Azərbaycan parlament nümayəndə heyəti Pakistanda səfərdə olub

Bakı:

10 °C

93 %

5 m/s

Əlaqə

AZ RU EN

Ana səhifə / Siyasət / Azərbaycan parlament nümayəndə heyəti Pakistanda səfərdə olub

Azərbaycan parlament nümayəndə heyəti Pakistanda səfərdə olub

14.02.2013 [01:35]

Xəbər verdiyimiz kimi Milli Məclisin sədri Oqtay Əsədovun başçılığı ilə parlament nümayəndə heyəti fevralın 11-12-də İqtisadi Əməkdaşlıq Təşkilatı Parlament Assambleyasının (İƏT PA) birinci iclasında iştirak etmək üçün Pakistanda səfərdə olub.
Milli Məclisin mətbuat xidmətindən AzərTAc-a bildiriblər ki, nümayəndə heyətinin tərkibinə deputatlar Əliağa Hüseynov, İlham Məmmədov, Milli Məclis Aparatının rəhbəri Səfa Mirzəyev və digər rəsmi şəxslər daxil idilər.
Əvvəlcə toplantıda iştirak edən ölkələrin nümayəndə heyətlərinin rəhbərləri İƏT PA-nın təsis sənədini imzalayıblar. Sonra təsis Konfransında İqtisadi Əməkdaşlıq Təşkilatına üzv olan altı ölkənin parlament rəhbərləri və bu təşkilatın baş katibi Şamil Ələsgərov çıxış ediblər. Çıxışlarda qarşılıqlı münasibətlərin inkişafı, üzv ölkələrin üzləşdiyi problemlər, regional münaqişələrin birlikdə həlli məsələləri diqqət mərkəzində olub.
Türkiyə Böyük Millət Məclisinin sədri Cəmil Çiçək çıxışında Azərbaycanın ən ağrılı problemi olan Dağlıq Qarabağ münaqişəsinin həllində Azərbaycana daim dəstək olmağın vacibliyini qeyd edib.
Azərbaycan Respublikası Milli Məclisinin sədri Oqtay Əsədov İƏT PA-nın təsis edilməsini yüksək qiymətləndirib və əmin olduğunu bildirib ki, əsası qoyulan yeni beynəlxalq qurum ölkələrimizin parlamentləri arasında əməkdaşlığın inkişafına, dövlətlərimiz arasında siyasi və iqtisadi əlaqələrin dərinləşməsinə, bölgəmizin zəngin potensialının gerçəkləşməsinə kömək göstərəcək. O.Əsədov qeyd edib ki, bu gün bəşəriyyət böyük sınaqlar və problemlər qarşısındadır. Bu problemləri yalnız dövlətlərin birgə səyləri ilə aradan qaldırmaq mümkündür. Başqa sözlə desək, dövlətlər arasında əməkdaşlığın zəruriliyi tarix boyu heç zaman bu qədər dərindən hiss olunmayıb. Müasir dünyanın dinamik inkişafı həyatın bir çox sahələrində hərtərəfli inteqrasiya ilə sıx bağlıdır.
Bütün bunlar beynəlxalq əməkdaşlığın mühüm bir formatını təşkil edən parlament diplomatiyasının roluna yeni məzmun verir. Ənənəvi diplomatiya mexanizmlərini tamamlayıb zənginləşdirən parlament diplomatiyası dövlətlər və xalqlar arasında dialoqun demokratik forumu və əməkdaşlığın səmərəli vasitəsi olduğunu artıq sübuta yetirib. Bu baxımdan 10 dövləti birləşdirən İqtisadi Əməkdaşlıq Təşkilatının fəaliyyətinin parlament ölçüsünün yaradılması çox böyük əhəmiyyətə malik olan siyasi hadisədir: “Azərbaycan tərəfi olaraq biz İƏT PA-nın fəaliyyətinə böyük ümidlər bəsləyirik. Əminik ki, yeni Parlament Assambleyası açıq və konstruktiv dialoq və müzakirələr üçün faydalı, əhəmiyyətli bir forum rolunu oynayacaq, sülh, sabitlik, sosial-iqtisadi rifah kimi ümumi maraqlarımızın təşviq və təmin edilməsinə xidmət göstərəcək”.
Oqtay Əsədov vurğulayıb ki, yeni yaradılan Parlament Assambleyası bölgəmizdə mövcud olan dondurulmuş münaqişələrdən çıxış yollarının axtarılmasına da səmərəli xidmət etməlidir: “Bu mənada 20 ildən çox davam edən Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsipləri əsasında tezliklə nizama salınması, yəni Ermənistan tərəfindən işğal olunmuş Azərbaycan ərazilərinin azad edilməsi, daimi yaşayış yerlərindən zorla qovulmuş 1 milyon Azərbaycan vətəndaşının doğma yurdlarına qaytarılması son dərəcə böyük əhəmiyyət kəsb edir. Ölkəmizə qarşı təcavüzün nəticələrinin aradan qaldırılması, Azərbaycanın ərazi bütövlüyünün bərpa edilməsi regional əməkdaşlığın inkişafı üçün tamamilə yeni perspektivlər açacaq”.
Sonra İslamabad şəhərində keçirilən İƏT PA-nın birinci ümumi yığıncağında tövsiyə xarakterli qərarlar qəbul edilib, təşkilatı məsələlərə baxılıb.
Səfər çərçivəsində Milli Məclisin sədri Oqtay Əsədovun toplantıda iştirak edən bir sıra parlamentlərin rəhbərləri ilə görüşləri olub. Pakistan İslam Respublikası Senatının sədri Seyid Nəyyar Hüseyn Buxari, Milli Assambleyasının sədri xanım Fehmida Mirzə, İran İslam Respublikası Parlamentinin sədri Əli Laricani və Pakistan İslam Respublikası Milli Assambleyasının sədr müavini Feysəl Kərim Kundi ilə görüşlərdə yeni təsis olunan İƏT PA-nın fəaliyyəti və perspektivləri, ölkələrimiz arasında o cümlədən, parlamentlərimiz arasında münasibətlərin və əlaqələrin daha da genişləndirilməsi, inkişaf etdirilməsi eləcə də, qarşılıqlı maraq doğuran digər məsələlər ətrafında müzakirələr aparılıb.
Bununla da Azərbaycan Parlament nümayəndə heyətinin Pakistana səfəri başa çatıb.

Paylaş:

Baxılıb: 1087 dəfə