Zəfər tariximiz!

Bakı:

10 °C

93 %

6 m/s

Əlaqə

AZ RU EN

Ana səhifə / Siyasət / Zəfər tariximiz!

Zəfər tariximiz!

26.11.2024 [09:16]

Kəlbəcərin Ermənistanın işğalından azad edilməsindən dörd il ötür

Təxminən 30 il ərzində sərhəd tanımayan erməni vandalizminə şahidlik edən, dağıdılan, sərvətləri talanan şəhər və kəndlərimizin işğaldan azad olunduğu tarixlər hər bir azərbaycanlı üçün çox böyük məna kəsb edir. Bu, bizim şanlı tariximizdir və hər bir azərbaycanlı bu qəhrəmanlıq tarixi ilə qürur duyur. Noyabrın 25-də Prezident İlham Əliyev Kəlbəcər Şəhəri Günü münasibətilə sosial şəbəkə hesablarında paylaşım edib. Dövlətimizin başçısının paylaşımında oxuyuruq: “Zəfər tariximiz - Kəlbəcərin Ermənistan işğalından azad edilməsindən dörd il ötür”.

İgid əsgər və zabitlərimizin qəhrəmanlığı

2020-ci il sentyabrın 27-dən noyabrın 10-dək davam edən 44 günlük Vətən müharibəsi ilə bağlı iki mühüm məqamı xüsusilə vurğulamaq lazımdır. Birinci məqam Azərbaycanın hərbi uğurudur.

Otuz illik işğal faktı ilə barışmayan Azərbaycan düşmənin genişlənən təxribatlarının qarşısını almaqdan ötrü ədalətli müharibəyə başlamışdı. Torpaqlarımızı əbədi olaraq öz nəzarətlərində saxlamaq istəyən, hətta yeni ərazi iddiaları sərgiləyən düşmən cəzalandırılmalı idi və bunu da ordumuz layiqincə etdi. İgid əsgər və zabitlərimiz “Arxada Vətəndir!” deyib böyük bir coşqu ilə döyüşlərə atılırdılar. Rəsmi İrəvan tərəfindən də təsdiqlənən məlumata görə İkinci Qarabağ müharibəsi günlərində Ermənistan hərbi birləşmələrində 11 mindən çox fərari qeydə alınıb. Azərbaycan Ordusunda isə bir nəfər də fərarilik etməyib. Biz 44 gün ərzində XXI əsrin müharibəsini apardıq və qalib gəldik. Müharibə günlərində 300-dən çox yaşayış məntəqəsi bilavasitə döyüş meydanında işğaldan azad edildi.

Unikal siyasi-diplomatik uğur

Vətən müharibəsi ilə bağlı ikinci mühüm məqam Azərbaycanın unikal siyasi-diplomatik uğurudur. Bəhs olunan üçtərəfli bəyanatla məğlub Ermənistan üzərinə müəyyən öhdəliklər götürmüşdü. Həmin öhdəliklərə əsasən qarşı tərəf əvvəlcədən müəyyənləşdirilən cədvələ uyğun olaraq Ağdamı, Kəlbəcəri və Laçını döyüşsüz geri qaytarmalı idi. Əvvəlcə Ağdam, sonda isə Laçın cədvəldə nəzərdə tutulan tarixlərdə geri qaytarılsa da, Ermənistan Kəlbəcərin boşaldılıb təhvil verilməsi üçün əlavə vaxt istədi.

Həmişə ədalət, humanizm mövqeyindən çıxış edən Azərbaycan öz ənənəsinə sadiq qalmaqla qarşı tərəfin istəyini təmin etdi. Bu humanizm jestinin əvəzində isə ermənilər növbəti dəfə özlərinin nankor xislətlərini ortaya qoydular. Belə ki, Kəlbəcərin boşaldılması zamanı ermənilər çoxsaylı təxribatlara əl atdılar - boşaltdıqları evləri yandırdılar, ərazilərə ən ağlagəməz yerlərdə minalar basdırdılar. Göz önündə bir rəzillik yaşanırdı. Bu gün separatçıların xaricdəki havadarları ermənilərin Azərbaycan ərazilərindən zorla çıxarıldıqları barədə hədyanlar uydururlar. Ancaq çoxsaylı foto və video materiallar belə hədyanların məqsədli şəkildə uydurulduğunu təsdiqləyir.

Kəlbəcərin 2020-ci il noyabrın 25-də bir güllə atılmadan Azərbaycana təhvil verilməsi qalib Azərbaycanın böyük siyasi-diplomatik uğuru idi. Ölkəmizin hərb meydanında qazandığı qələbələr diplomatik müstəvidə də təsdiqləndi.

Mübariz FEYİZLİ

Paylaş:

Baxılıb: 502 dəfə