Azərbaycanda prezident seçkilərinin uzunmüddətli monitorinqini həyata keçirən MDB Parlament Assambleyasının ekspert qrupu üzvlərinin cənub bölgəsinə səfəri başa çatıb

Bakı:

10 °C

93 %

2 m/s

AZ RU EN

Ana səhifə / Siyasət / Azərbaycanda prezident seçkilərinin uzunmüddətli monitorinqini həyata keçirən MDB Parlament Assambleyasının ekspert qrupu üzvlərinin cənub bölgəsinə səfəri başa çatıb

Azərbaycanda prezident seçkilərinin uzunmüddətli monitorinqini həyata keçirən MDB Parlament Assambleyasının ekspert qrupu üzvlərinin cənub bölgəsinə səfəri başa çatıb

07.09.2013 [09:27]

Azərbaycanda keçiriləcək növbəti prezident seçkilərinin uzunmüddətli monitorinqini həyata keçirən Müstəqil Dövlətlər Birliyinin Parlament Assambleyasının (MDB PA) ekspert qrupunun üzvlərinin cənub bölgəsinə ikigünlük səfəri sentyabrın 6-da başa çatıb.
AzərTAc xəbər verir ki, ekspert qrupu üzvlərinin bölgəyə səfərinin ikinci günündə qonaqlar 78 saylı Lerik seçki dairəsi dairə seçki komissiyasında, 1 saylı Lerik şəhər və 62 saylı Peştətük kənd seçki məntəqələrində prezident seçkilərinə hazırlığın vəziyyəti ilə tanış olublar.
Dairə seçki komissiyasının sədri İdris Şıxəliyev, məntəqə seçki komissiyasının sədrləri Bəylər Salmanov və Xanhüseyn Ağaverdiyev qonaqlara prezident seçkilərinə hazırlıqla əlaqədar görülmüş işlər barədə məlumat verib, onların suallarını cavablandırıblar.
Lerik rayon İcra Hakimiyyətində ekspert qrupunun üzvləri ilə görüş keçirilib. Rayon İcra Hakimiyyətinin başçısı Rövşən Bağırov qonaqlara Lerik rayonunda seçkilərə hazırlığın vəziyyəti haqqında ətraflı məlumat verib. Bildirib ki, rayonda prezident seçkilərinin azad, demokratik və şəffaf keçirilməsi üçün lazım olan bütün şərait yaradılıb.
Diqqətə çatdırılıb ki, prezident seçkiləri ilə bağlı Lerik rayonunda 108 seçki məntəqəsi fəaliyyət göstərir. Uzunömürlülər diyarı hesab edilən Lerikdə prezident seçkilərində ilk dəfə səs verənlərin sayı 910 nəfərdir. Səsvermədə iştirak edəcək vətəndaşlardan 4 nəfərinin 100-dən, 686 nəfərinin isə 80-dən yuxarı yaşı var.
Müstəqil Dövlətlər Birliyi Parlament Assambleyası Şurası baş katibinin müavini, Azərbaycan Respublikası Milli Məclisinin MDB PA-da nümayəndəsi Aydın Cəfərov, qurumun katibliyinin rəhbərinin müavini, MDB PA-nın demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi Beynəlxalq İnstitutunun direktoru Dmitri Qladey, MDB PA-nın eksperti, Rusiya Federasiyası Konstitusiya Məhkəməsinin eksperti Aleksey Kartsov çıxış edərək Azərbaycanda prezident seçkilərinin uzunmüddətli monitorinqini həyata keçirən ekspert qrupunun qarşısında duran vəzifələrdən danışıblar.
MDB PA-nın ekspert qrupunun üzvləri günün ikinci yarısında Lənkəran rayonuna gəliblər.
Lənkəran şəhər İcra Hakimiyyətində qonaqlarla görüş keçirilib. Şəhər İcra Hakimiyyəti başçısının birinci müavini İlqar Dadaşov nümayəndə heyətinə Lənkəran rayonu haqqında məlumat verib, oktyabrın 9-da keçiriləcək prezident seçkilərinə hazırlıq işlərindən danışıb.
Qeyd olunub ki, Lənkəranda 4 dairə seçki komissiyası fəaliyyət göstərir. Rayonda fəaliyyət göstərən seçki məntəqələri səsverməyə tam hazırdır.
İlqar Dadaşov sentyabrın 5-də Azərbaycan Respublikasının Prezidenti İlham Əliyevin Lənkəran rayonuna tarixi səfəri haqqında qonaqlara məlumat verib. O, Azərbaycan Prezidentinin bir sıra sosial obyektlərin açılışlarda iştirak etdiyini, dövlətimizin başçısının rayonda aparılan tikinti-quruculuq və abadlıq işlərinə yüksək qiymət verdiyini diqqətə çatdırıb.
Görüşdə MDB PA Şurası baş katibinin müavini, Azərbaycan Respublikası Milli Məclisinin MDB PA-da nümayəndəsi Aydın Cəfərov, qurumun katibliyinin rəhbərinin müavini, MDB PA-nın demokratiyanın, parlamentarizmin inkişafının və vətəndaşların seçki hüquqlarına riayət olunmasının monitorinqi Beynəlxalq İnstitutunun direktoru Dmitri Qladey çıxış edərək monitorinq qrupunun 8 il bundan əvvəl yaradıldığını və seçkilərin uzunmüddətli monitorinqini həyata keçirdiyini bildiriblər. Natiqlər oktyabrın 9-da Azərbaycanda keçiriləcək növbəti prezident seçkilərinin Seçki Məcəlləsinə uyğun, tam ədalətli, demokratik və şəffaf keçiriləcəyinə əminliklərini ifadə ediblər. Qonaqlar cənub bölgəsində fəaliyyət göstərən seçki məntəqələrinin prezident seçkilərinə tam hazır olduqlarını bildiriblər.
Ekspert qrupu adından Lənkəran şəhər İcra Hakimiyyətinə “Tavriçeskiy dvoreç” kitabı hədiyyə edilib.
Öz növbəsində qonaqlara da Lənkəran haqqında kitab təqdim olunub.

Paylaş:

Baxılıb: 1141 dəfə