Salyanda “Mirzə Qədim İrəvani – 200” rəsm müsabiqəsinin qalibləri müəyyənləşib

Bakı:

15 °C

88 %

1 m/s

Əlaqə

AZ RU EN

Ana səhifə / Mədəniyyət / Salyanda “Mirzə Qədim İrəvani – 200” rəsm müsabiqəsinin qalibləri müəyyənləşib

Salyanda “Mirzə Qədim İrəvani – 200” rəsm müsabiqəsinin qalibləri müəyyənləşib

18.05.2025 [14:49]

Salyan Dövlət Rəsm Qalereyasında “Mirzə Qədim İrəvani – 200” adlı rəsm müsabiqəsi keçirilib.

Şirvan-Salyan Regional Mədəniyyət idarəsindən AZƏRTAC-ın bölgə müxbirinə verilən məlumata görə, tədbir Azərbaycan Mədəniyyət İşçiləri Həmkarlar İttifaqı Salyan rayon komitəsinin dəstəyi ilə keçirilib.

Tədbirdə rayon rəsmiləri, YAP nümayəndələri, ziyalılar, rəssamlar və ictimaiyyətin nümayəndələri iştirak edib. Salyan Dövlət Rəsm Qalereyasının direktoru Kürçaylı Məmmədov, YAP Salyan rayon təşkilatının sədr müavini Aqşin Babayev, Azərbaycan Rəssamlar İttifaqının üzvü, rəssam İman Mustafayev, tarixçi-tədqiqatçı Sahib Həsənov, Mədəniyyət İşçiləri Həmkarlar İttifaqı Salyan rayon komitəsinin sədri Vəfa Məmmədova, qalereyanın tərtibatçı rəssamı Coşğun Məmmədov, uzun zaman mədəniyyət sahəsində rəhbər vəzifələrdə çalışmış Lətif Zərbəliyev, mədəniyyət işçisi Leyla Babayeva və digərləri Mirzə Qədim İrəvaninin Azərbaycan rəngkarlığının təşəkkülündəki əhəmiyyətli rolundan söz açıblar. Qeyd olunub ki, Mirzə Qədim İrəvani yaradıcılığını gələcək nəsillərə çatdırmaq olduqca vacib məsələdir. Məhz buna görə Prezident İlham Əliyevin müvafiq Sərəncamına əsasən, Mirzə Qədim İrəvaninin 200 illiyi ölkədə və ölkə xaricində xüsusi qeyd olunur.

Bildirilib ki, Mirzə Qədim İrəvani klassik Şərq miniatürü və xalq sənətinin zəngin ənənələrini Avropa realist boyakarlığının nailiyyətləri ilə ahəngdar şəkildə birləşdirərək, özünəməxsus orijinal üslub formalaşdırıb. Bu isə Azərbaycan təsviri sənəti tarixində yeni mərhələnin başlanğıcı olub.

Çıxışlardan sonra müsabiqə qaliblərinə hədiyyə və diplomlar, iştirakçılara isə sertifikatlar təqdim edilib. Sonra müsabiqə qalibləri və iştirakçılarının rəsm əsərlərindən ibarət sərgiyə baxış keçirilib.

“Mirzə Qədim İrəvani – 200” rəsm müsabiqəsi 3 yaş olmaqla 7-10, 11-15, 16-20 yaş kateqoriyaları üzrə baş tutub. Müsabiqə şərtlərinə görə rəssamlar Qarabağ, Zəngəzur, İrəvan şəhəri və Mirzə Qədim İrəvani mövzuları üzrə müxtəlif texnikalarla realist üslubda əsərlər təqdim ediblər. Rəsm müsabiqəsinin qalibləri 7-10 yaş arasında Siyasət Bünyatov 1-ci (Salyan Dövlət Rəsm Qalereyası), Məhəmməd Qurbanov 2-ci (Salyan şəhər Y.Qasımov adına 4 saylı tam orta məktəb) yerə layiq görülüblər.

11-15 yaş arasında isə Zəhra Sadıqlı (Neftçala şəhər Camal İsmayılov adına Uşaq İncəsənət Məktəbi) və Tərbiyə Gözəlli (Arbatan kənd E.Ağayev adına tam orta məktəb) 1-ci, Pərvin Ələkbərli (Neftçala şəhər Camal İsmayılov adına Uşaq İncəsənət Məktəbi) və Məryəm Məmmədova (Salyan Dövlət Rəsm Qalereyası) 2-ci, Əsmər Nəcəfli (Arbatan kənd E.Ağayev adına tam orta məktəb), Nərmin Əliyeva (Marışlı kənd Ramiz Qafarov adına tam orta məktəb) və Anar Abıyev (Salyan Dövlət Rəsm Qalereyası) 3-cü yeri qazanıblar.

16-20 yaş arasında Əsma Əliyeva (Salyan Uşaq-Gənclər İnkişaf Mərkəzi) və Nərmin Məmmədova (Salyan Dövlət Rəsm Qalereyası) 1-ci yerə layiq görülüblər.

Müsabiqə çərçivəsində təşkil olunan sərgi 31 may tarixinədək ziyarətçilərin üzünə açıqdır.

Paylaş:

Baxılıb: 556 dəfə