İtaliyanın Venesiya şəhərində Azərbaycanın və qonşu ölkələrin müasir incəsənətinin nümayiş olunduğu sərgi açılıb

Bakı:

10 °C

93 %

4 m/s

AZ RU EN

Ana səhifə / Siyasət / İtaliyanın Venesiya şəhərində Azərbaycanın və qonşu ölkələrin müasir incəsənətinin nümayiş olunduğu sərgi açılıb

İtaliyanın Venesiya şəhərində Azərbaycanın və qonşu ölkələrin müasir incəsənətinin nümayiş olunduğu sərgi açılıb

01.06.2013 [09:01]

Azərbaycanın birinci xanımı Mehriban Əliyeva açılışda iştirak edib
Mayın 30-da İtaliyanın Venesiya şəhərində 55-ci Beynəlxalq Venesiya Biennalesi çərçivəsində Azərbaycanın və qonşu ölkələrin müasir incəsənətinin nümayiş olunduğu sərgi açılıb.
Azərbaycanın birinci xanımı Mehriban Əliyeva mərasimdə iştirak edib.
Azərbaycanın birinci xanımı, Heydər Əliyev Fondunun prezidenti Mehriban Əliyevaya məlumat verilib ki, Azərbaycan, o cümlədən Türkiyə, Rusiya, İran və Gürcüstandan 17 rəssamın müasir təsviri incəsənətə dair əsərlərinin nümayiş olunduğu sərgi “Love me love me not” adlanır. Aida Mahmudovanın rəhbəri olduğu “YARAT” Müasir İncəsənət Məkanının təşkil etdiyi sərgi noyabrın 24-dək fəaliyyət göstərəcək. Sərginin kuratoru əsasən Yaxın Şərq, İran və Qafqazda müasir incəsənət sahəsində ixtisaslaşan, əvvəllər “Kristi” hərracında mütəxəssis kimi çalışan Dina Naser Xadividir.
Sərginin özəlliyini təşkil edən əsas cəhət buradakı əsərlərin hər bir xalqın dinamikasını yaxından duymağa, unudulmuş, yaxud naməlum tarixin gizli tərəflərini açmağa və həmin ölkələrdə olan baxış tərzini göstərməyə imkan verməsidir.
Sərgidə geniş çeşiddə media və əşya xarakterli materiallar, həmçinin videoinstallyasiyalar və rəsm əsərləri nümayiş olunur. Kompozisiyalarda şəxsi təcrübədən qaynaqlanmış tarixi mövzular, müasir həyatın müxtəlif tərəfləri də ustalıqla əks olunub. Azərbaycan rəssamı Sitarə İbrahimovanın Qarabağ müharibəsinə həsr etdiyi “Hədd” adlı ekspoziyası sərgiyə gələnlərdə xüsusi maraq doğurur. Bu ekspozisiyanın əsasını müharibə dövründə Qırmızı Xaç Komitəsinin əməkdaşları tərəfindən çəkilən fotolar təşkil edir. Həmin fotolarda müharibədə itkin düşən şəxslərin əşyaları, hazırda Ağdamda və cəbhə xəttində yaşayan insanların həyatı təsvir olunur.
Digər işlərdə, videoinstallyasiyalarda rəssamlar öz hisslərini, dünyaya baxışlarını maraqlı tərzdə təqdim edirlər. Əsərlərin müəllifləri rənglərdən və rəssamlıq texnikasından səmərəli istifadə edərək təsviri məlumatları, incəsənət tarixi haqqında biliklərini əks etdirməyə çalışıblar. Onlar, həmçinin müasir incəsənətin müxtəlif formaları ilə insan təbiətinə məxsus hərəkət detallarını və abstraksiyanı təsvir ediblər.

Paylaş:

Baxılıb: 1109 dəfə