Heydər Əliyev
yeni azerbaycan logo

Ana səhifə / Müsahibə / Türk Dövlətlərini bir çətir altında görmək ən böyük arzumdur

Türk Dövlətlərini bir çətir altında görmək ən böyük arzumdur

29.12.2021 [10:48]

Şair: Şuşanı ziyarət etmək istəyirəm

Günel

Sen vur ki coşsun suyumuz

Sen vur ki Türk’tür soyumuz

Dağları aşsın boyumuz

Azerbaycan, Azerbaycan

Həmsöhbətimiz bu misraların müəllifi, Qarabağ zəfərinə qələbə şeirləri həsr edən türkiyəli gənc şair Gökhan Günaldır. Gökhan Günal Türkiyənin Girəsun şəhərində anadan olub və hazırda orada yaşayır. Hazırda Girəsun Universiteti Ədəbiyyat Fakültəsi Türk Dili və Ədəbiyyatı üzrə ali təhsil alır. Gənc şairlə söhbətimiz də ən az misraları qədər təsirli və maraqlı oldu.

- Gökhan bəy, şeir yazmağa marağınız nə zamandan başladı?

- İlk dəfə orta məktəbdə keçirilən şeir müsabiqəsində iştirak etmişəm. O zamandan müəllimlərim istedadıma bələd oldular. İlk peşəkar şeirimi yazana qədər özümü təkmilləşdirməyə çalışdım. Orta məktəb həyatım universitetə hazırlaşmaq və poeziya üzərində işləməklə keçir. Elə “Şairlər” adlı şeirimi də orta məktəbdə oxuyanda çap etdirdim.

- İndiyə qədər neçə şeir yazmısınız?

- İndiyə qədər 40 şeirim olub. Bəzi şeirlərim jurnallarda dərc olunaraq oxucular ilə görüşüb.

- Şeirlərinizi yazarkən sizi nə ruhlandırır, həmin anlarda əsasən hansı əhval-ruhiyyədə olursunuz?

-  Şeir yazarkən sakit mühitə diqqət edirəm. Zamanla əhvalım dəyişir. İlham sözü geniş bir anlayışdır, amma deyə bilərəm ki, Türk Xalq musiqisi şeir yazarkən ruhumu açır.

- İlham aldığınız şairlər varmı?

- Elə şairlər var ki, hər bir şair onları özünə örnək götürür. Əbdürrəhim Karakoç, Arif Nihat Asya, Aşık Sefai və Dilavər Cebeci ilham aldığım şairlərdir.

- Azərbaycana bu qədər sevginiz Türkiyə ilə qardaş dövlət olmağımızdan qaynaqlanır, ya necə?

- Bir türk gənci olaraq türk dövlətlərini bir çətir altında görmək ən böyük arzumdur. Mənim Azərbaycana sevgim türk olmaqdan irəli gəlir. Bütün türk dövlətlərinin ürəyimdə yeri var. Hər bir türk gənci Azərbaycana öz ölkəsi kimi hörmət edir və sevir.

- Şeir yazmaqda məqsədiniz nədir?

- Məncə, poeziya cəmiyyətə xitab etməlidir. Xalqımızın öyrənməsi, bilməsi üçün ən böyük dəstək sənət adamlarından gəlməlidir. Məqsədim xalqa müraciət etmək, xalqa təlqin etməkdir.

- Sizcə, sonradan şair olmaq olar, yoxsa şeir yazmaq ilahi vergidir?

- Məncə, şeir yazmaq Tanrıdan gələn bir vəhdir. Sonra şair olmur, şair doğulur.

- Şeiri nəyə bənzədirsiniz?

- Uzun mətnlər yazmaqdansa, 4-5 sətirlə fikrindəkiləri söyləmək və bunu obrazlara, ritorikaya, sözlərə başqa mənalar aid etməklə oxucuya təqdim etməkdir.

- Gənc kadr kimi Azərbaycan və Türkiyənin əlaqələri barədə necə düşünürsünüz?

- Azərbaycan-Türkiyə qardaşlığı və siyasi-iqtisadi əlaqələri Qarabağ Zəfərində bir daha özünü göstərdi. Ümid edirik ki, bu qardaşlıq əbədi olacaq. Bəxtiyar Vahabzadənin də şeirində dediyi kimi biz iki dövlət, bir millətik.

- Azərbaycan dilini bilirsinizmi?

- Azərbaycan dilini mükəmməl bilmirəm. Amma bilirəm ki, Türkiyə türkcəsinə çox bənzəyir. Və düşünürəm ki, Azərbaycana gələndə ünsiyyət yaratmaqda heç bir çətinliyim olmayacaq. Mən indiyə qədər Azərbaycanda olmamışam. Amma getmək istədiyim ölkələrdən birincisidir.

- Azərbaycan şairlərindən hansının yaradıcılığından bəhrələnirsiniz?

- Əsərlərini çox oxuduğum Azərbaycan şairlərindən biri də Əhməd Cavaddır. Məncə, onun “Çırpınırdı Qaradəniz” adlı şeirini hər bir türk gənci əzbər bilməlidir.

- Qarabağ haqqında da şeir yazmısınız. Sizi buna nə ruhlandırdı? Qarabağ qələbəsi?

- Qarabağ Zəfərinə “Qarabağ türküsü” adlı şeir həsr etmişdim. Azərbaycan Ordusunun müstəqillik uğrunda mübarizəsi məni çox təsirləndirdi. Azərbaycanın qələbəsi Türkiyədə hamını sevindirdi. Azərbaycan xalqı kimi biz də zəfəri səbirsizliklə gözləyirdik. Qardaşlarımız müharibədə qalib gəldikdən sonra bu şeiri yazmaq bir türk gənci olaraq mənim borcum idi.

- Qarabağla bağlı yeni şeirləriniz varmı?

- Hələ gəncəm, Allahın izni ilə, Qarabağa şeirlər yazıb Azərbaycan xalqına təqdim etmək istəyirəm.

- Qarabağa gəlməyi planlaşdırırsınız?

- Qarabağın mənim qəlbimdə xüsusi bir yeri var. Azərbaycan bayrağını Qarabağda görmək hər bir türk gəncinin arzusu və istəyidir. Ona görə də Azərbaycana gələn kimi ilk getmək istədiyim məkan məhz müqəddəs Qarabağ torpaqlarıdır.

- Qarabağda hansı şəhəri görmək istərdiniz?

- Şuşa şəkillərdən, videolardan və ən əsası xəyallarımda gördüyüm qədər çox gözəldir. Valehedici gözəlliyi öz gözlərimlə görmək və şəninə gözəl şeirlər həsr etmək üçün Şuşaya getmək istəyərəm. 

 

 

Paylaş
Baxılıb: 208 dəfə

Xəbər lenti

Hamısına bax

Gündəm

Xəbər lenti

Xəbər lenti

Xəbər lenti

Xəbər lenti

Xəbər lenti

Arxiv
B Be Ça Ç Ca C Ş
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31