Parlamentlərarası İttifaqın baş katibi Milli Məclisdə olub

Bakı:

21 °C

64 %

9 m/s

Əlaqə

AZ RU EN

Ana səhifə / Siyasət / Parlamentlərarası İttifaqın baş katibi Milli Məclisdə olub

Parlamentlərarası İttifaqın baş katibi Milli Məclisdə olub

17.06.2017 [10:54]

İyunun 16-da Milli Məclisin sədri Oqtay Əsədov Parlamentlərarası İttifaqın baş katibi Martin Çunqonqla görüşüb.
AZƏRTAC xəbər verir ki, Milli Məclisin sədri səfər çərçivəsində keçirilən görüşlərin Azərbaycanla Parlamentlərarası İttifaq arasında əlaqələrin daha da dərinləşməsinə töhfə verəcəyinə əminliyini bildirib. Qeyd edib ki, ölkəmiz Parlamentlərarası İttifaq və quruma üzv parlamentlər ilə daha güclü əlaqələrin qurulmasına, təcrübə mübadiləsinin aparılmasına və qlobal problemlərin müzakirəsinə xüsusi önəm verir.
Spiker əlaqələrimizi yenidən canlandırmaq üçün qurumun regional konfranslarından birinin Azərbaycanda keçirilməsinin əhəmiyyətini qeyd edib. O, 2010-cu və 2015-ci illərdə təşkilatın xətti ilə keçirilən Parlament Sədrlərinin Ümumdünya Konfransında iştirakını məmnunluqla xatırlayıb.
Diqqətə çatdırılıb ki, Dağlıq Qarabağ münaqişəsi ilə əlaqədar Azərbaycanın Xarici İşlər Nazirliyi dünya ölkələrinin müvafiq qurumlarına müraciət edərək ölkəmizin icazəsi olmadan Ermənistan tərəfindən işğal edilmiş ərazilərə səyahət etməyin yolverilməz olduğunu bildirib. Bu ərazilərə səyahət edən xarici ölkə vətəndaşlarından, o cümlədən bir sıra ölkələrin deputatlarından ibarət siyahı hazırlanıb və onların Azərbaycana girişi qadağan olunub. Sonradan onlara təklif edilib ki, ölkəmizin ərazi bütövlüyünü tanıdıqları ilə bağlı məktubla müraciət etsələr, onların adı bu siyahıdan çıxarıla bilər. Bu məqsədlə bir neçə siyasətçi və deputat ərizə ilə müraciət edib və bu müraciətlərə müsbət cavablar verilib. “Biz bu məsələ ilə əlaqədar Parlamentlərarası İttifaqın 130-cu sessiyasının ölkəmizdə keçirilməməsinə təəssüflənirik. Sonralar aparılan danışıqlar nəticəsində əməkdaşlığın bərpası istiqamətində səmərəli addımlar atılıb. Oxşar hal Avropa Şurası Parlament Assambleyası ilə də yaşanıb. Artıq bu məsələ də öz müsbət həllini tapıb, təşkilat öz tədbirlərini mütəmadi olaraq Bakıda keçirməyə başlayıb”, - deyə O.Əsədov bildirib. Sədr qeyd edib ki, Parlamentlərarası İttifaq ölkəmiz üçün yalnız parlamentlərarası əlaqələrin daha da gücləndirilməsi baxımından deyil, həmçinin işğal olunmuş ərazilərin azad edilməsi, qaçqın və məcburi köçkünlərin hüquqları ilə bağlı qurumun yaratdığı imkandan səmərəli istifadə etmək üçün mühüm platforma kimi əhəmiyyətlidir. Bu məsələlərdə təşkilat mühüm rol oynaya bilər.
Martin Çunqonq növbəti dəfə bu vəzifəyə seçildikdən sonra ilk səfərlərindən birinin məhz Azərbaycana etdiyini vurğulayıb. O, vaxtilə tərəflər arasında mövcud olmuş anlaşılmazlıqları bir kənara qoyaraq, gələcəyə inamla baxmaq üçün gərəkli addımların atılmasının vacibliyini qeyd edib. Bu baxımdan qonaq ölkəmizə səfəri çərçivəsində keçirdiyi görüşləri yüksək dəyərləndirib. Bildirilib ki, onun təmsil etdiyi təşkilat Azərbaycanla əməkdaşlığın dərinləşməsində maraqlıdır.
Dağlıq Qarabağ münaqişəsindən söz açan Martin Çunqonq deyib: “Biz münaqişənin həllində beynəlxalq hüququn tərəfindəyik. Bu məsələ ilə əlaqədar Azərbaycanın ərazi bütövlüyünü dəstəkləyən BMT qətnamələrindən xəbərdarıq. Problemin dialoq yolu ilə həllinə üstünlük veririk. İnanırıq ki, Azərbaycanın Parlamentlərarası İttifaqla əməkdaşlığı ölkəniz üçün də əhəmiyyətli olacaq. Azərbaycan istədiyi təqdirdə lazım bildiyi məsələni, o cümlədən Dağlıq Qarabağ problemini qurumda müzakirəyə çıxara bilər. Biz qarşılıqlı faydalı əməkdaşlığımızın gələcəyinə inanırıq”.
* * *
Həmin gün Milli Məclis sədrinin müavini, Azərbaycanın Parlamentlərarası İttifaqda nümayəndə heyətinin rəhbəri Valeh Ələsgərov da baş katib Martin Çunqonqla görüşüb.
Valeh Ələsgərov bildirib ki, Azərbaycan Parlamentlərarası İttifaqla münasibətlərinin daha geniş və effektiv şəkildə inkişafını istəyir. Parlamentlərarası İttifaqdakı nümayəndə heyətimizin hər bir üzvü bu əməkdaşlığın inkişafında yaxından iştirak etməyə hazırdır.
Martin Çunqonq diqqətə çatdırıb ki, səfərin məqsədi Parlamentlərarası İttifaq və üzv dövlətlər arasında münasibətləri inkişaf etdirməkdir. Qonaq səfər çərçivəsində keçirdiyi görüşlərdə bir sıra məsələlərin müzakirə olunduğunu və bu görüşlərin ikitərəfli əməkdaşlığın davamlı inkişafına xidmət etdiyini diqqətə çatdırıb.
Söhbət zamanı bu ilin payızında Parlamentlərarası İttifaqın Sankt-Peterburqda keçirilməsi planlaşdırılan Baş Assambleya iclası barədə də fikir mübadiləsi aparılıb.

Paylaş:

Baxılıb: 409 dəfə