Azərbaycan-Bolqarıstan əlaqələri keyfiyyətcə yeni səviyyəyə yüksəlib

Bakı:

16 °C

94 %

3 m/s

Əlaqə

AZ RU EN

Ana səhifə / Siyasət / Azərbaycan-Bolqarıstan əlaqələri keyfiyyətcə yeni səviyyəyə yüksəlib

Azərbaycan-Bolqarıstan əlaqələri keyfiyyətcə yeni səviyyəyə yüksəlib

14.05.2016 [10:08]

Mayın 13-də Milli Məclisin sədri Oqtay Əsədov ölkəmizdə səfərdə olan Bolqarıstanın xarici işlər naziri Daniel Mitovun başçılıq etdiyi nümayəndə heyəti ilə görüşüb.
AZƏRTAC xəbər verir ki, sədr Azərbaycanın Bolqarıstanla əməkdaşlığın inkişafına böyük önəm verdiyini bildirib. Qeyd edib ki, ölkələrimiz arasında strateji tərəfdaşlıq haqqında sənəd imzalandıqdan sonra münasibətlərimiz keyfiyyətcə yeni səviyyəyə yüksəlib.
Oqtay Əsədov əlaqələrimizin inkişafında dövlət başçılarının qarşılıqlı səfərlərinin və aparılan danışıqların mühüm rol oynadığını söyləyib. Bildirib ki, bu günədək ölkələrimiz arasında 51 sənəd imzalanıb, 10 sənəd isə baxılmaq üzrədir. Münasibətlərimizin hüquqi bazasını təşkil edən bu sənədlər əməkdaşlığımızın gələcək inkişafı üçün yaxşı zəmin yaradır.
Siyasi sahədə əlaqələrimizin yüksək səviyyədə olduğunu söyləyən Milli Məclisin sədri ticari-iqtisadi münasibətlərimizdə yüksək göstəricilər əldə etmək üçün böyük imkanlar olduğunu söyləyib. Qeyd edib ki, bu potensialın reallaşması iki dost xalqın rifah halının daha da yüksəlməsinə xidmət edəcək. Bolqarıstanın işgüzar dairələrinin Azərbaycanın neft, habelə qeyri-neft sektoru və digər sosial-iqtisadi layihələrində iştirakı, qarşılıqlı biznes forumların keçirilməsi iqtisadi əlaqələrimizin inkişafına böyük töhfə verə bilər.
Sədr parlamentlər səviyyəsində də əlaqələrimizi yüksək qiymətləndirib. Bildirib ki, deputatların qarşılıqlı səfərləri, nüfuzlu beynəlxalq qurumlarda fəaliyyəti buna parlaq misaldır.
Söhbət zamanı belə bir fikir vurğulanıb ki, Bolqarıstan Avropa İttifaqının üzvü kimi bizim üçün ağrılı olan Dağlıq Qarabağ problemi ilə əlaqədar məsələlərin müzakirəsində bu qurumun mövqeyindən çıxış edir. Biz strateji müttəfiq kimi gələcəkdə Bolqarıstanın bu məsələdə həssas mövqe nümayiş etdirəcəyinə ümid edirik. BMT Təhlükəsizlik Şurasının, AŞ PA-nın və digər beynəlxalq qurumların problemin həlli ilə əlaqədar qətnamələrinə məhəl qoymayan Ermənistan işğalçılıq siyasəti yeritməkdə davam edir. Təmas xəttində son dövrdə baş vermiş hadisələr bir daha sübut etdi ki, Azərbaycan münaqişəni başqa vasitələrlə də həll etmək iqtidarındadır. Ancaq sülh tərəfdarı kimi biz beynəlxalq birliyin səyi nəticəsində problemin tezliklə beynəlxalq hüququn norma və prinsiplərinə uyğun məntiqi həllinə inanırıq.
Bolqarıstanın xarici işlər naziri Daniel Mitov tutduğu vəzifədə Azərbaycana ilk dəfə səfər etdiyini, burada aparılan danışıqlardan və gördüklərindən məmnun qaldığını söyləyib. O qeyd edib ki, təmsil etdiyi ölkə Qafqazın bu bölgəsi ilə həyatın ən müxtəlif sahələrində əməkdaşlığı inkişaf etdirmək niyyətindədir.
Qonaq ümidvar olduğunu bildirib ki, yüksək səviyyəli siyasi dialoq iqtisadi münasibətlərin inkişafına da təkan verəcək. Bolqarıstan Azərbaycanla təkcə enerji deyil, turizm, kənd təsərrüfatı, nəqliyyat, yüksək texnologiyalar sahələrində də əməkdaşlıq etmək niyyətindədir.
Söhbət zamanı tərəfləri maraqlandıran məsələlər ətrafında fikir mübadiləsi aparılıb.
Görüşdə Milli Məclis Aparatının rəhbəri Səfa Mirzəyev, Azərbaycanın Bolqarıstandakı səfiri Nərgiz Qurbanova, Bolqarıstanın ölkəmizdəki səfiri Maya Xristova və digər rəsmi şəxslər iştirak ediblər.

Paylaş:

Baxılıb: 623 dəfə