Qlobal iqlim dəyişikliyinin növbəti fəsadı...

Bakı:

21°C

88%

4m/s

Əlaqə

AZ RU EN

Ana səhifə / MEDİA / Qlobal iqlim dəyişikliyinin növbəti fəsadı...

Qlobal iqlim dəyişikliyinin növbəti fəsadı...

29.08.2024 [10:38]

Qlobal iqlim dəyişikliyi hazırda bütün dünya ölkələrini narahat edən mövzulardan biridir. Bununla bağlı davamlı tədbirlər keçirilir, beynəlxalq müstəvidə müxtəlif dövlətlər arasında müzakirələr aparılır. Məlumdur ki, Azərbaycan iqlim dəyişikliyi ilə mübarizədə hər zaman özünəməxsus fəaliyyəti ilə seçilib. Ölkəmiz beynəlxalq tədbirlərin keçirildiyi unikal məkandır. Bu il isə Azərbaycan ən böyük beynəlxalq tədbirə - BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edəcək.

COP29-un ölkəmizdə keçiriləcəyi ərəfədə paytaxtda davamlı olaraq ekologiya və ətraf mühitin mühafizəsi ilə bağlı mühüm tədbirlər keçirilir. Belə tədbirlərdən biri də dünən baş tutub. “Su İdarəetmə Sistemlərinin iqlimə Dayanıqlı Kənd Təsərrüfatında Rolu: COP29 Dəyirmi Masa Müzakirələri” adlı tədbirdə bütün dünyada aktual mövzuya çevrilən qlobal iqlim dəyişikliyi və onun yaratdığı fəsadlar müzakirə edilib.

Su ehtiyatlarımız 15 faiz azalıb

Tədbirdə çıxış edən Ekologiya və təbii sərvətlər nazirinin müavini Vüqar Kərimov bildirib ki, qlobal iqlim dəyişiklikləri nəticəsində Azərbaycanda su ehtiyatları son illərdə təqribən 15 %-dən çox azalıb. Onun sözlərinə görə, təəssüf ki, növbəti illərdə də proqnozlar daha kəskindir və azalma davam edəcək: “Bu dəyişikliklər həm kənd təsərrüfatı bitkilərinə, heyvandarlığa mühüm təsir göstərir. Bu baxımdan bitkiçilik və heyvandarlıq sahələrində iqlim dəyişikliklərinə uyğunlaşdırmaq məqsədi ilə konkret fəaliyyətlər həyata keçirilməlidir”.

Hansı tədbirlər görülür?

V.Kərimov bildirib ki, Azərbaycanda su itkilərinin qarşısının alınması məqsədi ilə suvarma kanallarının yenidən qurulması və bərpası, içməli su mənbələrinin yaradılması, həmçinin su ehtiyatlarının artırılması üçün yeni su anbarlarının yaradılması istiqamətində işlər həyata keçirilir. Onun sözlərinə görə, buna baxmayaraq, suya tələbatın artması fonunda iqtisadiyyatın bütün sahələrində qənaətedici su texnologiyalarından istifadəni, suya tələbatı tullantı sularının təmizlənərək istifadəsi yolu ilə ödənilməsi mühüm əhəmiyyət kəsb edir.

O, qeyd edib ki, Ekologiya və Təbii Sərvətlər Nazirliyi tərəfindən həyata keçirilən yaşıllaşdırma işləri çərçivəsində əsas su mənbəyi kimi təkrar emal olunan sulardan geniş istifadə edilir: “Bu həm içməli su ehtiyatlarının qorunması, həm də suların təkrar dövriyyəsini təmin etməklə sudan səmərəli istifadəyə gətirib çıxarır”.

Uzunmüddətli aşağıkarbonlu inkişaf strategiyası...

Nazir müavini qeyd edib ki, hazırda Paris Sazişinə uyğun olaraq Azərbaycan üzrə Yenilənmiş Milli Səviyyədə Müəyyən Edilmiş Töhfələr (NDC) sənədi və uzunmüddətli Aşağıkarbonlu İnkişaf Strategiyası (LTS) hazırlanmaqdadır. O, bildirib ki, kənd təsərrüfatında iqlim dəyişiklikləri ilə mübarizə aparmaq və onun təsirlərini azaltmaq üçün kənd təsərrüfatı istehsalçılarını bu mövzuda məlumatlandırmaq və istehsal vərdişlərini mövcud iqlim reallıqlarına uyğunlaşdırmaq lazımdır: “İqlim dəyişikliklərinin mənfi təsirlərinin qarşısını yalnız uyğunlaşma və azaltma çərçivəsində hazırlanacaq strategiyalarla almaq mümkündür”.

V. Kərimov həmçinin qeyd edib ki, iqlim dəyişmələri probleminin həlli genişmiqyaslı və uzunmüddətli tədbirlər kompleksinin icrasını tələb edir: “Ölkəmizin BMT-nin İqlim Dəyişmələri üzrə Çərçivə Konvensiyası çərçivəsində qlobal iqlim dəyişmələrinə təsirləri azaltmaq məqsədilə təşəbbüslərə töhfə olaraq, 2050-ci ilə qədər istixana qazı emissiyalarının xalis payının 40 %-ə qədər azaldılmasını şərtli hədəf kimi müəyyən edilib. Azərbaycan bu il, həmçinin qlobal metan emissiyalarının azaldılması üzrə öhdəlikləri nəzərdə tutan “Qlobal Metan Vədi” təşəbbüsünə qoşulub”.

Su ehtiyatlarının uçotu Qarabağdan başlayacaq

Tədbirdə çıxış edən Ekologiya və Təbii Sərvətlər Nazirliyinin Ekoloji siyasət şöbəsinin müdir müavini Rafiq Verdiyev bildirib ki, Azərbaycanda Elektron Su Təsərrüfatı İnformasiya Sisteminin təkmilləşdirilməsi ilə bağlı işlər davam etdirilir. Onun sözlərinə görə, artıq su balansı sistemi təhvil verilib: “Su ehtiyatlarının faktiki vəziyyəti ilə bağlı uçotun aparılmasını istəyirik. İlk növbədə işğaldan azad edilmiş ərazilərdə proqramı işləmişik. Demək olar ki, bütün çaylarda avtomat stansiyaların məlumatları əsasında istənilən vaxt vəziyyəti qiymətləndirmək mümkündür”.

Kür çayı ilə bağlı müqavilə imzalanacaq

R.Verdiyev vurğulayıb ki, Azərbaycan Gürcüstanla Kür çayında su ehtiyatları və ondan istifadədə məlumatların mübadiləsi ilə bağlı müqavilə imzalamaq istəyir: “Müqavilənin tez bir zamanda imzalanması hədəflənir. Kür çayında qar ehtiyatları, hövzədə olan vəziyyət bizim üçün önəmlidir. Biz daha dəqiq biləcəyik ki, Kür çayının Azərbaycandan yuxarı hissələrində yaz dövründə nə qədər su gözlənilir. Bu, sudan istifadəçilər üçün dəqiq proqnoz verməyə imkan verəcək”.

Yeganə BAYRAMOVA

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Ekologiya və ətraf mühitin mühafizəsi” istiqaməti üzrə hazırlanmışdır.

Paylaş:

Baxılıb: 130 dəfə