Vüqar Əliyev: Fondun idarə edilməsi və fəaliyyətinin təşkili ilə bağlı kifayət qədər aydın mexanizm müəyyənləşdirilib

Bakı:

11 °C

93 %

4 m/s

AZ RU EN

Ana səhifə / Siyasət / Vüqar Əliyev: Fondun idarə edilməsi və fəaliyyətinin təşkili ilə bağlı kifayət qədər aydın mexanizm müəyyənləşdirilib

Vüqar Əliyev: Fondun idarə edilməsi və fəaliyyətinin təşkili ilə bağlı kifayət qədər aydın mexanizm müəyyənləşdirilib

26.05.2009 [10:28]

Məlum olduğu kimi, 2008-ci il iyulun 31-də Azərbaycan Prezidenti cənab İlham Əliyev “Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası”nı təsdiq etmişdir. Konsepsiyanın təsdiq olunması ilə bağlı sərəncamda KİV-in inkişafına dövlət dəstəyi həyata keçirəcək qurumun yaradılması üçün müvafiq tədbirlər görülməsi nəzərdə tutulmuşdur. Bunun nəticəsi olaraq 2009-cu il aprelin 3-də Azərbaycan Prezidentinin Fərmanı ilə Azərbaycan Respublikası Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun Nizamnaməsi təsdiq olunmuş, mayın 22-də isə Fondun Müşahidə Şurası üzvləri və İcraçı direktoru təyin edilmişlər.
SİA-ya açıqlamasında Prezident Administrasiyasının ictimai-siyasi məsələlər şöbəsinin mətbuat və informasiya orqanları ilə iş sektorunun müdiri Vüqar Əliyev bildirib ki, KİV-ə dövlət dəstəyini həyata keçirəcək qurumun təsis olunması prosesi başa çatıb və artıq fondun fəaliyyətinin təşkili ilə bağlı tədbirlər həyata keçiriləcək. “Bura Müşahidə Şurasının sədrinin və onun müavininin seçilməsi, bir sıra sənədləşdirmə və texniki məsələlərin həlli, həmçinin KİV-in layihələrinə maliyyə ayrılması üçün müvafiq qaydaların müəyyənləşdirilməsi və digər məsələlər aiddir”.
Prezident Administrasiyasının sektor müdiri qeyd edib ki, Fond ölkəmizdə fikir, söz və məlumat azadlığını inkişaf etdirmək, KİV-lərin müstəqilliyini dəstəkləmək, informasiya sektorunda yeni informasiya kommunikasiya texnologiyalarının tətbiqini stimullaşdırmaq, cəmiyyət və KİV-lər arasında səmərəli əməkdaşlığı genişləndirmək, jurnalistlərin peşəkarlığının və məsuliyyətinin artırılmasına şərait yaratmaq, onların sosial müdafiəsini gücləndirmək istiqamətində proqram və layihələrinin maliyyələşməsini həyata keçirəcək. Nizamnamədə fondun idarə edilməsi və fəaliyyətinin təşkili ilə bağlı kifayət qədər aydın mexanizm müəyyənləşdirilib. Hesab edirəm ki, təşkilati məsələlər başa çatdırıldıqdan sonra fond səmərəli fəaliyyət göstərəcək və qarşıya qoyulan vəzifələrin öhdəsindən uğurla gələcək.
V.Əliyev açıqlamasında bildirib ki, Fondun Müşahidə Şurasında təmsil olunan şəxslər həm müstəqil mətbuatı, həm jurnalist təşkilatlarını, həm də dövlət orqanlarını təmsil edirlər. Jurnalist təşkilatlarını və kütləvi informasiya vasitələrini təmsil edən şura üzvləri media sahəsində tanınmış şəxslərdir, uzun illər bu istiqamətdə işləyiblər və peşəkarlıq kriterilərinə cavab verirlər. Müşahidə Şurasının fondun Nizamnaməsi ilə müəyyən edilmiş vəzifələrinin qanunauyğun şəkildə həyata keçirməsinə və səmərəli fəaliyyətinə mane ola biləcək səbəb yoxdur.

Paylaş:

Baxılıb: 1276 dəfə