Nikol Paşinyan hakimiyyətini qorumaq üçün kriminal avtoritetlərlə sövdələşməyə gedir

Bakı:

30 °C

43 %

4 m/s

Əlaqə

AZ RU EN

Ana səhifə / Dünya / Nikol Paşinyan hakimiyyətini qorumaq üçün kriminal avtoritetlərlə sövdələşməyə gedir

Nikol Paşinyan hakimiyyətini qorumaq üçün kriminal avtoritetlərlə sövdələşməyə gedir

06.10.2018 [10:35]

Hökumətin hazırladığı amnistiya layihəsi də terrorçu qurumlara və kriminal aləmə mənsub şəxslərin azadlığa buraxılması üçündür
Son günlər işğalçı Ermənistanda parlament-hökumət qarşıdurması nəticəsində yaranan qeyri-müəyyənlik davam edir. Oktyabrın 5-də baş nazir Nikol Paşinyan istefaya göndərilən nazirlərin bəzilərinin yerlərinə təyinat aparmaqla məşğul olsa da, hazırda əsas cəhd amnistiya haqqında qanun layihəsinin təsdiq olunmasına yönəldilib. Səriştəsiz baş nazirin canfəşanlıqla layihənin həyata keçirilməsinə çalışması bəzi təhlükəli və qaranlıq məqamları ortaya çıxarıb.
N.Paşinyanın mövcud böhranı aradan qaldırmaq üçün keçmiş nazirlərin yerinə apardığı təyinatlar da işğalçı ölkədə müzakirələrə səbəb olub. Belə ki, keçmiş respublikaçı və 1 may tarixində keçirilən səsvermədə N.Paşinyanın namizədliyinə səs verən deputat Feliks Çolaqyan fövqəladə hallar naziri vəzifəsinə təyin edilib. Xatırladaq ki, F.Çolaqyan Təhlükəsizlik Xidmətinin sədr müavini, Şirak vilayətinin qubernatoru olub. Bitərəf Qaregin Baqramyan energetika infrastrukturu və təbii sərvətlər naziri, “Vətəndaş sazişi” Partiyasının üzvü Hakop Arşakyan isə nəqliyyat, rabitə informasiya texnologiyaları naziri təyin edilib. Boş qalan digər postlara nazirlərin təyinatı aparılmasa da, Niderlanddan geri çağırılan səfir Qaregin Melkonyanın iqtisadi inkişaf və investisiyalar naziri təyin ediləcəyi güman edilir. İrəvanın polis rəisi Artak Poqosyan da vəzifəsindən azad edilib, onun yerinə Qarik Qukasyan təyin olunub.
Hökumətin təsdiqinə tələsdiyi amnistiya layihəsinə gəlincə, Ermənistan mətbuatı yazır ki, hal-hazırda Ermənistanın penitensiar xidmətin tabeliyindəki müəssisələrində heç bir sıxlıq qeydə alınmamasına baxmayaraq, hökumətin fövqəladə şəkildə xüsusi iclasda amnistiya haqqında qanun layihəsini müzakirə etməsi maraq doğurur. Ermənistanın ədliyyə naziri Artak Zeynalyan hökumətin bu addımının parlament deputatlarının əksəriyyəti tərəfindən qəbul edilməli olduğunu israrla desə də, onsuz da parlamenti mühasirəyə aldığına görə N.Paşinyandan narazı olan deputatların layihənin əleyhinə çıxmaq üçün kifayət qədər əsasları var. Nazirin sənədin may ayından hazır olması barədə sözləri və bu sənədin yalnız bu gün hakimiyyət böhranı zamanı hökumətin təsdiqinə təqdim edilməsi bir çox suallar yaradıb.
Məsələ ilə bağlı “İravunk” qəzeti maraqlı iddia ilə çıxış edib. Qəzetin yazdığına görə, Ermənistandakı kriminal aləmlə danışıqlara gedən N. Paşinyana avtoritetlərdən şərtli dəstək gəldiyi üçün amnistiya layihəsi tələm-tələsik ortaya çıxıb. Qəzet yazır ki, N.Paşinyan növbədənkənar seçkilər haqqında qərar qəbul edərkən parlamentdəki və parlamentdənkənar siyasi qüvvələrin rəyini nəzərə almağı lüzum görməsə də, kriminal avtoritetlərin dəstəyini almağı daha vacib hesab edib. Sözügedən danışıqlarda hökuməti Ermənistanın baş nazirinin birinci müavini Ararat Mirzoyan təmsil edib: “Bizim məlumatlara əsasən, A.Mirzoyana ölkədəki vəziyyətlə bağlı kriminal avtoritetlərlə danışıqlar aparmağa səlahiyyət verilib. Eyni məlumatlara əsasən, kriminal aləmin nümayəndələri N.Paşinyana dəstək verəcəklərini bəyan ediblər, amma amnistiyanın vacibliyi ilə bağlı öz şərtlərini ortaya qoyublar”.
Amnistiya layihəsinin qəbul edilməsi ilə Dağlıq Qarabağın işğalında iştirak edən “Sasun dəliləri” terror təşkilatının iki polisi öldürdüklərinə görə həbsdə olan və bu günlərdə aclıq elan edən üzvlərinin də azadlığa buraxılması hədəflənir. Ümumiyyətlə, hazırda N.Paşinyana açıq dəstək verən həmin terror təşkilatı siyasi partiyaya çevrildiyini elan etsə də, onların qanunsuz silahlı dəstələr və kriminal aləmlə ciddi əlaqələrə malik olması barədə iddialar var.
Bütün bunlar onu göstərir ki, işğalçı-kriminal rejimin hakimiyyətdən getməsinə nail olan erməni xalqının bu dəfə də bəxti gətirməyib. Keçmiş hakimiyyət kriminal oliqarxiya və digər cinayətkar qüvvələrlə inteqrasiyada çalışırdısa, guya kriminal oliqarxiyaya qarşı mübarizə aparan N.Paşinyan da kriminal avtoritetlərdən, terrorçu təşkilatlardan dəstək almaq istəyir. Bu hal isə Ermənistanda demokratiya yox, yeni bir cinayətkar rejimin formalaşmasına rəvac verir.
Qaşqay ZİYƏDDİNOĞLU

Paylaş:

Baxılıb: 1411 dəfə