İşğalçı ölkə münaqişənin sülh yolu ilə həllində maraqlı olmadığını nümayiş etdirir

Bakı:

18 °C

82 %

5 m/s

Əlaqə

AZ RU EN

Ana səhifə / Siyasət / İşğalçı ölkə münaqişənin sülh yolu ilə həllində maraqlı olmadığını nümayiş etdirir

İşğalçı ölkə münaqişənin sülh yolu ilə həllində maraqlı olmadığını nümayiş etdirir

08.09.2020 [09:35]

Ekspertlərin fikrincə, baş verən son proseslərdən aydın görünür ki, Ermənistan tərəfi beynəlxalq vasitəçilərin iştirakı ilə aparılan sülh danışıqlarını pozmaq və işğalçılıq siyasətini davam etdirmək niyyətindədir
Məlum olduğu kimi, Ermənistan-Azərbaycan Dağlıq Qarabağ münaqişəsinin beynəlxalq hüququn norma və prinsipləri əsasında həlli Azərbaycan Respublikası üçün prioritet təşkil edir. Ölkəmizin bu istiqamətdəki mövqeyi birmənalıdır: münaqişə mütləq Azərbaycanın ərazi bütövlüyü çərçivəsində və BMT Təhlükəsizlik Şurasının müvafiq qətnamələri əsasında öz həllini tapmalıdır. Lakin düşmənin iyul ayında Tovuz istiqamətində təxribat cəhdi və digər təxribatçı hərəkətləri bir daha təsdiqləyir ki, işğalçı Ermənistan münaqişənin həlli ilə bağlı ATƏT-in Minsk qrupu formatında aparılan danışıqların uğurla nəticələnməsində maraqlı deyil. Belə ki, Ermənistan hakimiyyəti son dövrlər mütəmadi olaraq danışıqlar prosesini pozmağa hesablanmış addımlar atır. Ekspertlərin fikrincə, baş verən son proseslərdən aydın görünür ki, Ermənistan tərəfi beynəlxalq vasitəçilərin iştirakı ilə aparılan sülh danışıqlarını pozmaq və işğalçılıq siyasətini davam etdirmək niyyətindədir.
Məsələyə münasibət bildirən Milli Məclisin üzvü Elman Məmmədov da deyib ki, Ermənistan hər vəchlə danışıqlar prosesini pozmağa, beynəlxalq müstəvidə “Madrid prinsipləri”nin üzərindən xətt çəkməyə çalışır: “Məlum olduğu kimi, sentyabrın 1-də Rusiya Xarici işlər naziri Sergey Lavrov Ermənistan-Azərbaycan Dağlıq Qarabağ münaqişəsinin hər iki tərəfinin ATƏT-in Minsk qrupunun həmsədrlərinin təmsilçilərinin regionda təşkil etdikləri görüşlərin bərpasında maraqlı olmasına əminliyini bildirib. Lakin Ermənistanın baş naziri Nikol Paşinyanın işğal edilmiş Dağlıq Qarabağa son səfərindən dərhal sonra qondarma rejimin təmsilçisi bəyan edib ki, guya ATƏT-in Minsk qrupunun formatında danışıqlar prosesinin bazası sayılan “Madrid prinsipləri” artıq müzakirə olunmur. Separatçıların rəhbəri Araik Arutyunyan öz növbəsində, ümumiyyətlə, erməniləri sülh barədə düşünməyə yox, müharibəyə hazırlaşmağa çağırıb”.
E.Məmmədov deyib ki, işğalçı Ermənistan Azərbaycanın işğal olunmuş ərazilərində yaratdığı qondarma rejimin nümayəndələrinin dilindən səsləndirdiyi bu cür bəyanatlarla əvvəllər qəbul etdiyi “Madrid prinsipləri”ndən imtina etdiyini ortaya qoyub: “Ermənistan bu addımları ilə münaqişənin danışıqlar yolu ilə həllində maraqlı olmadığını nümayiş etdirir. İşğalçı tərəf açıq şəkildə göstərir ki, beynəlxalq vasitəçilərin iştirakı ilə aparılan sülh danışıqlarına meyilli deyil, BMT Təhlükəsizlik Şurasının müvafiq qətnamələrinə məhəl qoymur. Buna görə də beynəlxalq ictimaiyyət, xüsusilə ATƏT-in Minsk qrupuna həmsədr ölkələr belə təxribatçı addımlarına görə Ermənistana qarşı sərt mövqe nümayiş etdirməli, təcavüzkar siyasətini davam etdirən işğalçı ölkə cəzalandırılmalıdır”.
Vətəndaşların Əmək Hüquqlarını Müdafiə Liqasının sədri Sahib Məmmədovun sözlərinə görə, Ermənistan işğalçılıq siyasətini davam etdirmək niyyətində olduğunu dəfələrlə sübut edib: “Son günlər qondarma rejimin nümayəndələrinin açıqlamaları onu deməyə əsas verir ki, Ermənistanın siyasi rəhbərliyi ölkəmizə qarşı növbəti hərbi təxribat törətməyə hazırlaşır. Elə A.Arutunyanın vaxtilə Azərbaycanın ikinci ən böyük şəhəri olan Gəncəni vurmaqla hədələməsi və müharibəyə hazırlıq çağırışları barədə son açıqlamaları da bunu sübut edir”.
Açıqlamasında, eyni zamanda, Ermənistanda hərbi könüllü dəstələrinin yaradılması məsələsinə də toxunan S.Məmmədovun fikrincə, bu cəhd düşmənin müharibəyə hazırlaşmasının daha bir göstəricisi ola bilər: “Məlum olduğu kimi, Ermənistanda “Müdafiə haqqında” qanuna dəyişikliklər ictimai müzakirəyə çıxarılıb. Dəyişikliklər silahlı hücum və ya hərbi əməliyyat zamanı vətəndaşların Ermənistanın hərbi müdafiəsində könüllü iştirakını nəzərdə tutur. Bu məsələdə digər təhlükəli məqam isə yaradılacaq könüllü hərbi dəstələrin tərkibinə xaricdən gələn muzdluların cəlb olunması ilə bağlıdır”.
“Görünən odur ki, işğalçı Ermənistan sülh danışıqları prosesinə destruktiv yanaşır, mövcud status-kvonu qoruyub saxlamaq istəyir. Üstəlik, düşmən işğalçılıq siyasətini davam etdirmək niyyətini ortaya qoyur. Birmənalı şəkildə demək olar ki, düşmənin bu mənfur niyyəti baş tutmayacaq. Çünki Ali Baş Komandanın rəhbərliyi altında Azərbaycan Ordusu istənilən vaxt işğal altındakı torpaqlarımızı azad etməyə hazırdır və buna qadir olduğunu dəfələrlə sübut edib”, - deyə S.Məmmədov vurğulayıb.
Qaşqay RAMAZANOV

Paylaş:

Baxılıb: 326 dəfə