Dövlət Gömrük Komitəsinin sədri Aydın Əliyev ABŞ səfirliyinin müvəqqəti işlər vəkili Derek Hoqanın rəhbərlik etdiyi nümayəndə heyətini qəbul edib

Bakı:

18 °C

82 %

2 m/s

AZ RU EN

Ana səhifə / Siyasət / Dövlət Gömrük Komitəsinin sədri Aydın Əliyev ABŞ səfirliyinin müvəqqəti işlər vəkili Derek Hoqanın rəhbərlik etdiyi nümayəndə heyətini qəbul edib

Dövlət Gömrük Komitəsinin sədri Aydın Əliyev ABŞ səfirliyinin müvəqqəti işlər vəkili Derek Hoqanın rəhbərlik etdiyi nümayəndə heyətini qəbul edib

16.08.2014 [09:47]

Dünən Dövlət Gömrük Komitəsinin sədri, gömrük xidməti general-leytenantı Aydın Əliyev Amerika Birləşmiş Ştatlarının Azərbaycandakı səfirliyinin müvəqqəti işlər vəkili Derek Hoqanın rəhbərlik etdiyi nümayəndə heyətini qəbul edib. Azərbaycanda dünya standartlarına uyğun gömrük xidməti formalaşdırıldığını diqqətə çatdıran A.Əliyev son illər gömrük sisteminin inkişafının daha da sürətləndirildiyini, normativ hüquqi və maddi-texniki təminatın yaxşılaşdırıldığını, fəaliyyətin təkmilləşdirildiyini qonaqların diqqətinə çatdırıb.
Qanunvericilik bazasının möhkəmləndirilməsinə daima xüsusi önəm verildiyini vurğulayan komitə sədri Azərbaycanda 2012-ci ilin əvvəlindən yeni Gömrük Məcəlləsinin tətbiqi ilə əlaqədar 59 normativ-hüquqi sənədin qəbul edildiyini xatırladıb. A.Əliyev qeyd edib ki, 2009-cu ildən dövlət sərhədinin buraxılış məntəqələrində “bir pəncərə” prinsipi tətbiq edilir. A.Əliyev istər ixraca nəzarət sistemi, kadr hazırlığı, terrorizmə, narkotik vasitələrin qanunsuz dövriyyəsinə qarşı mübarizə, istərsə də qanunvericilik bazasının möhkəmləndirilməsi, təcrübə mübadiləsi baxımından Azərbaycan Gömrük Xidmətinin Amerika təcrübəsindən xeyli yararlandığını da diqqətə çatdırıb.
Səmimi qəbula görə Dövlət Gömrük Komitəsinin sədri Aydın Əliyevə təşəkkür edən Amerika Birləşmiş Ştatlarının ölkəmizdəki səfirliyinin müvəqqəti işlər vəkili Derek Hoqan strateji müttəfiq kimi ABŞ hökumətinin Azərbaycanla əməkdaşlığa çox böyük önəm verdiyini qeyd edib, iki ölkə arasında istər siyasi, istərsə də iqtisadi münasibətlərin hazırki durumundan məmnunluqla söhbət açıb. Amerikalı diplomat Azərbaycan Gömrük Təşkilatının modernləşməsi və inkişafı yolunda atılan uğurlu addımları, eləcə də qarşılıqlı münasibətlərin inkişafı naminə respublikamızın gömrük xidmətinin ölkəsinin analoji qurumu ilə bağlı əməkdaşlığını yüksək qiymətləndirib. Derek Hoqan, həmçinin, 26-28 avqust tarixlərində ABŞ-ın San-Antonio şəhərində keçiriləcək “ABŞ-ın Gömrük və Sərhəd Mühafizəsi İdarəsinin 2014-cü il üzrə Terrorizmə qarşı Gömrük-Ticarət Tərəfdaşlığı” mövzusunda konfransa dəvət məktubunu Dövlət Gömrük Komitəsinin sədri Aydın Əliyevə təqdim edib.
Görüşdə tərəfləri maraqlandıran bəzi məsələlər barəsində ətraflı fikir mübadiləsi aparılıb.
Zahid İLHAMOĞLU

Paylaş:

Baxılıb: 1394 dəfə