Şirvan şəhərində böyük sənaye potensialı yaradılıb

Bakı:

21 °C

58 %

2 m/s

Əlaqə

AZ RU EN

Ana səhifə / Gündəm / Şirvan şəhərində böyük sənaye potensialı yaradılıb

Şirvan şəhərində böyük sənaye potensialı yaradılıb

14.04.2010 [09:27]

Prezident İlham Əliyev: Mən hesab edirəm ki, biz Şirvan şəhərinin, ümumiyyətlə, sənaye inkişafını bundan sonra da təmin edəcəyik
Azərbaycan iqtisadiyyatının bütün sahələri hazırda inkişafın yüksək mərhələsindədir. Buna son illər Respublikamızda aparılan sistemli və məqsədyönlü siyasət sayəsində nail olunub. Bildiyimiz kimi, ölkə iqtisadiyyatının inkişafının əsas istiqamətlərindən birini də sənayenin inkişafı təşkil edir. Əsas məqsəd elmtutumlu, rəqabətədavamlı, yüksək texnologiyalı sənaye məhsullarının istehsalını təmin etməkdir. Məlum olduğu kimi, respublikamızın əsas sənaye mərkəzi Bakı və ümumilikdə Abşeron yarımadası hesab olunur. Lakin həyata keçirilən məqsədyönlü tədbirlər sayəsində yaxın gələcəkdə Şirvan şəhərinin sənaye əhəmiyyətinə görə Bakı ilə eyni pilləyə yüksələ biləcəyini söyləmək olar.
Bu məqsədlə, “Regionların sosial-iqtisadi inkişafı Dövlət Proqramı”na uyğun olaraq nəzərdə tutulan tədbirlər Şirvanda da uğurla icra olunur. Burada son illər görülən işlər nəticəsində şəhərin iqtisadi göstəriciləri xeyli yaxşılaşıb. Təkcə bir faktı qeyd etmək kifayətdir ki, şəhərin məhsul buraxılışının həcmi 2008-ci illə müqayisədə keçən il artaraq 221 milyon manatdan çox olub, sənaye məhsulunun həcmi isə 186 milyon manata yüksəlib. Bununla yanaşı, istehsal olunan sənaye məhsulunun 506 min tonunu xam neft, 21 milyon kubmetr həcmində qaz və 2 milyard 657 milyon kilovat-saat elektrik enerjisi təşkil edib. Bölgənin iqtisadi inkişafında diqqəti cəlb edən daha bir xüsusiyyət ondan ibarətdir ki, digər sahələrdə olduğu kimi, sənaye sahəsində də özəl sektorun rolu artmaqdadır. Belə ki, sənaye məhsullarının istehsalının 66,6 faizinin qeyri-dövlət sektorunun payına düşməsi buna əyani sübutdur.
Qeyd etmək lazımdır ki, Şirvan, əsasən müdafiə sənayesi üzrə ixtisaslaşan bir şəhərə çevrilməkdədir və burada bir çox müasir tipli müəssisələr istifadəyə verilib. Prezident İlham Əliyev bu yaxınlarda bölgəyə baş tutan səfəri çərçivəsində Müdafiə Sənayesi Nazirliyinin Aqreqat İstehsalat Birliyinin “Araz” zavodunun açılışında iştirak edib. Hələ 1980-ci ildə fəaliyyətə başlayan zavodda 2006-cı ildə Müdafiə Sənayesi Nazirliyi yaradıldıqdan sonra əsaslı yenidənqurma işlərinə başlanıldı. Zavodun yenidənqurma işlərinin başa çatdığı sahələr isə hazırda istehsal fəaliyyəti göstərməkdədir. Əlavə edək ki, quruculuq işlərinin bu ilin sonuna qədər tam yekunlaşacağı nəzərdə tutulan zavodda yüzlərlə insan işlə təmin olunacaqdır. Qeyd edək ki, mülki və hərbi təyinatlı məhsullar istehsal edən bu zavodun açılışı Şirvanda formalaşdırılan müdafiə sənayesinin inkişafına böyük töhfədir. Elə bu səbəbdən də, Azərbaycanın müdafiə sənayesinin inkişafında Şirvanın önəmini xüsusi qeyd edən dövlət başçısı bildirib ki, Şirvan şəhəri Bakıdan sonra müdafiə sənayesi ilə bağlı ikinci şəhərdir: “Amma bir halda, bu istiqamətdə ixtisaslaşma gedir, hesab edirəm ki, müdafiə sənayesinin möhkəm bazası üçün Şirvan şəhərində bütün imkanlar vardır”. Mövcud imkanların lazımınca dəyərləndirilməsi üçün həm texniki, həm də peşəkar kadrların hazırlanmasına xüsusi diqqət yetirilir.
Prezident İlham Əliyev Müdafiə Sənayesi Nazirliyi Aqreqat İstehsalat Birliyinin telemexanika zavodunda aparılan yenidənqurma işlərinin gedişi ilə də maraqlanıb. Sözügedən müəssisə təkcə müdafiə sənayesi üçün deyil, iqtisadiyyatın digər sahələri üçün də avadanlıqlar və ehtiyat hissələri hazırlayır.
Onu da əlavə edək ki, Şirvanda Müdafiə Sənayesi Nazirliyinin tabeliyində çoxlu sayda müəssisələr var və onların hər birinin təkmilləşdirilməsi, yüksək standartlara uyğunlaşdırılması istiqamətində işlər gedir. Görülən işlər öz müsbət nəticələrini çox gözlətməyib. Belə ki, 2009-cu ildə Müdafiə Sənayesi Nazirliyinin müəssisələri ümumi məhsul istehsalını əvvəlki illə müqayisədə 1,5 dəfə artırıb. Əgər Şirvanda müdafiə sənayesi müəssisələrinin yenidənqurulması prosesinin hazırda davam etdirildiyini nəzərə alsaq, onda qarşıdakı illərdə istehsal həcminin dəfələrlə artacağını söyləmək olar.
Şübhəsiz ki, Şirvanın sahib olduğu potensialdan geniş istifadə nəticəsində bu şəhər Azərbaycan sənayesinə, xüsusən də, müdafiə sənayesinə daha böyük töhfə verəcək.
Hülya MƏMMƏDLİ

Paylaş:

Baxılıb: 1273 dəfə