Milli Məclisin yaz sessiyasının növbəti iclası keçirilib

Bakı:

10 °C

93 %

5 m/s

Əlaqə

AZ RU EN

Ana səhifə / Siyasət / Milli Məclisin yaz sessiyasının növbəti iclası keçirilib

Milli Məclisin yaz sessiyasının növbəti iclası keçirilib

15.02.2014 [11:02]

Fevralın 14-də Azərbaycan Respublikası Milli Məclisinin yaz sessiyasının növbəti iclası keçirilib.
AzərTAc xəbər verir ki, iclası açıq elan edən Milli Məclisin sədri Oqtay Əsədov gündəlikdə 12 məsələnin olduğunu bildirib.
Əvvəlcə cari məsələlər müzakirə edilib. Deputatlar son vaxtlar cəbhə xəttində erməni silahlı qüvvələri tərəfindən atəşkəs rejiminin pozulmasının narahatlıq doğurduğunu bildiriblər. Soçidə keçirilən XXII Qış Olimpiya Oyunları zamanı “Olimpiya atəşkəsi”nə riayət edilməsi çağırışına erməni silahlı qüvvələrinin məhəl qoymamaları pislənilib.
Müzakirələr zamanı Gürcüstan Prezidentinin Azərbaycana rəsmi səfərindən də bəhs edilib. Qeyd olunub ki, bu səfər çərçivəsində keçirilmiş görüşlər Azərbaycanın və Gürcüstanın strateji tərəfdaşlığının gələcək inkişafı üçün yeni imkanlar yaradıb.
Milli Məclisin sədri Oqtay Əsədov Azərbaycan-Gürcüstan parlamentlərarası əlaqələrinin də inkişaf etdiyini bildirib, yaxın gələcəkdə hər iki ölkənin qanunverici orqanlarında fəaliyyət göstərən komitələr arasında əlaqələrin qurulacağını söyləyib.
Sonra gündəlikdəki məsələlər müzakirə olunub.
Ədliyyə nazirinin müavini Vilayət Zahirov bələdiyyələrin fəaliyyətinə inzibati nəzarəti həyata keçirən orqanın illik məruzəsini təqdim edib.
Məruzə ətrafında müzakirələr aparılıb.
Sonra deputatlar gündəlikdə duran digər məsələlərə baxıblar.
“Rəsmi statistika sahəsində əməkdaşlıq haqqında”, “Azərbaycan Respublikası Hökuməti və Belarus Respublikası Hökuməti arasında pensiya təminatı sahəsində əməkdaşlıq haqqında”, “Azərbaycan Respublikası Hökuməti və Ukrayna Nazirlər Kabineti arasında bitki karantini sahəsində əməkdaşlıq haqqında” sazişlərin təsdiq edilməsi barədə qanun layihələrinə baxılıb.
Bildirilib ki, ötən ilin noyabrında Bakıda imzalanan “Azərbaycan Respublikası Hökuməti və Belarus Respublikası Hökuməti arasında pensiya təminatı sahəsində əməkdaşlıq haqqında” Saziş hazırlanarkən hər iki ölkədə pensiya təminatı sahəsindəki fərqli məsələlər də nəzərə alınıb.
Deputatlar “Azərbaycan Respublikası Prezidentinin və Belarus Respublikası Prezidentinin Birgə Bəyannaməsi”nin təsdiq edilməsi haqqında qanun layihəsini nəzərdən keçiriblər. Həmçinin “Azərbaycan Respublikası Hökuməti və Belarus Respublikası Hökuməti arasında vergi qanunvericiliyinə əməl edilməsi məsələləri üzrə əməkdaşlıq və qarşılıqlı yardım haqqında” 2004-cü il 5 noyabr tarixli Sazişə əlavə və dəyişikliklər edilməsi barədə” Protokolun təsdiq edilməsi haqqında qanun layihəsi də müzakirə edilib.
Bundan başqa, Azərbaycanın “Beynəlxalq Üzüm və Şərab Təşkilatının təsis edilməsi haqqında” Sazişə qoşulmasına dair qanun layihəsinə baxılıb.
Deputatlar Azərbaycan Respublikasının 2002-ci il 15 mart tarixli 274-IIQ saylı Qanunu ilə təsdiq edilmiş “Bələdiyyə torpaqlarının ayrılmasına dair sənədlərin hazırlanması və razılaşdırılması qaydaları haqqında Əsasnamə”də, “Torpaq bazarı haqqında”, “Prokurorluq haqqında”, “Prokurorluq orqanlarında qulluq keçmə haqqında” Azərbaycan Respublikasının qanunlarında, İnzibati Xətalar Məcəlləsində dəyişikliklər edilməsi barədə qanun layihələrini də təsdiqləyiblər.
Vurğulanıb ki, korrupsiyaya qarşı mübarizə tədbirlərinin gücləndirilməsi məqsədilə Azərbaycan Respublikasının Baş Prokuroru yanında Korrupsiyaya qarşı Mübarizə Baş İdarəsinin prokurorluq orqanı olmaqla statusunun artırılması ilə bağlı “Prokurorluq haqqında” Qanuna dəyişikliklər edilib. Azərbaycan Prezidenti tərəfindən Milli Məclisə təqdim olunmuş bu layihə ölkəmizdə korrupsiyaya qarşı mübarizə ilə bağlı həyata keçirilən islahatların, tədbirlərin tərkib hissəsidir və Korrupsiyaya qarşı Mübarizə Baş İdarəsinin strukturunun daha da genişləndirilməsi ilə bağlıdır.
İclasda çıxış edən Azərbaycan Respublikasının Baş Prokuroru yanında Korrupsiyaya qarşı Mübarizə İdarəsinin rəisi Kamran Əliyev Azərbaycan Prezidentinin korrupsiyaya qarşı mübarizəni prioritet vəzifə kimi qarşıya qoyduğunu bildirib və bununla əlaqədar həyata keçirilən silsilə tədbirlər barədə məlumat verib. O, Korrupsiyaya qarşı Mübarizə İdarəsinin fəaliyyətinin genişləndirilməsi, xüsusilə bu quruma əməliyyat-axtarış funksiyası həyata keçirmək səlahiyyətinin verilməsi üzrə görülən işləri diqqətə çatdırıb.