətlər sistemində etibarlı tərəfdaş kimi mövqeyini daha da möhkəmləndirir.

Şübhəsiz ki, bu əməkdaşlıq yalnız siyasi və iqtisadi sahələrlə məhdudlaşmayacaq, həm də regionda sülhün, təhlükəsizliyin və dayanıqlı inkişafın təmin edilməsinə mühüm töhfə verəcək.

Fidan Hüseynova

YAP Quba rayon təşkilatının sədri

Paylaş:

Baxılıb: 525 dəfə