Gənclər-vətəndaş cəmiyyətinin aparıcı qüvvəsi

Bakı:

10 °C

93 %

0 m/s

Əlaqə

AZ RU EN

Ana səhifə / MEDİA / Gənclər-vətəndaş cəmiyyətinin aparıcı qüvvəsi

Gənclər-vətəndaş cəmiyyətinin aparıcı qüvvəsi

18.12.2021 [11:48]

Nicat

Ölkəmizdə vətəndaş cəmiyyəti, hüquqi dövlət quruculuğu istiqamətində aparılan dövlət siyasəti uğurla davam etməkdədir. Vətəndaş cəmiyyətini qeyri-dövlət müəssisələri, kooperativlər, icarə kollektivləri, birliklər, aksioner təşkilatları, korporasi?alar və vətəndaşların digər könüllü birlikləri təşkil edir. Vətəndaş cəmiyyətinin mənəvi sferasına söz, fikir azadlığı, öz mövqeyini açıq ifadə etmək imkanı, yaradıcı, elmi və digər öz fəaliyyət birliklərinin dövlət və siyasi strukturlardan asılı olmaması və müstəqilliyi elementləri daxildir.

Vətəndaş cəmiyyətinin aparıcı qüvvəsi əsasən gənclərdən ibarətdir. Azərbaycanda gənclər siyasəti uğurla davam etdirilməkdədir. Bu məzmunda ölkəmizdə gənclərin ictimai birliklərə, təşkilatlarda aktiv fəaliyyət göstərməsi daim dövlətin diqqət və qayğısı ilə həyata keçirilməkdədir. Bu gün Azərbaycan gəncləri təhsil və ya digər özünüinkişaf proqramları, dövlət proqramları çərçivəsində xarici ölkələrə göndərilirlər.

44 günlük Vətən müharibəsi dövründə gənclərimizin milli-mənəvi keyfiyyətinin çox yüksək səviyyədə olduğunun şahidi olduq. Belə ki, Ali Baş Komandan İlham Əliyevin çağırışı ilə minlərlə gənc könüllü olaraq cəbhəyə yollandı. Azərbaycan gəncləri yalnız ön cəbhədə silaha sarılmaqla deyil, həm də arxa cəbhədə öz bacarıqları ilə döyüşdülər. Ölkədə və xaricdə yaşayan gənclərin informasiya müharibəsində aktiv fəaliyyətini buna misal göstərmək yerinə düşər.

Prezident İlham Əliyevin 2020-ci ildə imzaladığı sərəncama əsasən 2020-ci il Azərbaycanda “Könüllülər ili” elan olunmuşdur. Bu minvalla xüsusi olaraq qeyd etmək yerinə düşər ki, müxtəlif dövlət qurumlarında cənab Prezidentin göstərişinə əsasən könüllülük qrupları yaradılır, gənclərin həmin qurumlarda təcrübə toplamasına şərait yaradılır. Həmin gənclərin böyük əksəriyyəti həmin müəssisə və qurumlarda işlə təmin olunurlar.

Digər tərəfdən, ölkədə prioritet istiqamətlərdən biri də gəncləşmə siyasətinin aparılmasıdır. Artıq bir neçə ildir ki, demək olar, bütün sahələrdə gənclərə yer verilir. Və beləliklə də aparıcı işçi qüvvəsinin daha çox faizi məhz gənclərdir. Bu gənclərdən biri də Kənan Qubadzadədir.

Ölkədə aparılan gənclər siyasətindən, onların cəmiyyətdəki rolundan “Yeni Azərbaycan”a danışan “Gənclər Mərkəzi” İctimai Birliyinin sədri Kənan Qubadzadə bildirib ki, bu gün ölkəmizdə hər bir sahədə gənclərimizin inkişafı üçün münbit şərait var: “Azərbaycan gəncləri bu gün hər sahədə inkişaf etməkdədir. Bu, cənab Prezident İlham Əliyev tərəfindən aparılan məqsədyönlü siyasətin nəticəsidir. Azərbaycan gəncləri üçün bol-bol imkanlar yaradılır. Başlayaq təhsildən. Tələbəlik dövründən gənclərimiz universitetdəki təşkilatlara qoşularaq özlərini inkişaf etdirirlər. Hətta onların bir çoxu təhsilini başa vurduqdan sonra da həmin təhsil müəssisələri ilə əməkdaşlıq edirlər. Bu kimi fəaliyyətlərdə aktiv iştirak gənclərin gələcək həyatında əhəmiyyətli rol oynayır”.

K.Qubadzadə, eyni zamanda bildirib ki, ölkədəki bütün gənclər bu kimi tədbirlərə qoşulmalıdırlar: “Düşünürəm ki, məqsəd ondan ibarət olmalıdır ki, heç bir gənc diqqətdən kənarda qalmasın. Belə ki, biz bilirik ki, ucqar rayonlarda yaşayan gənclərimiz var ki, o rayonlarda da şərait bir o qədər də yüksək səviyyədə deyil. Belə olduğu halda gənclərin müəyyən qisminin sadaladığımız tədbirlərdən uzaq düşməsi baş verir ki, bu da onların gələcək həyatında adaptasiya məsələləri ilə bağlı ciddi psixoloji-mənəvi çətinliklər yaradır”.

Birlik rəhbəri təklif edir ki, məktəb psixoloqları bu barədə şagirdlərlə mütəmadi söhbətlər aparmalı, onların bilik və bacarıqlarının ortaya çıxarılması üçün çalışmalıdırlar: “Burada böyük mənada iş məktəb psixoloqlarının üzərinə düşür. Çünki ilk formalaşma bağça və məktəb dövründən başlayır. Və əgər bir şagird məktəbdə təhsil aldığı müddətdə psixoloji gərginlik yaşayırsa və mənəvi durumu - psixologiyası zəifdirsə, bu, mütləq şəkildə onun gələcək fəaliyyətinə də təsir edir. Məhz buna görə də, ilk növbədə, valideynlər və məktəb kollektivi uşaqlara fərdi yanaşmalı, onların cəmiyyətə inteqrasiyası üçün əllərindən gələni etməlidirlər”.

K.Qubadzadə bildirir ki, sədri olduğu birliyin də əsas məqsədi gənclərə dəstək olmaq, onların inkişafına təkan verməkdir: “Biz də birlik olaraq bu cür gənclərimizi hər zaman diqqət mərkəzində saxlayır, onların inkişafı üçün əlimizdən gələni etməyə çalışırıq. Çünki gənclər bizim gələcəyimizdir!”

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Vətəndaş cəmiyyəti, hüquqi dövlət quruculuğu” istiqaməti üzrə hazırlanmışdır

Paylaş:

Baxılıb: 1222 dəfə