Zərifə Əliyevanın mükəmməl elmi irsi və insan sağlamlığına həsr olunan ömür

Bakı:

10 °C

93 %

6 m/s

Əlaqə

AZ RU EN

Ana səhifə / Arxiv / Zərifə Əliyevanın mükəmməl elmi irsi və insan sağlamlığına həsr olunan ömür

Zərifə Əliyevanın mükəmməl elmi irsi və insan sağlamlığına həsr olunan ömür

14.04.2026 [12:39]

Zərifə xanım Əliyevanı örnək götürmək mənim üçün sadəcə peşə borcu deyil, ürəkdən gələn bir sevgi, mənəvi öhdəlikdir. Tibb kollecində təhsil verən müəllim olaraq, tələbələrimizə yalnız bilik yox, həm də yüksək əxlaq, deontologiya və tibbi etika aşılamağa çalışırıq. Bu yolda Akademik Zərifə xanım Əliyeva ən böyük ilham mənbəyidir.

Zərifə xanım Azərbaycan tibb elminin parlaq ulduzu, böyük alim və mehriban müəllim idi. Onun həyatı tibb sahəsində çalışan və tibb təhsili alan hər kəs üçün səmimi xidmət nümunəsidir.

O, milli tibb kadrlarının hazırlanmasında müstəsna rol oynamışdır. Uzun illər Azərbaycan Dövlət Həkimləri Təkmilləşdirmə İnstitutunun oftalmologiya kafedrasına rəhbərlik edərək yüzlərlə gənc həkim və alim yetişdirmiş, ölkəmizdə güclü oftalmologiya məktəbi yaratmışdır. Onun rəhbərliyi altında keçirilən elmi tədbirlər, plenumlar və tədqiqatlar yüksəkixtisaslı tibb işçilərinin formalaşmasına böyük töhfə vermişdir.

Zərifə xanım tibb işçiləri ilə davranışda və etik normalarda həmişə ən yüksək nümunə idi. “Həkimin əxlaqi tərbiyəsi, deontologiya, tibbi etika və əxlaq məsələləri” kimi dəyərli əsərlərində vurğulayırdı ki, həkim sadəcə peşəkar deyil, həm də xəstəyə qarşı qayğıkeş, səmimi və məsuliyyətli olmalıdır. O özü də xəstələrə, həmkarlara və tələbələrə qarşı son dərəcə diqqətli və insanpərvər idi. Hesab edirdi ki, həkimlə xəstə arasında səmimi münasibət bəzən dərmandan da güclü təsir göstərir.

Zərifə xanımın Tibb elminə verdiyi töhfələr isə misilsizdir. Traxomanın ləğvindən tutmuş peşə oftalmologiyası, qlaukoma, göz yaşı yollarının cərrahiyyəsi və iridodiaqnostikaya qədər bir çox sahədə öncüllük etmiş, 150-dən çox elmi əsər, monoqrafiya və dərs vəsaiti yazmışdır. 1981-ci ildə SSRİ Tibb Elmləri Akademiyasının M.İ.Averbax adına mükafatına layiq görülən ilk qadın alim olmuşdur. Onun əsərləri bu gün də oftalmoloqların stolüstü kitabıdır.

Zərifə xanım tibb elmini gənclərə və tələbələrə sevdirməkdə xüsusilə bacarıqlı idi. Dərslərində, mühazirələrində və şəxsi nümunəsi ilə gənclərdə elmə, peşəyə və insanlara xidmətə bağlılıq hissi oyadırdı. “Elm – nurdur, lakin göz olmasa, nur da yoxdur” deyərək tibbin insan həyatındakı əhəmiyyətini sadə və ürəyəyatan dillə izah edirdi. Onun yetirmələri bu gün də Azərbaycan tibbində fəal çalışır və onun ənənələrini davam etdirirlər.

Zərifə xanım sadəcə alim deyil, əsl Azərbaycan ziyalısı, fədakar ana və qayğıkeş müəllim idi. Onun işıqlı ömrü, zəngin irsi və insanpərvərliyi bu gün də gənc həkimlərə, tələbələrə və bütün tibb işçilərinə ilham mənbəyidir. Onun adı daşıyan Milli Oftalmologiya Mərkəzi bu xidmətin əbədi davamını təmin edir.

Tibb kollecində çalışan bir müəllim kimi biz Zərifə xanım Əliyevanın deontologiya və tibbi etika yönündəki davranışlarını ən yüksək nümunə götürürük. Onun əsərlərindən və həyat tərzindən ilham alaraq tələbələrimizə həm peşəkarlıq, həm də yüksək əxlaqi dəyərlər aşılamağa çalışırıq. Zərifə xanımın yolu bizim üçün işıqlı mayakdır.

Zərifə xanımın həyatı bizə öyrədir ki, həkimlik – yalnız peşə deyil, yüksək insanlıq missiyasıdır. Bu missiyanı sevgi, elm və əxlaqla yerinə yetirmək isə ən böyük xoşbəxtlikdir.

Səidə Şahverdiyeva

YAP Naxçıvan şəhər təşkilatının fəal üzvü

Paylaş:

Baxılıb: 252 dəfə