“Synergy Baku”dan 2-ci dəfə mərhələ qalibiyyəti

Bakı:

25 °C

46 %

6 m/s

Əlaqə

AZ RU EN

Ana səhifə / İdman / “Synergy Baku”dan 2-ci dəfə mərhələ qalibiyyəti

“Synergy Baku”dan 2-ci dəfə mərhələ qalibiyyəti

07.05.2016 [09:15]

Aleksandr Qusyatnikov: Prezident İlham Əliyev ölkənizdə idmanın inkişafı üçün hər şeyi edir
Beynəlxalq Velosipedçilər İttifaqının 2.1 kateqoriyalı “Tour d’Azerbaidjan-2016” veloyürüşünün 3-cü mərhələsi də Azərbaycanın “Synergy Baku” kontinental komandası üçün uğurlu alınıb. Belə ki, 2-ci mərhələdə olduğu kimi, yenidən komandamızın üzvü finiş xəttini hamıdan öndə keçib. Bu dəfə Matey Müqerli azarkeşlərə sevinc dolu anlar yaşadıb.
Marşrutu 4 saat, 18 dəqiqə, 44 saniyəyə başa vuran Müqerli, bununla da finişi onunla eyni vaxtda keçən 13 nəfərlik qrupda hamını qabaqlayıb. 2-ci yerə isə yenidən Avstriyanın “Felbermayr - Simplon Wels” klubunun üzvü, ötən mövsümü “Synergy Baku”nun heyətində keçirən Markus Eybeger layiq görülüb. İlk üçlüyü Birləşmiş Ərəb Əmirliklərinin “NASR-Dubai” komandasının üzvü Luka Vakerman tamamlayıb.
“Synergy Baku”nun digər üzvlərinə gəlincə, Maksim Averin 12-ci, Matiya Kvasina 20-ci, Kiril Pozdnyakov 22-ci, Yannis Tamuridis isə 30-cu olub. Bu nəticə “Synergy Baku”ya komanda hesabında 1-ci yeri qorumağa imkan verib. Ümumi təsnifata gəlincə, komanda üzvlərimizdən Maksim Averin 4-cü, Matey Müqerli 7-ci, Matiya Kvasina 12-ci, Kiril Pozdnyakov isə 13-cüdür.
3 mərhələdən sonra ümumi təsnifatın lideri üçün nəzərdə tutulan mavi rəngli “Synergy Group” köynəyini Avstriyanın “Felbermayr - Simplon Wels” klubunun üzvü Daniel Şorn ələ keçirib. O, həmçinin ən yaxşı sprinter kimi yaşıl rəngli “SOCAR” köynəyinə də yiyələnib. İtaliyanın “Unieuro Wilier” komandasının nümayəndəsi Mauro Finetto ən yaxşı dağ velosipedçisi kimi qırmızı rəngli “AZAL” köynəyini, Rusiyanın pro-kontinental “Gazprom-Rusvelo” komandasının velosipedçisi İldar Arslanov isə ən yaxşı gənc velosipedçi kimi bənövşəyi rəngli “Ataholding” köynəyini özündə saxlayıb.
Qaliblərə mükafatları veloturun Təşkilat Komitəsinin sədri, Azərbaycan Velosiped İdmanı Federasiyasının vitse-prezidenti Sahib Ələkbərov, Avropa Velosipedçilər Birliyinin vitse-prezidenti Aleksandr Qusyatnikov və Qəbələ rayon İcra Hakimiyyətinin başçısı Səbuhi Abdullayev təqdim ediblər.
“Bu gün maraqlı finiş alındı. Sona az qalmış rəqiblərim hücuma keçdi və bu səbəbdən sürəti artırmalı oldum”, - deyə mərhələnin qalibi Matey Müqerli mətbuat konfransında bildirib. M.Müqerlinin sözlərinə görə, belə bir yarışda uğur qazanmaq həm onun özü, həm də komandamız üçün olduqca vacibdir.
Yeri gəlmişkən, veloturun 3-cü mərhələsi başlamazdan öncə azərbaycanlı jurnalistlərə müsahibə verən Avropa Velosipedçilər Birliyinin vitse-prezidenti Aleksandr Qusyatnikov bildirib ki, hər zaman olduğu kimi, bu il də “Tour d’Azerbaidjan” yüksək səviyyədə keçirilir. O, eyni zamanda, “Prezident İlham Əliyev ölkənizdə idmanın inkişafı üçün hər şeyi edir. Həmçinin Azərbaycan Velosiped İdmanı Federasiyasının gördüyü işləri qeyd etməliyəm”, - deyib.
NADİR

Paylaş:

Baxılıb: 1126 dəfə