Azərbaycan və Çin üçün dövlətlərin ərazi bütövlüyünə, suverenliyinə hörmət edilməsi fundamental əhəmiyyət kəsb edir

Bakı:

22 °C

68 %

5 m/s

AZ RU EN

Ana səhifə / Siyasət / Azərbaycan və Çin üçün dövlətlərin ərazi bütövlüyünə, suverenliyinə hörmət edilməsi fundamental əhəmiyyət kəsb edir

Azərbaycan və Çin üçün dövlətlərin ərazi bütövlüyünə, suverenliyinə hörmət edilməsi fundamental əhəmiyyət kəsb edir

13.04.2019 [10:02]

Azərbaycan və Çin üçün dövlətlərin ərazi bütövlüyünə və suverenliyinə hörmət edilməsi fundamental əhəmiyyət kəsb edir.
AZƏRTAC xəbər verir ki, bu fikir Azərbaycan Respublikası Prezidenti Administrasiyasının Xarici siyasət məsələləri şöbəsinin müdiri Hikmət Hacıyevin Pekində Çin Kommunist Partiyası Mərkəzi Komitəsinin nazir müavini statusunda olan xarici əlaqələr şöbəsinin müdir müavini Quo Yecou, Çin xarici işlər nazirinin müavini Can Hanhuy, Çin Xalq Xarici Əlaqələr İnstitutunun vitse-prezidenti Lian Ciençüən ilə görüşlərində səslənib.
Görüşlərdə iki ölkə arasında müxtəlif istiqamətlərdə əməkdaşlığın hazırkı vəziyyətinə və inkişaf perspektivlərinə dair fikir mübadiləsi aparılıb.
Hikmət Hacıyev səfərin nəticələri barədə AZƏRTAC-ın xüsusi müxbirinə məxsusi müsahibəsində deyib:
- Azərbaycan Respublikasının Prezidenti İlham Əliyevin 2015-ci ildə Çinə səfəri zamanı Çin Xalq Respublikasının Sədri Si Cinpin başda olmaqla ölkə rəsmiləri ilə apardığı müzakirələr iki ölkə arasında əlaqələrin inkişafı və keyfiyyətcə yeni mərhələyə daxil olmasında mühüm rol oynayıb. Həmin səfər çərçivəsində dostluq münasibətlərinin və əməkdaşlığın daha da inkişaf etdirilməsi və dərinləşdirilməsi haqqında Birgə Bəyannamə, həmçinin “Bir kəmər, bir yol” strategiyasının tərkib hissəsi olan “İpək yolu iqtisadi” kəmərinin yaradılmasının birgə təşviqinə dair Anlaşma Memorandumu imzalanıb. Bütün bunlar Azərbaycan-Çin əlaqələrinin bütün sahələrdə inkişafına şərait yaradıb.
Hazırkı səfər çərçivəsində iki ölkə arasındakı yüksək səviyyəli siyasi dialoqun ruhuna uyğun olaraq Çindən olan tərəf müqabillərimiz ilə keçirdiyimiz görüşlərdə münasibətlərimizin siyasi, iqtisadi, humanitar və digər sahələrdə inkişafı barədə geniş fikir mübadiləsi apardıq. İki ölkənin yaxın dostluq və tərəfdaşlıq münasibətləri var. Prezident İlham Əliyev Azərbaycanın Çin ilə əlaqələrin bütün sahələrdə inkişafına xüsusi əhəmiyyət verir.
Azərbaycan Çinin dövlət başçısının müəllifi olduğu “Bir kəmər, bir yol” layihəsini yaxından dəstəkləyir. Düşünürük ki, bu layihə çərçivəsində də əməkdaşlığın daha da genişləndirilməsi üçün böyük imkanlar var. Bu çərçivədə nəqliyyat-tranzit sahəsində əməkdaşlıq mühüm əhəmiyyət kəsb edir. Region ölkələri ilə əlaqələndirilmiş böyük nəqliyyat infrastrukturuna malik olan Azərbaycan nəqliyyat dəhlizlərinin yaradılması və inkişafı prosesində yaxından iştirak edir. Çin tərəfi Bakı-Tbilisi-Qars dəmir yolu da daxil olmaqla bu dəhlizlərdən istifadə edərək bazarlara yeni çıxışın əldə edilməsində maraqlıdır.
Azərbaycan və Çin arasında xarici siyasət məsələlərində ortaq fikirlər və baxışlar var. Hər iki ölkə beynəlxalq münasibətlərdə BMT Nizamnaməsinin, beynəlxalq hüququn norma və prinsiplərinin hakim kəsilməsinin tərəfdarıdır. Hər iki ölkə üçün dövlətlərin ərazi bütövlüyünə və suverenliyinə hörmət edilməsi fundamental əhəmiyyət kəsb edir. Azərbaycan “Vahid Çin” siyasətini qəti şəkildə dəstəkləyir. Çinli həmkarlarımız görüşlərdə bir daha vurğuladılar ki, Çin Azərbaycanın ərazi bütövlüyünü və suverenliyini, Ermənistan-Azərbaycan Dağlıq Qarabağ münaqişəsinin məhz bu prinsiplərə, BMT Təhlükəsizlik Şurasının qətnamələrinə uyğun olaraq həllinə tərəfdardır. Bu məsələ iki ölkənin dövlət başçısının 2015-ci ildə qəbul etdikləri Birgə Bəyannamədə də öz təsbitini tapıb.

Paylaş:

Baxılıb: 590 dəfə