Ermənistanın minimum 25, maksimum 35 gün vaxtı var

Bakı:

16 °C

55 %

9 m/s

Əlaqə

AZ RU EN

Ana səhifə / Siyasət / Ermənistanın minimum 25, maksimum 35 gün vaxtı var

Ermənistanın minimum 25, maksimum 35 gün vaxtı var

02.02.2022 [10:26]

Prezidentsiz qalan Ermənistan yeni fakt və seçim qarşısında...

Pərviz SADAYOĞLU

Ermənistan parlamentinin spikeri Alen Simonyan prezident Armen Sarksiyanın istefası barədə qərar imzalayıb. Prezidentin istefasından 7 gün sonra imzalanan qərar barədə məlumat Ermənistanın qanunverici orqanın saytında yerləşdirilib. Sənəddə bildirilir ki, Ermənistan konstitusiyasının 142-ci maddəsinə, habelə parlament reqlamentinin 147-ci maddəsinin 1-ci hissəsinin və 2-ci hissəsinin 2-ci bəndinin tələblərinə əsasən prezident Armen Sarkisyanın səlahiyyətləri bitmiş hesab edilir. Hazırda dövlət başçısı səlahiyyətlərini parlamentin spikeri Alen Simonyan icra etməkdədir. Yeni prezidenti seçmək üçün parlament üzvlərinin minimum 25, maksimum 35 gün vaxtı var. Ölkə prezidenti olmaq üçün isə bütün qüvvələr - həm müxalifət, həm də hakim siyasi partiya öz namizədini irəli sürə bilər. Parlament üzvlərinin dörddə birinin səsini qazanan şəxs ölkə başçısı seçiləcək.

Baş nazir Nikol Paşinyanın rəhbərlik etdiyi hakim “Vətəndaş müqaviləsi” partiyası prezidentliyə namizədinin adını rəsmən açıqlamasa da, artıq hökumətyönlü media onun yüksək texnologiyalar sənayesi naziri V.Xaçaturyan olduğunu yazıb. Xaçaturyanın özü də bu məlumatı təkzib etməyib. Parlamentdəki “Hayastan” fraksiyasının rəhbəri Seyran Ohanyan da, o cümlədən müxalifətin “Ermənistan” bloku da prezidentliyə namizəd irəli sürmək fikrində olduqlarını bildiriblər.

Qeyd edək ki, Ermənistanda prezident parlament üzvləri tərəfindən seçilir. 2021-ci ilin yayında keçirilən növbədənkənar seçkilərindən sonra parlamentdə 71 mandat hakim “Vətəndaş müqaviləsi” fraksiyasına, 29 mandat “Hayastan” fraksiyasına, 7 mandat “Şərəfim var” fraksiyasına məxsusdur.

Prezidentliyə namizədlərin müəyyənləşməsi istiqamətində gedən müzakirələr Ermənistanda referendum keçirilməsi məsələsini də yenidən gündəmə gətirib. Belə ki, dövlət idarəçilik sisteminin dəyişməsinin zəruri olduğunu söyləyən bəzi müxalifət partiyaları hazırkı parlament respublikasından yarı-prezident üsul-idarəsinə keçidi təklif edirlər. Parlament çoxluğuna malik hakim partiya və partiyanın rəhbəri Nikol Paşinyan isə bu təkliflərlə razılaşmır. Xatırladaq ki, keçmiş Prezident Armen Sarkisyan istefasının bir səbəbini də məhz dövlət başçısının səlahiyyətlərinin olduqca məhdud olması ilə əlaqələndirmişdi.

Məsələ ilə bağlı fikirlərini bölüşən siyasi şərhçi Qabil Hüseynli bildirib ki, İkinci Qarabağ müharibəsində ağır məğlubiyyətə uğrayan Ermənistanda siyasi böhran bir neçə istiqamətdə özünü açıq şəkildə büruzə verməkdədir. İqtisadi çöküş, o cümlədən Azərbaycanın regionda yaratdığı yeni siyasi reallıqlar Ermənistanı fakt qarşısında qoyub. Bu baxımdan, Armen Sarkisyanın istefası yalnız səlahiyyətlərin məhdudluğu ilə əlaqəli deyil. Q.Hüseynli vurğulayıb ki, Azərbaycanın irəli sürdüyü şərtlərə, o cümlədən imzalanan üçtərəfli bəyanatların tələblərinə riayət etməli olan Ermənistan hakimiyyəti indiyə qədər öz xalqına danışdığı yalanların əsirinə çevriliblər. Onun fikrincə, A.Sarkisyan da anlayırdı ki, yaxın zamanda imzalanacaq sülh sazişi uydurulan bütün miflərin sonudur: “Ermənistanda son 20 ildə hakimiyyətdə olan qüvvələr öz işğalçı siyasətləri ilə dövlətin iqtisadi dayaqlarını tam sarsıdıblar. Artıq situasiya dəyişib. Azərbaycan bölgədə yeni əməkdaşlıq mühiti yaradıb və Ermənistanın da bu platformada iştirakını məqbul hesab edir. Bu baxımdan, yeni mərhələyə yeni siyasi rəhbərliklə başlamaq Paşinyan komandasının da ürəyincədir. Yeni seçiləcək Ermənistan prezidentinin kimliyi isə parlament sədrinin qərarından sonra maksimum 35 gün müddətində bəlli olmalıdır. Onsuz da siyasi böhran girdabından xilas olmayan bu ölkə üçün həmin 35 gün olduqca çətin keçəcək. Hazırkı situasiyada prezidentin hakim partiyadan seçilməsi ehtimalı olduqca böyükdür. Hakim partiyanın irəli sürdüyü namizəd isə iqtisadçıdır. Prosesə nəzər yetirdikdə görmək olur ki, Paşinyan Azərbaycan və Türkiyə ilə münasibətləri tənzimləmək, Ermənistanın qonşuları ilə əlaqələrini yaxşılaşdırmaq yolunu tutub. Bunun üçün də yeni prezident məhz köhnə stereotiplərdən uzaq bir şəxs olmalıdır. Artıq Ermənistanda sülh müqaviləsi ilə bağlı da zaman-zaman müsbət fikirlər səsləndirirlər. Bu baxımdan, hakim komanda onlara mane ola biləcək qüvvənin prezident olmasına imkan verməyəcək. Digər tərəfdən, parlament çoxluğu da Paşinyanın partiyasının əlindədir. Onlar istədikləri namizədi təsdiq etmək iqtidarındadırlar”.

Q.Hüseynli əlavə edib ki, keçmiş iqtidar nümayəndələrinin bu seçkilərdə qələbə qazanmaq şansı olduqca azdır. Bu baxımdan, yeni prezidentin seçilməsi prosesində qeyri-adi halın baş verməsi ehtimalı azdır.

Paylaş:

Baxılıb: 1117 dəfə