Azərbaycan Avropa üçün etibarlı tərəfdaşa çevrilib

Bakı:

10 °C

93 %

0 m/s

Əlaqə

AZ RU EN

Ana səhifə / Arxiv / Azərbaycan Avropa üçün etibarlı tərəfdaşa çevrilib

Azərbaycan Avropa üçün etibarlı tərəfdaşa çevrilib

13.03.2026 [15:06]

Avropa İttifaqı Şurasının Prezidenti Antonio Koşta ölkəmizdə səfərdə oldu. Səfər tərəflər arasında münasibətlərin inkişafı baxımından mühüm əhəmiyyət kəsb edir. Prezident İlham Əliyevin “Biz Sizin səfərinizə çox böyük önəm veririk. Əminəm ki, o, xüsusən də indiki dövrdə çox uğurla inkişaf edən ikitərəfli əlaqələrimizin daha da inkişaf etdirilməsində mühüm rol oyanacaq. Bizim çox fəal dialoqumuz var. Avropa Komissiyasının üzvləri ötən il və bu il dəfələrlə bizə səfər ediblər. Beləliklə, biz müxtəlif səviyyələrdə tərəfdaşlığın fəal mərhələsindəyik” fikirlərinin davamı olaraq Antonio Koşta bildirdi ki, bugünkü görüş bizim xüsusilə təhlükəsizlik, enerji, rəqəmsal və nəqliyyat sahələrində əməkdaşlığın daha da inkişaf etdirilməsinə olan birgə öhdəliyimizin bariz əlamətidir. Təhlükəsizlik və insan haqları da daxil olmaqla, mövcud dialoq mexanizmlərindən tam şəkildə istifadə etmək məqsədilə hazırda biz Avropa İttifaqı ilə Azərbaycan arasında daha sıx əməkdaşlıq üçün yeni çərçivə üzərində işləyirik. Bu, bizim gələcəyə birgə baxışımıza dair güclü siqnal verir. Biz, həmçinin müdafiə və təhlükəsizlik sahələrində əməkdaşlığımızı dərinləşdirmək üçün yollar araşdırırıq.

Səfər şərçivəsində Prezidentlərin təkbətək və geniş tərkibdə görüşlərində ikitərəfli əməkdaşlığın perspektivləri müzakirə edildi, qarşılıqlı tərəfdaşlığın yeni istiqamətləri müəyyənləşdirildi. Əlaqələrin gündəliyinin genişliyi əsaslı şəkildə diqqətə çatdırıldı. Prezident İlham Əliyev bəzi iqtisadi göstəricilərə nəzər salaraq bildirdi ki, bu ilin yanvarında ticari dövriyyəmizin 50 faizi Avropa İttifaqı ilə bağlı olub. Avropa İttifaqı bizim üçün bir nömrəli ticari tərəfdaşdır: “Əminəm ki, yeni layihələr və yeni investisiya imkanları ilə sərmayələr iki istiqamətdə yatırılacaq. Hazırda biz, həmçinin Avropada fəal şəkildə sərmayə yatırırıq. Ticari dövriyyəmiz birmənalı olaraq artacaq. Tərəfdaşlığımızın mühüm hissəsi hər zaman enerji əməkdaşlığı olub, var və birmənalı olaraq olacaq. Bu, xüsusən də 2022-ci ildə Enerji sahəsində Strateji Tərəfdaşlıq haqqında sənədi Avropa Komissiyası ilə imzaladığımızdan sonra müşahidə olunur”.

Həmin vaxtdan etibarən Azərbaycan həm həcm, həm də ölkələrin sayı baxımından Avropa ölkələrinə qaz ixracını artırıb. Bu gün Avropa İttifaqının 10 üzvü Azərbaycandan qaz alır və ölkələrin ümumi sayı 16-ya çatıb. Bu göstəriciyə görə Azərbaycan dünyada boru kəməri ilə qazı təchiz edən bir nömrəli ölkədir. Ölkəmiz bu il qaz hasilatını artırmağı planlaşdırır. Qazı yeni yataqda hasil etməyə başlayacaq. Prezident İlham Əliyev qeyd etdi ki, bu gündən etibarən növbəti iki və ya üç il ərzində bizim bugünkü həcmlə müqayisədə minimum 10 milyard kubmetr əlavə qazımız olacaq.

Prezidentlərin mətbuata bəyanatlarında, həmçinin geniş tərkibdə keçirilən görüşləri zamanı qəbul etdikləri mətbuat bəyanatında Azərbaycan-Avropa İttifaqı əlaqələrinin perspektivləri geniş şəkildə təhlil edilir, inkişafın yol xəritəsi təqdim olunur. Cənab İlham Əliyev tarixi Zəfərimizin və suverenliyimizin tam bərpasının yaratdığı reallıqlar fonunda yeni imkanların açılmasından geniş bəhs etdi. Bildirdi ki, Ermənistanla paraflanmış sülh sazişinə nail olduqdan sonra daşımalar ikitərəfli gündəliyimizin mühüm hissəsidir. Orta Dəhlizin genişlənməsi üçün yeni imkanların açılması, təbii ki, nikbinliyimizi artırır. Müstəqilliyimiz 1991-ci ildə bərpa olunub. Bununla belə, cəmi yeddi aydır ki, sülhdə yaşayırıq. Lakin biz bunun faydasını artıq hiss edirik və əminəm ki, Ermənistanla sülh daimi olacaq.

O da qeyd edildi ki, biz, həmçinin ticarətə başlamışıq. Ermənistana mühüm neft məhsullarının təchizatına başlamışıq. Digər ölkələrdən Azərbaycan ərazisi vasitəsilə Ermənistana gedən yüklərin tranzitinə bütün məhdudiyyətləri aradan qaldırmışıq. Bu isə bir daha güclü siyasi iradəmizi göstərir, çünki biz sülhə təkcə iki ölkənin parafladığı sənəd üzərində deyil, həmçinin əyani şəkildə nail oluruq. Bu, həmçinin ona görə vacibdir ki, bəzən sənədlər uzun müddət ərzində elə kağız kimi qalır: “Bizə gəldikdə, 2023-cü ilin sentyabrından Ermənistanla son qanlı hərbi toqquşmadan 2025-ci ilin avqustunda sülhə nail olmağımızdan iki ildən az vaxt keçir. Düşünürəm ki, əgər hər iki tərəf siyasi iradəni və sülhə sadiqliyini nümayiş etdirərsə, bu, dövlətlərin və xalqların barışığına dəlalət edən ən yaxşı göstəricidir. Sülhdən yaxşı heç nə ola bilməz. İnanın mənə, müharibə şəraitində yaşamağın və ya müharibə etməyin nə olduğunu bilirik. Ona görə bizim kimi ölkələr, ola bilsin, sülhü hər hansı digər ölkədən daha çox dəyərləndirir. Bir sözlə, gündəliyimiz həqiqətən çox genişdir. Biz, əlbəttə, sərhədlərimizə yaxın bölgədə təhlükəsizlik məsələlərini müzakirə etdik”.

Qısa təhlil onu deməyə əsas verir ki, Azərbaycan-Avropa İttifaqı münasibətləri yeni inkişaf mərhələsinə qədəm qoyur. Ölkəmiz Avropa üçün etibarlı tərəfdaşa çevrilib.

Etibar Hacıyev

YAP Ağstafa rayon təşkilatının sədri

Paylaş:

Baxılıb: 296 dəfə