Keçmişi gələcəyə bağlayan körpü

Bakı:

26 °C

58 %

8 m/s

Əlaqə

AZ RU EN

Ana səhifə / MEDİA / Keçmişi gələcəyə bağlayan körpü

Keçmişi gələcəyə bağlayan körpü

06.09.2023 [10:51]

Azərbaycançılıq ideologiyası dövlətçilik təlimi rolunda

Üç onilliyi əhatə edən müstəqillik illərində məhz azərbaycançılıq ideologiyasına əsaslanaraq reallaşdırılan ardıcıl və məqsədyönlü siyasət ana Vətənlə bağlı olan bütün məsələlərin dünya azərbaycanlılarının həyat amalına, yaşam kredosuna çevrilməsini şərtləndirib. Bu gün biz müasir dövrün reallıqlarından çıxış edərək tam qətiyyətlə deyə bilərik ki, dünyanın dörd bir tərəfində yaşayan azərbaycanlıların sevinci də, kədəri də birdir. Onlar harada yaşamalarından asılı olmayaraq həmişə Azərbaycanın uğurlarına qəlbən sevinir, ümumi kədərimizi bölüşür, çətinliklərin aradan qaldırılmasına yardımçı olurlar. Dünya azərbaycanlılarının sıx həmrəyliyi ölkəmizin milli gücünü artırır, bizi yenilməz edir.

Bu gün dünyanın müxtəlif ölkələrində yaşayan soydaşlarımızı vahid amal - ana Vətənə məhəbbət, milli-mənəvi dəyərlərimizə, tarixdən gələn ənələrimizə bağlılıq ruhunda birləşdirən azərbaycançılıq Azərbaycan dövlətinin ideoloji əsasını təşkil edir. Bu ideologiyanın banisi xalqımızın ümummilli lideri Heydər Əliyevdir. Ulu Öndər hələ keçmiş sovet dönəmində Azərbaycana rəhbərlik edərkən dilimizin qorunmasını, ədəbiyyatımızın, mədəniyyətimizin zənginləşməsini, bütün sahələrdə milli kadrların yetişməsini, təhsilin inkişafını təmin etməklə dünya azərbaycanlılarında milli qürur hissini gücləndirməyə nail oldu. Sonrakı mərhələdə - 1993-cü ilin yayında müstəqil Azərbaycanın siyasi rəhbərliyinə qayıtdıqdan sonra isə ulu öndər zamanında böyük uzaqgörənliklə yaratdığı zəmin üzərində dünya azərbaycanlılarının birliyini təmin edəcək ideologiyanı dövlət siyasəti səviyyəsinə yüksəltdi.

Ona görə də “Heydər Əliyev İli”ndə Heydər Əliyevin bizə miras qoyduğu bütün digər dəyərlərlə bərabər azərbaycançılıq ideologiyasının da öyrənilməsi və təbliği aktual məsələlərdən biridir. Bu həm də milli kimliyin və sosial harmoniyanın davam etdirilməsi baxımından mühüm və vacib məsələdir. Hazırda bütün dünyada milli-etnik müstəvidə misli görünməmiş bir özünəqayıdış və milli kimliyin yenidən dərkedilməsi prosesi gedir. Bu mənada “Heydər Əliyev İli” təkcə onun yaratdığı böyük siyasi irsi yenidən öyrənib və gənc nəslə öyrədəcəyimiz il kimi deyil, həm də əslində milli dövlətçilik yaddaşımızın təzələnməsi ili kimi yaddaşlarda qalacaq. Azərbaycançılıq ideologiyası birbaşa Heydər Əliyevin adı ilə bağlıdır. Heydər Əliyev müasir azərbaycançılıq ideologiyasının - dövrün, zamanın tələblərini, dövlətçiliyin əsaslarını, milli-etnik şəraiti nəzərə alan milli təlimin banisidir. Çünki azərbaycançılıq ideologiyası məhz onun dövründə həqiqi siyasi-ideoloji məzmun qazanaraq, mükəmməl bir dövlətçilik təliminə çevrildi və müstəqil Azərbaycan Respublikasının dövlət ideologiyası səviyyəsinə yüksəldi.

Milli Məclisin üzvü professor Musa Qasımlı bildirib ki, azərbaycançılıq ideologiyası millətimizin tarixi keçmişi və bu günü ilə sıx bağlıdır: “Xalqımız milli kimliyini dərk etdiyi zamandan bəri azərbaycançılıq müxtəlif enişli-yoxuşlu yollardan, tarixi dövrlərdən keçərək inkişaf edib, zənginləşib. Hansı etnik kökə mənsub olmasından asılı olmayaraq, bütün Azərbaycan vətəndaşlarını tək vətən, tək dövlət, tək bayraq, tək millət ətrafında bərabər şəkildə birləşdirən azərbaycançılıq ideologiyası ilə dövlətimizin və millətimizin bu günü və gələcəyi sıx bağlıdır. Azərbaycanda etnik kimliyindən asılı olmayaraq, bütün vətəndaşlar Azərbaycan millətidir. Ona görə də azərbaycançılıq ilk növbədə ailədən, uşaq bağçasından, məktəbdən və cəmiyyətdən gəlməlidir. Rəhmətlik Mirzə Cəlil yazırdı ki, millətin gələcəyi anaların əlindədir. Azərbaycançılıq təkcə şüar olaraq deyil, məzmun və mahiyyətinə görə dərsliklərimizdə hakim olmalıdır. Fikrimcə, azərbaycançılıq bu və ya başqa səviyyədə təhsil müəssisələrində, KİV-də təbliğ edilir. Lakin onun təkmilləşdirilməsinə ciddi ehtiyac olduğu qənaətindəyəm. Azərbaycançılığın daha geniş təbliğ edilməsinin hər bir Azərbaycan vətəndaşı üçün əhəmiyyəti böyükdür. Hesab edirəm ki, azərbaycançılıq təkcə vətəni, dövləti sevmək deyil, hər bir şəxsin olduğu yerdə onun sabit və davamlı inkişafı, dəyişən dünya reallıqlarına uyğun olaraq tərəqqisi və təhlükəsizliyi üçün çalışması deməkdir. Vətəndaşlarımızı birləşdirən bu ideologiyanın inkişafı yolunda əngəl olan, xüsusən, millətimizin birliyi və ölkəmizin bütövlüyünə qarşı yönəldimiş bütün, ən xırda cəhdlərin qarşısı amansızlıqla alınmalıdır”.

Deputatın dediyinə görə, azərbaycançılıq ideyasının təbliği dövlətçilik və vətənpərvərlik kimi təməl ideyalara söykənir: “Dövlətçilik təməl ideyasına əsasən Azərbaycan ərazisində yaşayan insanların vahid dövləti var. Həmin vahid dövlət də Azərbaycan Respublikasıdır. Həmin dövlətin vətəndaşları irqindən, dinindən, siyasi baxışından asılı olmayaraq, vahid ideyaya - Azərbaycan dövlətinin qorunması, saxlanılması ideyasına qulluq etməlidir. Dövlətçilik təməl ideyasına da dəstək verən ikinci təməl ideya vətənpərvərlikdir. Azərbaycan ərazisində yaşayan hər bir kəs Azərbaycan bayrağına, gerbinə, himninə, konstitusiyasına hörmət etməlidir”.

Günel ABBAS

Məqalə “Azərbaycan Respublikasının Medianın İnkişafı Agentliyi”nin maliyyə dəstəyi ilə “Azərbaycançılıq ideyasının təbliği - “Heydər Əliyev İli” istiqaməti üzrə hazırlanmışdır

Paylaş:

Baxılıb: 884 dəfə